મારું શહેર શહેરા નગરપાલિકાના રોજમદાર સફાઈ કામદારોને મોટી રાહત: હવે દૈનિક ₹512 લઘુત્તમ વેતન મળશે, વર્ષોથી ચાલતો વેતનભેદ દૂર.
પંચમહાલ જિલ્લાના શહેરા નગરપાલિકામાં વર્ષોથી રોજમદાર તરીકે ફરજ બજાવતા સફાઈ કામદારો માટે રાહતના સમાચાર સામે આવ્યા છે. સરકારના શ્રમ આયુક્તના સુધારેલા નિયમો અનુસાર હવે નગરપાલિકામાં કાર્યરત તમામ રોજમદાર સફાઈ કામદારોને દૈનિક ₹512નું લઘુત્તમ વેતન ચૂકવવામાં આવશે. અત્યાર સુધી તેમને માત્ર ₹451 પ્રતિદિન ચૂકવવામાં આવતું હોવાથી દરરોજ ₹61નું ઓછું વેતન મળતું હતું. હવે આ વિસંગતિ દૂર થતાં કામદારોમાં આનંદ અને સંતોષની લાગણી જોવા મળી રહી છે.
આ સમગ્ર મુદ્દો ત્યારે પ્રકાશમાં આવ્યો જ્યારે સામાજિક એકતા જાગૃતિ મિશન દ્વારા શ્રમ આયુક્તના નવા પરિપત્રના આધારે શહેરા નગરપાલિકાના ચીફ ઓફિસરને લેખિત રજૂઆત કરવામાં આવી હતી. રજૂઆત સમયે મોટી સંખ્યામાં સફાઈ કામદારો પણ હાજર રહ્યા હતા અને પોતાના હક્કના લઘુત્તમ વેતનની માંગ ઉઠાવી હતી.
મળતી માહિતી મુજબ, સરકારના શ્રમ આયુક્ત દ્વારા બહાર પાડવામાં આવેલા નવા પરિપત્રમાં સફાઈ કામદારો માટે દૈનિક લઘુત્તમ વેતન ₹512 નક્કી કરવામાં આવ્યું છે. તેમ છતાં શહેરા નગરપાલિકામાં છેલ્લા કેટલાક વર્ષોથી રોજમદાર સફાઈ કામદારોને માત્ર ₹451 પ્રતિદિન ચૂકવવામાં આવતું હતું. આથી કામદારોને નિયમ મુજબ મળવાપાત્ર વેતન કરતાં દરરોજ ઓછું વેતન મળતું હોવાનો મુદ્દો સામે આવ્યો હતો.
આ બાબત સામાજિક એકતા જાગૃતિ મિશનના ધ્યાને આવતા સંગઠને તાત્કાલિક કાર્યવાહી હાથ ધરી હતી. સામાજિક એકતા જાગૃતિ મિશન અને અખિલ ભારતીય શ્રમિક સંઘ, ગુજરાત પ્રદેશના અધ્યક્ષ વિમલ સોલંકી પોતાની ટીમ તેમજ સફાઈ કામદારો સાથે શહેરા નગરપાલિકાની કચેરીએ પહોંચ્યા હતા. તેમણે ચીફ ઓફિસરને રૂબરૂ મળીને લેખિત આવેદનપત્ર સુપ્રત કર્યું હતું અને સરકારના નિયમો મુજબ કામદારોને લઘુત્તમ વેતન તાત્કાલિક અસરથી ચૂકવવાની માંગ કરી હતી.
રજૂઆત દરમિયાન સંગઠનના પ્રતિનિધિઓએ જણાવ્યું હતું કે શ્રમિકોને કાયદા મુજબનું લઘુત્તમ વેતન ચૂકવવું દરેક સરકારી અને સ્થાનિક સ્વરાજ્યની સંસ્થાની જવાબદારી છે. લાંબા સમયથી કામદારોને ઓછું વેતન ચૂકવાતું હોવાથી આર્થિક રીતે તેઓ મુશ્કેલીઓનો સામનો કરી રહ્યા હતા. તેથી આ અન્યાયને દૂર કરવો જરૂરી હતો.
નગરપાલિકાના ચીફ ઓફિસરે રજૂઆતને ગંભીરતાથી લઈ હકારાત્મક અભિગમ દાખવ્યો હતો. તેમણે લેખિત રજૂઆત સ્વીકારી અને ચાલુ મહિનાથી જ તમામ રોજમદાર સફાઈ કામદારોને સરકારના શ્રમ આયુક્તના નિયમો મુજબ દૈનિક ₹512નું લઘુત્તમ વેતન ચૂકવવાની સત્તાવાર ખાતરી આપી હતી.
આ નિર્ણય બાદ વર્ષોથી પોતાના હક્ક માટે રાહ જોઈ રહેલા સફાઈ કામદારોમાં ખુશીની લાગણી જોવા મળી હતી. કામદારોએ જણાવ્યું હતું કે વધેલા વેતનથી તેમના પરિવારના દૈનિક ખર્ચમાં રાહત મળશે અને જીવનનિર્વાહ વધુ સરળ બનશે.
સામાજિક એકતા જાગૃતિ મિશનના આગેવાનોએ જણાવ્યું હતું કે આ માત્ર વેતન વધારાનો મુદ્દો નથી, પરંતુ શ્રમિકોના કાયદેસર હક્કને અપાવવાનો પ્રયાસ છે. ભવિષ્યમાં પણ જ્યાં ક્યાં શ્રમિકોને તેમના અધિકારોથી વંચિત રાખવામાં આવશે ત્યાં સંગઠન તેમના હક્ક માટે લડત ચાલુ રાખશે.
ઉલ્લેખનીય છે કે શહેરા નગરપાલિકામાં વર્ષોથી રોજમદાર તરીકે સેવા આપતા સફાઈ કામદારોને નિયમ મુજબ કાયમી કર્મચારીનો દરજ્જો આપવામાં આવે તેવી માંગ પણ હવે વધુ જોરશોરથી ઉઠી શકે છે. લાંબા સમયથી સતત સેવા આપતા કર્મચારીઓને કાયમી કરવાની માંગ અંગે આગામી દિવસોમાં ચર્ચા તેજ બનવાની શક્યતા વ્યક્ત કરવામાં આવી રહી છે.
રોજમદાર સફાઈ કામદારોને સરકારના નિયમો મુજબનું લઘુત્તમ વેતન મળવાની શરૂઆત થતાં આ નિર્ણયને શ્રમિક હિતમાં મહત્વપૂર્ણ પગલું માનવામાં આવી રહ્યું છે.
રિપોર્ટર પ્રિતેશ દરજી પંચમહાલ
