ક્રાઇમ વલસાડમાં ACBનો ટ્રેપ સફળ: લીકર પરમીટ માટે રૂ.10 હજારની લાંચ લેતા નશાબંધી-આબકારી કચેરીના કર્મચારી ઝડપાયા
વલસાડ શહેરમાં લાંચિયા તત્વો સામે લાંચ રૂશ્વત વિરોધી બ્યુરો (ACB) દ્વારા વધુ એક સફળ ટ્રેપ હાથ ધરવામાં આવ્યો છે. વલસાડના આશિષ બિલ્ડિંગના ત્રીજા માળે આવેલી નશાબંધી અને આબકારી અધિક્ષકની કચેરીમાં લીકર પરમીટ કાઢી આપવાના બહાને રૂ.10 હજારની લાંચ સ્વીકારતા એક આરોપીને ACBની ટીમે રંગેહાથ ઝડપી પાડ્યો હતો. આ કાર્યવાહી બાદ સરકારી કચેરીમાં ભારે ચકચાર મચી ગઈ હતી.
પ્રાપ્ત વિગતો મુજબ ACBને વિશ્વસનીય માહિતી મળી હતી કે નશાબંધી અને આબકારી અધિક્ષકની કચેરીમાં ફરજ બજાવતા અધિકારી-કર્મચારીઓ લીકર પરમીટ મંજૂર કરાવવા માટે અરજદારો પાસેથી રૂ.5 હજારથી રૂ.10 હજાર સુધીની લાંચની માંગણી કરી રહ્યા છે. ફરિયાદની ગંભીરતાને ધ્યાનમાં રાખીને ACB દ્વારા સમગ્ર મામલાની ખરાઈ કરવા માટે ડિકોય ટ્રેપ ગોઠવવાનો નિર્ણય લેવામાં આવ્યો હતો.
પૂર્વ આયોજન મુજબ ACBની ટીમે સહકાર આપનાર વ્યક્તિ મારફતે લીકર પરમીટ માટે અરજી કરાવી હતી. ત્યારબાદ આરોપીએ પરમીટ કાઢી આપવાના બદલામાં અરજદાર સાથે હેતુલક્ષી વાતચીત કરીને રૂ.10 હજારની લાંચની સ્પષ્ટ માંગણી કરી હતી. નક્કી કરાયેલા સ્થળે આરોપીએ લાંચની રકમ સ્વીકારતા જ અગાઉથી સતર્ક ACBની ટીમે તેને રંગેહાથ ઝડપી પાડ્યો હતો.
આ સમગ્ર ટ્રેપ દરમિયાન જરૂરી કાયદાકીય પ્રક્રિયાનું પાલન કરવામાં આવ્યું હતું. લાંચ સ્વીકારવાની ઘટના અંગે જરૂરી પુરાવા એકત્ર કરવામાં આવ્યા હતા અને આરોપી વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધવાની કાર્યવાહી હાથ ધરવામાં આવી છે. ACB દ્વારા આરોપીની વધુ પૂછપરછ કરવામાં આવી રહી છે તેમજ આ કૌભાંડમાં અન્ય કોઈ અધિકારી અથવા કર્મચારીની સંડોવણી છે કે નહીં તે દિશામાં પણ તપાસ શરૂ કરવામાં આવી છે.
આ સફળ ટ્રેપનું સંચાલન પોલીસ ઇન્સ્પેક્ટર જે.આર. ગામીત, વલસાડ અને ડાંગ ACB પોલીસ સ્ટેશન તથા તેમની ટીમ દ્વારા કરવામાં આવ્યું હતું. સમગ્ર કામગીરીનું સુપરવિઝન મદદનીશ નિયામક આર.આર. ચૌધરી (ACB, સુરત એકમ) દ્વારા કરવામાં આવ્યું હતું, જ્યારે કાર્યવાહીનું માર્ગદર્શન નાયબ નિયામક બળદેવ દેસાઈ (IPS), લાંચ રૂશ્વત વિરોધી બ્યુરો, વડોદરા દ્વારા આપવામાં આવ્યું હતું.
ACBએ ફરી એકવાર નાગરિકોને અપીલ કરી છે કે કોઈપણ સરકારી અધિકારી કે કર્મચારી કાયદેસરની કામગીરી માટે લાંચની માંગણી કરે તો તે અંગે તાત્કાલિક લાંચ રૂશ્વત વિરોધી બ્યુરોનો સંપર્ક કરવો. ફરિયાદીની ઓળખ સંપૂર્ણપણે ગુપ્ત રાખવામાં આવે છે અને કાયદેસરની કાર્યવાહી દ્વારા આવા ભ્રષ્ટાચાર સામે કડક પગલાં લેવામાં આવે છે.
આ કાર્યવાહી સરકારી તંત્રમાં પારદર્શિતા અને જવાબદારી સુનિશ્ચિત કરવા માટે મહત્વપૂર્ણ માનવામાં આવી રહી છે. ACBએ સ્પષ્ટ કર્યું છે કે રાજ્યમાં ભ્રષ્ટાચાર સામે ઝીરો ટોલરન્સની નીતિ હેઠળ આવી કાર્યવાહી સતત ચાલુ રહેશે અને લાંચ લેતા કોઈપણ અધિકારી કે કર્મચારીને કાયદાની જાળમાંથી બચવા દેવામાં આવશે નહીં.
