મારું શહેર માધવપુરના દરિયામાં રહસ્યમય ટેન્કર દેખાતા લોકોના ટોળેટોળા.
માધવપુર (પોરબંદર): પોરબંદર જિલ્લાના માધવપુર દરિયાકાંઠે બુધવારે એક રહસ્યમય ટેન્કર સમુદ્રમાં તરતું જોવા મળતાં સ્થાનિકોમાં ભારે ઉત્સુકતા ફેલાઈ હતી. સવારથી જ દરિયામાં દેખાતા આ ટેન્કર અંગે વાતો વંટોળની જેમ સમગ્ર વિસ્તારમાં ફેલાતા મોટી સંખ્યામાં લોકો દરિયાકાંઠે ઉમટી પડ્યા હતા.
સ્થાનિકોના જણાવ્યા મુજબ, ટેન્કર સવારથી જ માધવપુરના દરિયામાં તરતું જોવા મળ્યું હતું. શરૂઆતમાં લોકોમાં ટેન્કરની ઓળખ અને તેમાં શું હશે તે અંગે અનેક પ્રકારની અટકળો ચાલી રહી હતી. થોડા જ સમયમાં આ સમાચાર સમગ્ર વિસ્તારમાં પ્રસરી જતા દરિયાકાંઠે લોકોના ટોળેટોળા એકત્ર થવા લાગ્યા હતા.
આશરે બે કલાક બાદ દરિયાની લહેરો અને પ્રવાહના કારણે ટેન્કર શિવલિંગ નજીકના દરિયાકાંઠા તરફ આવી પહોંચ્યું હતું. ટેન્કર નજીક આવતાં લોકોમાં ભારે ઉત્સુકતા જોવા મળી હતી અને મોટી સંખ્યામાં લોકો તેને જોવા માટે ઉમટી પડ્યા હતા.
ઘટનાની જાણ થતાં માધવપુર પોલીસ તેમજ કસ્ટમ વિભાગના અધિકારીઓ તાત્કાલિક ઘટનાસ્થળે પહોંચી ગયા હતા. પોલીસે સમગ્ર વિસ્તારને કોર્ડન કરી ટેન્કરની પ્રાથમિક તપાસ હાથ ધરી હતી. તપાસ દરમિયાન ટેન્કર ખાલી હોવાનું પ્રાથમિક રીતે સામે આવતાં તેમાં કોઈ માલસામાન ન મળ્યો હતો. ટેન્કર ખાલી હોવાનું જાણવા મળતાં તેને જોવા ઉમટેલા લોકો નિરાશ થઈ પરત ફર્યા હતા.
પોલીસ અને કસ્ટમ વિભાગે ટેન્કર કયા સ્થળેથી આવ્યું, તે કોની માલિકીનું છે અને અગાઉ તેમાં શું ભરેલું હતું તે સહિતના મુદ્દાઓની તપાસ શરૂ કરી છે. દરિયાઈ માર્ગે આ ટેન્કર અહીં સુધી કેવી રીતે પહોંચ્યું અને તે કોઈ દુર્ઘટનાના કારણે દરિયામાં તણાઈ આવ્યું કે અન્ય કોઈ કારણસર છોડવામાં આવ્યું તેની પણ તપાસ કરવામાં આવી રહી છે.
સુરક્ષાના ભાગરૂપે પોલીસે ટેન્કરની આસપાસ ચુસ્ત બંદોબસ્ત ગોઠવી લોકોને તેની નજીક જવા પર પ્રતિબંધ મૂક્યો હતો. કોઈ અનિચ્છનીય ઘટના ન બને તે માટે પોલીસ સતત દેખરેખ રાખી રહી છે.
અધિકારીઓના જણાવ્યા મુજબ, ટેન્કર અંગેની સંપૂર્ણ માહિતી મેળવવા માટે સંબંધિત દરિયાઈ અને કસ્ટમ સત્તાવાળાઓ સાથે સંકલન કરવામાં આવી રહ્યું છે. તપાસ પૂર્ણ થયા બાદ જ ટેન્કરનું મૂળ, માલિકી અને તે દરિયામાં કેવી રીતે પહોંચ્યું તે અંગે સ્પષ્ટ માહિતી સામે આવશે.
