મારું શહેર જામજોધપુરમાં વન વિભાગની કાર્યવાહી: સસલાનો શિકાર કરવાનો પ્રયાસ કરતો શિકારી ઝડપાયો.
જામનગર જિલ્લાના જામજોધપુર ક્ષેત્રિય રેન્જ વન વિભાગે વન્યજીવોના સંરક્ષણ માટે મહત્વની કાર્યવાહી હાથ ધરી સસલાનો શિકાર કરવાનો પ્રયાસ કરનાર એક આરોપીને ઝડપી પાડ્યો છે. વન વિભાગની સતર્કતા અને રાત્રિ પેટ્રોલિંગ દરમિયાન મળેલી બાતમીના આધારે આ કાર્યવાહી કરવામાં આવી હતી.
નાયબ વન સંરક્ષક, વન વિભાગ જામનગરની સૂચના તેમજ મદદનીશ વન સંરક્ષકના સીધા માર્ગદર્શન હેઠળ જામજોધપુર ક્ષેત્રિય રેન્જના રેન્જ ફોરેસ્ટ ઓફિસર એમ. આર. માલમના નેતૃત્વમાં ટીમ દ્વારા કામગીરી હાથ ધરવામાં આવી હતી. આ કામગીરીમાં સીદસર રાઉન્ડના ફોરેસ્ટર એમ. કે. કરમુર, સીદસર ફોરેસ્ટ સ્ટાફ તેમજ ગીંગણી બીટના વનરક્ષક આર. એલ. બડીયા સહિત જામજોધપુર રેન્જનો સ્ટાફ જોડાયો હતો.
વન વિભાગની ટીમ સીદસર રાઉન્ડ હેઠળના બુટાવદર અને માલવડા જંગલ વિસ્તારમાં રાત્રિ પેટ્રોલિંગ કરી રહી હતી. દરમિયાન ખાનગી રાહેબાતમીના આધારે ટીમે તાત્કાલિક સ્થળ પર પહોંચી કાર્યવાહી હાથ ધરી હતી. તપાસ દરમિયાન વન્યપ્રાણી સસલાનો શિકાર કરવાનો પ્રયાસ કરનાર આરોપી રાયધન છગન ધખાણીયાને ઝડપી પાડવામાં આવ્યો હતો.
આરોપીની અટકાયત બાદ વન વિભાગ દ્વારા તેની સામે વન્યજીવ (સંરક્ષણ) અધિનિયમ હેઠળ કાયદેસરની કાર્યવાહી હાથ ધરવામાં આવી છે. સમગ્ર મામલે વધુ તપાસ ચાલી રહી છે અને શિકાર માટે ઉપયોગમાં લેવાયેલા સાધનો તેમજ અન્ય સંડોવણી અંગે પણ તપાસ કરવામાં આવી રહી હોવાનું વન વિભાગના સૂત્રોએ જણાવ્યું હતું.
વન વિભાગે નાગરિકોને અપીલ કરી છે કે વન્યજીવોના શિકાર, ગેરકાયદેસર પ્રવૃત્તિઓ અથવા જંગલ વિસ્તારમાં કોઈપણ શંકાસ્પદ હિલચાલ અંગે તાત્કાલિક વન વિભાગને જાણ કરે. વન્યજીવોનું સંરક્ષણ દરેક નાગરિકની સામૂહિક જવાબદારી છે અને આવા ગુનાઓ સામે કડક કાનૂની કાર્યવાહી કરવામાં આવશે.
