મારું શહેર કેશોદમાં ઘરફોડ અને બાઇક ચોરીનો ગુનો ગણતરીના કલાકોમાં ડિટેક્ટ, ચાર આરોપી મુદ્દામાલ સાથે ઝડપાયા.
કેશોદ: જૂનાગઢ જિલ્લાના કેશોદ શહેરમાં યોગેશ્વરધામ સોસાયટી વિસ્તારમાં થયેલી ઘરફોડ ચોરી અને બે બાઇક ચોરીની ઘટનાનો કેશોદ પોલીસે ગણતરીના કલાકોમાં ભેદ ઉકેલી ચાર આરોપીઓને ઝડપી પાડ્યા છે. પોલીસે ચોરીમાં ગયેલો 100 ટકા મુદ્દામાલ પણ કબજે કરીને ઝડપી અને અસરકારક કામગીરીનું ઉદાહરણ પૂરું પાડ્યું છે.
પોલીસ ફરિયાદ મુજબ, યોગેશ્વરધામ વિસ્તારમાં આવેલી દુકાનમાં અજાણ્યા શખ્સોએ રાત્રિના સમયે તાળા તોડી ગેરકાયદે પ્રવેશ કર્યો હતો. ચોરોએ દુકાનમાંથી રોકડા રૂપિયા 12 હજારની ચોરી કરી હતી. ઉપરાંત નજીકમાં પાર્ક કરેલી બે મોટરસાયકલની પણ ચોરી કરીને કુલ રૂ.57 હજારના મુદ્દામાલની ચોરી આચરી હતી. આ અંગે કેશોદ પોલીસ સ્ટેશનમાં ભારતીય ન્યાય સંહિતાની સંબંધિત કલમો હેઠળ ગુનો નોંધાયો હતો.
જૂનાગઢ રેન્જના પોલીસ મહાનિરીક્ષક રાજેન્દ્રસિંહ ચુડાસમા, જિલ્લા પોલીસ અધિક્ષક સબોપ ઓડેદરા તથા ઇન્ચાર્જ નાયબ પોલીસ અધિક્ષક હિતેષ ઘાંધલ્યાના માર્ગદર્શન હેઠળ કેશોદ પોલીસની વિવિધ ટીમોએ તપાસ શરૂ કરી હતી. ટેકનિકલ સર્વેલન્સ, ખાનગી બાતમી અને નૈત્રમ શાખાની મદદથી પોલીસે આરોપીઓ સુધી પહોંચવામાં સફળતા મેળવી હતી.
તપાસ દરમિયાન માહિતી મળી હતી કે ચોરીમાં સંડોવાયેલા આરોપીઓ જુનાગઢના ભવનાથ વિસ્તારમાં ચોરીના મુદ્દામાલ સાથે હાજર છે અને બહારગામ ભાગવાની તૈયારીમાં છે. જેના આધારે પોલીસે તાત્કાલિક દરોડો પાડી ચારેય આરોપીઓને ઝડપી પાડ્યા હતા. પૂછપરછ દરમિયાન આરોપીઓએ કેશોદમાં થયેલી ચોરી અને બાઇક ચોરીની ઘટનામાં સંડોવણી કબૂલી હોવાનું પોલીસે જણાવ્યું છે.
ઝડપાયેલા આરોપીઓમાં મધ્યપ્રદેશના અલીરાજપુર અને ધાર જિલ્લાના રહેવાસી થાવરિયા બહાદુરસિંગ બગેલ (31), રજન બાવલિયા મિનાવા (23), મોહન ભિતિયા અલાવા (30) અને મુકેશ મંગુસિંગ બગેલ (23)નો સમાવેશ થાય છે. તમામ આરોપીઓ મજૂરીકામ કરતા હોવાનું પોલીસ તપાસમાં સામે આવ્યું છે.
પોલીસે આરોપીઓ પાસેથી બે ચોરાયેલી મોટરસાયકલ, રોકડા રૂ.12 હજાર અને એક મોબાઇલ ફોન સહિત કુલ રૂ.62 હજારનો મુદ્દામાલ કબજે કર્યો છે. આ કાર્યવાહી પોલીસ ઇન્સ્પેક્ટર એમ.ડી. ચૌધરી, પી.એસ.આઈ. એમ.ડી. મકવાણા સહિત કેશોદ પોલીસ સ્ટાફ અને નૈત્રમ શાખાની સંયુક્ત ટીમ દ્વારા સફળતાપૂર્વક પાર પાડવામાં આવી હતી. આરોપીઓ સામે કાયદેસરની કાર્યવાહી હાથ ધરી વધુ તપાસ ચાલુ છે.
