સબરસ ગુજરાતીઓએ રૂ. 23,381 કરોડનું સોનું ગિરવે મૂક્યું, પર્સનલ લોન કરતાં ગોલ્ડ લોન પ્રથમ પસંદ.

ગુજરાતમાં ગોલ્ડ લોનનો ટ્રેન્ડ સતત વધી રહ્યો છે. તાજેતરના નાણાકીય આંકડાઓ મુજબ રાજ્યના નાગરિકોએ વિવિધ બેંકો અને નોન-બેંકિંગ ફાઇનાન્સ કંપનીઓ (NBFC) પાસેથી અંદાજે રૂ. 23,381 કરોડની ગોલ્ડ લોન મેળવી છે. વેપાર-ધંધામાં રોકડની જરૂરિયાત, મોંઘવારી, તબીબી ખર્ચ અને બાળકોના શિક્ષણ જેવા ખર્ચને પહોંચી વળવા માટે મોટી સંખ્યામાં લોકો સોનું ગિરવે મૂકીને લોન લેવાનું પસંદ કરી રહ્યા છે.

સરળ પ્રક્રિયા અને સોનાના ઊંચા ભાવથી ગોલ્ડ લોનમાં વધારો

ગોલ્ડ લોન મેળવવાની પ્રક્રિયા અન્ય લોનની સરખામણીએ સરળ અને ઝડપી હોવાથી લોકો માટે આ વિકલ્પ વધુ અનુકૂળ બન્યો છે. ઓછા દસ્તાવેજો, ઝડપી મંજૂરી અને સોનાના વધતા ભાવને કારણે ગ્રાહકોને અગાઉ કરતાં વધુ લોનની રકમ મળી રહી છે. સરકારી તથા ખાનગી બેંકો ઉપરાંત વિવિધ NBFC કંપનીઓ પણ આકર્ષક વ્યાજદરે ગોલ્ડ લોન ઉપલબ્ધ કરાવી રહી છે.

નાણાકીય ક્ષેત્રના આંકડાઓ મુજબ, ગત વર્ષની સરખામણીએ ચાલુ વર્ષે ગોલ્ડ લોનના ધિરાણમાં નોંધપાત્ર વધારો થયો છે. સાથે જ ગોલ્ડ લોનમાં ડિફોલ્ટના કેસોમાં પણ ઘટાડો નોંધાયો હોવાનું જાણવા મળ્યું છે.

કટોકટીમાં સૌથી વિશ્વસનીય નાણાકીય વિકલ્પ

એક સમય એવો હતો જ્યારે સોનું ગિરવે મૂકવું સામાજિક રીતે અયોગ્ય માનવામાં આવતું હતું. પરંતુ હવે બદલાતા સમય સાથે લોકો સોનાને માત્ર આભૂષણ નહીં, પરંતુ જરૂરિયાતના સમયે તાત્કાલિક નાણાકીય સહારો આપતી મૂડી તરીકે જોતા થયા છે.

પર્સનલ અને વ્હિકલ લોન કરતાં ગોલ્ડ લોન આગળ

રાજ્યમાં લોનના વિવિધ વિકલ્પોમાં ગોલ્ડ લોન પ્રથમ પસંદગી બની છે. તેના પછી પર્સનલ લોન અને વ્હિકલ લોનનો ક્રમ આવે છે. આ આંકડાઓ દર્શાવે છે કે આર્થિક કટોકટી કે તાત્કાલિક જરૂરિયાતના સમયે ગુજરાતીઓ માટે સોનું સૌથી ઝડપી અને વિશ્વસનીય નાણાકીય આધાર તરીકે ઉભરી આવ્યું છે.