સબરસ ખાનગી કર્મચારીઓ માટે મોટી રાહતની તૈયારી, EPFOની PF મર્યાદા રૂ.15 હજારથી વધારી રૂ.25 હજાર કરવાની મંજૂરી.

ખાનગી ક્ષેત્રમાં નોકરી કરતા કર્મચારીઓ માટે પ્રોવિડન્ટ ફંડ અને પેન્શન કવરેજને લઈને મહત્વપૂર્ણ નિર્ણય સામે આવ્યો છે. કર્મચારી ભવિષ્ય નિધિ સંગઠન (EPFO) હેઠળ અનિવાર્ય રિટાયરમેન્ટ ફંડની મર્યાદા વધારવાની પ્રક્રિયા આગળ વધી રહી છે. નાણાં મંત્રાલયે EPFOની પગાર મર્યાદા રૂ.15,000 પ્રતિ માસથી વધારીને રૂ.25,000 પ્રતિ માસ કરવાની દરખાસ્તને મંજૂરી આપી દીધી છે. જો આ નિર્ણયને કેબિનેટની મંજૂરી મળી જશે તો મોટી સંખ્યામાં ખાનગી કર્મચારીઓ પીએફ અને પેન્શન યોજનાના વ્યાપમાં આવી જશે.

હાલના નિયમ મુજબ જે કર્મચારીઓનો મૂળ પગાર (બેઝિક સેલેરી) રૂ.15,000 પ્રતિ માસ સુધીનો હોય છે, તેઓ માટે એમ્પ્લોઈ પ્રોવિડન્ટ ફંડ (EPF) અને એમ્પ્લોઈ પેન્શન સ્કીમ (EPS) હેઠળ જોડાવું ફરજિયાત છે. પરંતુ રૂ.15,000થી વધુ પગાર ધરાવતા ઘણા કર્મચારીઓ આ અનિવાર્ય કવરેજની બહાર રહી જાય છે. નવી મર્યાદા રૂ.25,000 થશે તો રૂ.15 હજારથી રૂ.25 હજાર સુધીનો પગાર મેળવનારા લાખો કર્મચારીઓને પણ સામાજિક સુરક્ષાનો લાભ મળી શકશે.

નાણાં મંત્રાલય દ્વારા આ પ્રસ્તાવને મંજૂરી મળ્યા બાદ હવે આગળની પ્રક્રિયા કેબિનેટની મંજૂરી પર આધારિત રહેશે. સૂત્રોના જણાવ્યા મુજબ, શરૂઆતમાં પગાર મર્યાદા વધારીને રૂ.30,000 કરવાની પણ વિચારણા કરવામાં આવી હતી, પરંતુ અંતે રૂ.25,000ની મર્યાદાને મંજૂરી આપવામાં આવી છે. કેબિનેટની મંજૂરી બાદ સરકાર નવી મર્યાદા ક્યારથી અમલમાં આવશે તેની સત્તાવાર જાહેરાત કરશે.

નવો નિયમ લાગુ કરવામાં આવે તે પહેલાં કંપનીઓને તૈયારી માટે સમય આપવામાં આવે તેવી શક્યતા છે. કારણ કે નવી મર્યાદા અમલમાં આવતા કંપનીઓને પોતાની પેરોલ સિસ્ટમ, કર્મચારી રેકોર્ડ, યોગદાનની ગણતરી અને અન્ય કાયદાકીય પ્રક્રિયામાં ફેરફાર કરવા પડશે. તેથી સરકાર તરફથી નિયોક્તાઓને ટ્રાન્ઝિશન પીરિયડ આપવામાં આવી શકે છે, જેથી અમલીકરણ સરળતાથી થઈ શકે.

રિપોર્ટ મુજબ નવી EPFO પગાર મર્યાદા 1 એપ્રિલ 2027થી લાગુ થવાની સંભાવના વ્યક્ત કરવામાં આવી રહી છે. જોકે અંતિમ નિર્ણય કેબિનેટની મંજૂરી અને કંપનીઓની તૈયારીને ધ્યાનમાં રાખીને લેવામાં આવશે. નોંધનીય છે કે EPFOની પગાર મર્યાદામાં છેલ્લો ફેરફાર સપ્ટેમ્બર 2014માં થયો હતો, જ્યારે મર્યાદા રૂ.6,500થી વધારીને રૂ.15,000 કરવામાં આવી હતી.

પગાર મર્યાદામાં વધારો થવાથી કર્મચારીઓને ભવિષ્ય માટે વધુ સુરક્ષા મળશે, પરંતુ સરકાર પર નાણાકીય ભાર પણ વધી શકે છે. કર્મચારીના પીએફ અને પેન્શન ફંડમાં કર્મચારી અને કંપની ઉપરાંત સરકારનું પણ યોગદાન હોય છે. કર્મચારી પેન્શન યોજના (EPS) હેઠળ નિયોક્તા દ્વારા બેઝિક પગારના 8.33 ટકા અને કેન્દ્ર સરકાર દ્વારા 1.16 ટકા યોગદાન આપવામાં આવે છે. આ કારણે સરકારના ખર્ચમાં પણ વધારો થવાની શક્યતા છે.

હાલ EPFOના આ નિયમો મુખ્યત્વે એવી કંપનીઓને લાગુ પડે છે જ્યાં 20 કે તેથી વધુ કર્મચારીઓ કાર્યરત હોય. નાની સંસ્થાઓ પોતાની ઇચ્છાથી EPFO સાથે જોડાઈ શકે છે, પરંતુ તેમના માટે તે ફરજિયાત નથી. નવી મર્યાદા લાગુ થયા બાદ સંગઠિત ખાનગી ક્ષેત્રના વધુ કર્મચારીઓને નિવૃત્તિ પછીની આર્થિક સુરક્ષા મળશે. કેન્દ્ર સરકારના કર્મચારીઓ માટે અલગ પેન્શન વ્યવસ્થા હોવાથી આ નિયમો તેમના પર લાગુ થતા નથી. આ નિર્ણય ખાનગી ક્ષેત્રના કર્મચારીઓ માટે લાંબા ગાળાની સામાજિક સુરક્ષા મજબૂત કરનાર મહત્વપૂર્ણ પગલું બની શકે છે.