સબરસ ઉત્તર પ્રદેશના કૌશાંબીમાં ફટાકડા ફેક્ટરીમાં પ્રચંડ વિસ્ફોટ: 7નાં મોત, અનેક ઇજાગ્રસ્ત.
ઉત્તર પ્રદેશના કૌશાંબી જિલ્લામાં ફટાકડાની ફેક્ટરીમાં થયેલા પ્રચંડ વિસ્ફોટે ભારે જાનહાનિ સર્જી છે. પ્રાથમિક માહિતી મુજબ, આ દુર્ઘટનામાં 7 લોકોના મોત થયા છે, જ્યારે અનેક લોકો ઇજાગ્રસ્ત થયા છે.
ઇજાગ્રસ્તોને તાત્કાલિક સારવાર માટે પ્રયાગરાજની SRN હોસ્પિટલના ટ્રોમા સેન્ટરમાં ખસેડવામાં આવ્યા છે. ગંભીર રીતે દાઝેલી એક મહિલાની સારવાર ચાલી રહી છે.
પ્રત્યક્ષદર્શીઓના જણાવ્યા મુજબ, વિસ્ફોટ એટલો જોરદાર હતો કે તેનો અવાજ લગભગ 2 કિલોમીટર સુધી સંભળાયો હતો, જેના કારણે આસપાસના વિસ્તારમાં ભયનો માહોલ સર્જાયો હતો.
ઘટનાની જાણ થતાં પોલીસ, ફાયર બ્રિગેડ અને અન્ય બચાવ એજન્સીઓ તાત્કાલિક સ્થળ પર પહોંચી હતી. ફાયર વિભાગની ટીમો આગ પર કાબૂ મેળવવા અને બચાવ કામગીરીમાં વ્યસ્ત છે.
પ્રાથમિક તબક્કે વિસ્ફોટનું ચોક્કસ કારણ સામે આવ્યું નથી. સમગ્ર ઘટનાની તપાસ પોલીસ અને સંબંધિત તપાસ એજન્સીઓ દ્વારા હાથ ધરવામાં આવી છે.
