સબરસ હોર્મુઝમાં ફરી તણાવ: ઈરાનનો 3 ઓઇલ ટેન્કરોને રોક્યાનો દાવો, વૈશ્વિક તેલ પુરવઠા પર ચિંતાના વાદળ.

મધ્ય પૂર્વમાં અમેરિકા અને ઈરાન વચ્ચેનો તણાવ ફરી એકવાર વધતો જોવા મળી રહ્યો છે. બુધવારે સવારે સામે આવેલા અહેવાલો મુજબ, ઈરાને હોર્મુઝ સ્ટ્રેટમાં ત્રણ ઓઇલ ટેન્કરોને ઘેરીને અટકાવ્યાનો દાવો કર્યો છે. ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)ના જણાવ્યા અનુસાર, આ ટેન્કરોએ અગાઉ આપવામાં આવેલી ચેતવણીને અવગણી હતી, જેના પગલે કાર્યવાહી કરવામાં આવી હોવાનું ઈરાનના સરકારી મીડિયાએ જણાવ્યું છે.

હોર્મુઝને લઈને ઈરાનની કડક ચેતવણી

ઈરાને વિશ્વભરના દેશો અને આંતરરાષ્ટ્રીય શિપિંગ કંપનીઓને અગાઉથી જ ચેતવણી આપી હતી કે જો અમેરિકા દ્વારા જપ્ત કરવામાં આવેલી ઈરાનની સંપત્તિનો ઉપયોગ કોઈપણ દેશ કે કંપની કરશે, તો તેના જહાજોને હોર્મુઝ સ્ટ્રેટમાંથી પસાર થવા દેવામાં નહીં આવે. હવે ત્રણ ઓઇલ ટેન્કરોને રોક્યાનો દાવો આ ચેતવણી બાદ સામે આવ્યો છે.

ટ્રમ્પના નિર્ણયથી વધ્યો વિવાદ

અહેવાલો મુજબ, અમેરિકાના પ્રમુખ ડોનાલ્ડ ટ્રમ્પે તાજેતરમાં જાહેરાત કરી હતી કે ઈરાન સાથેના સંઘર્ષ દરમિયાન નુકસાન પામેલા જહાજોને અમેરિકા દ્વારા જપ્ત કરાયેલી ઈરાનની સંપત્તિમાંથી વળતર આપવામાં આવશે. આ નિર્ણય સામે ઈરાને કડક વિરોધ વ્યક્ત કર્યો છે અને તેને ગેરકાયદેસર ગણાવ્યો છે.

ઈરાની સૈન્યની ચેતવણી

ઈરાની સૈન્ય કમાન્ડના પ્રવક્તા ઈબ્રાહિમ ઝુલ્ફિકારીએ જણાવ્યું કે અમેરિકા અથવા અન્ય કોઈ દેશ ઈરાનની જપ્ત કરાયેલી સંપત્તિનો ઉપયોગ કરશે તો તેના જહાજોને હોર્મુઝના મહત્ત્વના દરિયાઈ માર્ગમાંથી પસાર થવા દેવામાં નહીં આવે. તેમણે આવા પગલાંના "ગંભીર પરિણામો"ની પણ ચેતવણી આપી છે.

વૈશ્વિક બજારોમાં ચિંતા

હોર્મુઝ સ્ટ્રેટ વિશ્વના સૌથી વ્યસ્ત ઓઇલ ટ્રાન્સપોર્ટ માર્ગોમાંનો એક છે. અહીં કોઈપણ પ્રકારનો તણાવ વધે તો વૈશ્વિક કાચા તેલના પુરવઠા, શિપિંગ અને આંતરરાષ્ટ્રીય વેપાર પર તેની સીધી અસર થઈ શકે છે. તેથી આ ઘટનાને વિશ્વભરના દેશો નજીકથી નિહાળી રહ્યા છે.