મારું શહેર ભાણવડના ઘુમલી વિસ્તારમાંથી દેશી બનાવટની જામગરી બંદૂક સાથે યુવક ઝડપાયો.
ભાણવડ: દેવભૂમિ દ્વારકા જિલ્લાના ભાણવડ તાલુકાના ઘુમલી બીડી વિસ્તારમાંથી એસ.ઓ.જી. (સ્પેશિયલ ઓપરેશન ગ્રુપ)ની ટીમે એક યુવકને દેશી હાથ બનાવટની જામગરી બંદૂક સાથે ઝડપી પાડ્યો છે. આરોપી પાસેથી ગેરકાયદેસર હથિયાર કબજે કરીને તેની સામે કાયદેસરની કાર્યવાહી હાથ ધરવામાં આવી છે.
પોલીસ દ્વારા આપવામાં આવેલી માહિતી મુજબ, ઝડપાયેલા આરોપીની ઓળખ અશોકભાઈ ઉર્ફે શામળો રાયદેભાઈ ગીગાભાઈ સોલંકી (ઉંમર 23 વર્ષ) તરીકે થઈ છે. તે ભાણવડ તાલુકાના ટીંબડી, સામાકાંઠે વિસ્તારનો રહેવાસી છે.
એસ.ઓ.જી.ની ટીમે ચોક્કસ બાતમીના આધારે કાર્યવાહી કરીને આરોપીને ઝડપી પાડ્યો હતો. તેની પાસેથી દેશી હાથ બનાવટની ઉપરથી ભરવાની જામગરી બંદૂક મળી આવી હતી, જેની અંદાજિત કિંમત રૂ.1,500 હોવાનું પોલીસે જણાવ્યું છે.
આરોપી પાસેથી કબજે કરાયેલા ગેરકાયદેસર હથિયારને જપ્ત કરી તેની સામે આર્મ્સ એક્ટ હેઠળ ગુનો નોંધવાની કાર્યવાહી હાથ ધરવામાં આવી છે. પોલીસે હથિયાર ક્યાંથી મેળવવામાં આવ્યું હતું અને તેનો ઉપયોગ કયા હેતુ માટે થવાનો હતો તે અંગે વધુ તપાસ શરૂ કરી છે.
