મારું શહેર ભાણવડના વાનાવડમાં એક જ રાતમાં બે મહાકાય મગરોનું દિલધડક રેસ્ક્યુ: એનિમલ લવર્સ અને વન વિભાગની સતર્કતાથી ટળી મોટી દુર્ઘટના.
ભાણવડ: દેવભૂમિ દ્વારકા જિલ્લાના ભાણવડ તાલુકાના વાનાવડ ગામમાં એક જ રાત્રિ દરમિયાન બે મહાકાય મગરો દેખાતા સમગ્ર વિસ્તારમાં ભારે ભયનો માહોલ સર્જાયો હતો. જોકે સ્થાનિક એનિમલ લવર્સ, વાઇલ્ડલાઇફ રેસ્ક્યુ ટીમ અને વન વિભાગની ટ્રેકર ટીમની સમયસરની કામગીરીને કારણે બંને મગરોનું સફળતાપૂર્વક રેસ્ક્યુ કરવામાં આવ્યું હતું. આ દિલધડક રેસ્ક્યુ ઓપરેશન બાદ ગ્રામજનોએ રાહતનો શ્વાસ લીધો હતો.
મળતી માહિતી મુજબ, વાનાવડ ગામના વાડી વિસ્તારમાં ગત રાત્રિના સમયે અંદાજે છ ફૂટ લાંબો મહાકાય મગર દેખાયો હતો. વાડીમાં મગર દેખાતા જ માલિક અને આસપાસના લોકોમાં ભારે ગભરાટ ફેલાઈ ગયો હતો. ઘટનાની જાણ તાત્કાલિક સ્થાનિક જીવદયાપ્રેમી સહદેવસિંહ જાડેજાને કરવામાં આવી હતી. માહિતી મળતાં જ તેઓ વિલંબ કર્યા વગર સ્થળ પર પહોંચી સમગ્ર પરિસ્થિતિનું નિરીક્ષણ કર્યું હતું.
મગરનું કદ મોટું અને આક્રમક હોવાનું જણાતા સહદેવસિંહ જાડેજાએ તરત જ ભાણવડના જાણીતા વાઇલ્ડલાઇફ રેસ્ક્યુઅર અશોકભાઈ ભટ્ટનો સંપર્ક કર્યો હતો. જાણ થતાં જ અશોકભાઈ ભટ્ટ પોતાની રેસ્ક્યુ ટીમ તેમજ ભાણવડ વન વિભાગની ટ્રેકર ટીમ સાથે રાત્રિના સમયે જ ઘટનાસ્થળે પહોંચી ગયા હતા. ભારે સાવચેતી અને જહેમત બાદ ટીમે અંદાજે છ ફૂટ લાંબા મગરને સફળતાપૂર્વક કાબૂમાં લઈ સુરક્ષિત રીતે રેસ્ક્યુ કર્યો હતો.
પ્રથમ મગરને પાંજરામાં રાખીને તેના કુદરતી આવાસ એવા બરડા અભ્યારણ્ય વિસ્તાર તરફ મુક્ત કરવા માટે ટીમ રવાના થઈ રહી હતી, ત્યાં જ બીજી એક ચોંકાવનારી માહિતી મળી હતી. વાનાવડ ગામના અન્ય વિસ્તારમાં ફરી એકવાર વધુ એક મહાકાય મગર દેખાયો હોવાની જાણ થતાં રેસ્ક્યુ ટીમે તરત જ ત્યાં દોડી જઈ બીજું રેસ્ક્યુ ઓપરેશન હાથ ધર્યું હતું.
રાત્રિના અંધકારમાં અને જોખમી પરિસ્થિતિ વચ્ચે ટીમે ભારે મહેનત બાદ બીજા મગરને પણ સફળતાપૂર્વક કાબૂમાં લઈ સુરક્ષિત રીતે રેસ્ક્યુ કર્યો હતો. ત્યારબાદ બંને મગરોને વન વિભાગના નિયમો મુજબ તેમના કુદરતી રહેઠાણમાં સુરક્ષિત રીતે મુક્ત કરવામાં આવ્યા હતા. એક જ રાત્રિમાં બે મગરોનું સફળ રેસ્ક્યુ થતાં સ્થાનિકોમાં ટીમની કામગીરીને લઈને પ્રશંસા થઈ રહી છે.
ચોમાસાની ઋતુ દરમિયાન નદી, તળાવ અને જળાશયોમાં પાણી વધતાં મગરો માનવ વસાહત તરફ આવી જવાના બનાવો વધી રહ્યા છે. વન વિભાગે ગ્રામજનોને અપીલ કરી છે કે જો કોઈ પણ વિસ્તારમાં મગર અથવા અન્ય જંગલી પ્રાણી જોવા મળે તો તેને પકડવાનો પ્રયાસ ન કરવો, પરંતુ તાત્કાલિક વન વિભાગ અથવા અધિકૃત રેસ્ક્યુ ટીમને જાણ કરવી.
વાનાવડમાં એક જ રાત્રિમાં બે મહાકાય મગરોના સફળ રેસ્ક્યુથી સંભવિત મોટી દુર્ઘટના ટળી છે. સ્થાનિક એનિમલ લવર્સ, વાઇલ્ડલાઇફ રેસ્ક્યુ ટીમ અને ભાણવડ વન વિભાગની સમયસરની કામગીરીને કારણે ગ્રામજનોએ રાહતનો શ્વાસ લીધો છે અને તેમની કામગીરીને બિરદાવી છે.
