સબરસ અમેરિકન રાજદૂત સર્જિયો ગોરની કાશ્મીર મુલાકાત, ઓમર અબ્દુલ્લા સાથે મુલાકાત

કલમ 370 બાદ અમેરિકન રાજદૂતની પહેલી હાઈ-પ્રોફાઇલ કાશ્મીર મુલાકાત; શ્રીનગર બાદ લદાખની પણ મુલાકાત લેશે

શ્રીનગર: જમ્મુ-કાશ્મીરમાંથી કલમ 370 નાબૂદ થયા બાદ અને પહેલગામ હુમલા પછી અમેરિકાના રાજદૂત સર્જિયો ગોરે પહેલીવાર કાશ્મીરની મુલાકાત લીધી છે. શ્રીનગર પહોંચેલા અમેરિકન રાજદૂતે જમ્મુ-કાશ્મીરના મુખ્યમંત્રી ઓમર અબ્દુલ્લા સાથે પણ મુલાકાત કરી હતી.

શ્રીનગર પહોંચ્યા બાદ સર્જિયો ગોરે કાશ્મીરની સુંદરતાની પ્રશંસા કરતાં કહ્યું કે અહીં આવીને તેમને ખૂબ આનંદ થયો. તેમણે કાશ્મીરને ભારતનો અત્યંત મહત્ત્વનો ભાગ ગણાવ્યો અને જણાવ્યું કે તેઓ પહેલીવાર અહીં આવ્યા છે.

ઓમર અબ્દુલ્લા સાથે બેઠક

અમેરિકન રાજદૂત અને મુખ્યમંત્રી ઓમર અબ્દુલ્લા વચ્ચેની મુલાકાતને ખાસ મહત્વ આપવામાં આવી રહ્યું છે. જોકે, ઓમર અબ્દુલ્લાએ આ મુલાકાતને લઈને કોઈ મોટી અપેક્ષા ન રાખવા સ્પષ્ટ કર્યું છે.

તેમણે જણાવ્યું કે અમેરિકન રાજદૂત સમક્ષ કાશ્મીરના મુદ્દે કોઈ રજૂઆત કે ફરિયાદ કરવામાં આવશે નહીં. કાશ્મીરની સમસ્યાઓનો ઉકેલ અમેરિકા નહીં પરંતુ કેન્દ્ર સરકાર જ લાવશે. તેમણે એમ પણ કહ્યું કે રાજદૂત સમક્ષ ફરિયાદો કરવાને બદલે તેમની વાત સાંભળવાનું તેઓ વધુ પસંદ કરશે.

15 વર્ષ બાદ અમેરિકન એમ્બેસેડરની મુખ્યમંત્રી સાથે મુલાકાત

આ મુલાકાતને ઐતિહાસિક ગણાવવાનું એક કારણ એ પણ છે કે, આપવામાં આવેલી માહિતી મુજબ, લગભગ 15 વર્ષ બાદ કોઈ હોદ્દા પર રહેલા અમેરિકન એમ્બેસેડરે જમ્મુ-કાશ્મીરના મુખ્યમંત્રી સાથે મુલાકાત કરી છે. આ પહેલાં 2011માં તત્કાલીન અમેરિકન એમ્બેસેડર ટિમોથી રોમરે ઓમર અબ્દુલ્લા સાથે મુલાકાત કરી હતી.

વર્ષ 2018માં મહેબૂબા મુફ્તી સરકારના પતન બાદ કોઈ અમેરિકન પ્રતિનિધિની આ પ્રકારની સ્વતંત્ર કાશ્મીર મુલાકાત હોવાનું પણ જણાવાયું છે.

ગોરની લદાખ મુલાકાત પણ મહત્વપૂર્ણ

શ્રીનગરની મુલાકાત બાદ સર્જિયો ગોર લદાખની મુલાકાતે જવાના છે. વર્ષ 2020માં ગલવાન ખીણમાં ભારત અને ચીનના સૈનિકો વચ્ચે થયેલી હિંસક અથડામણ અને ત્યારબાદના સરહદી તણાવ પછી કોઈ અમેરિકન એમ્બેસેડરની લદાખની આ પ્રથમ મુલાકાત હશે.

જમ્મુ-કાશ્મીરનો વિશેષ દરજ્જો રદ કરીને તેને જમ્મુ-કાશ્મીર અને લદાખ એમ બે કેન્દ્રશાસિત પ્રદેશોમાં વહેંચવામાં આવ્યા બાદ આ હાઈ-પ્રોફાઇલ અમેરિકન મુલાકાતનું વ્યૂહાત્મક મહત્વ પણ વધી જાય છે.

આતંકવાદ વિરોધી મુદ્દે પણ ચર્ચા

આ મુલાકાત પહેલાં અમેરિકન રાજદૂત સર્જિયો ગોરે કેન્દ્રીય ગૃહમંત્રી અમિત શાહ સાથે આતંકવાદ વિરોધી મુદ્દાઓ અંગે ચર્ચા કરી હતી. કાશ્મીર પ્રવાસ દરમિયાન પાકિસ્તાન તરફથી થતી ઘૂસણખોરી અને સુરક્ષા સંબંધિત પડકારોની વચ્ચે અમેરિકન રાજદૂતનું ભારતના આ મહત્વપૂર્ણ પ્રદેશ અંગેનું સકારાત્મક નિવેદન પણ ચર્ચામાં આવ્યું છે.

બીજી તરફ, પાકિસ્તાન ઓક્યુપાઇડ કાશ્મીર (PoK)માં પાકિસ્તાની સેનાના અત્યાચાર સામે સ્થાનિક વિરોધના અહેવાલો વચ્ચે ગોરની આ મુલાકાત થઈ રહી છે, જેના કારણે સમગ્ર પ્રવાસને વ્યૂહાત્મક અને રાજદ્વારી દૃષ્ટિએ મહત્વપૂર્ણ માનવામાં આવી રહ્યો છે.