મારું શહેર અમદાવાદના ‘નોરતા નગરી’ ગરબા મહોત્સવમાં કરોડોનું ટિકિટ કૌભાંડ! 8થી 10 કરોડની છેતરપિંડીના આક્ષેપ સાથે ચાર સામે ફરિયાદ.
અમદાવાદમાં વર્ષ 2025 દરમિયાન યોજાયેલા લોકપ્રિય ‘નોરતા નગરી’ ગરબા મહોત્સવને લઈને હવે એક મોટું નાણાકીય કૌભાંડ સામે આવ્યું છે. શહેરના સરખેજ પોલીસ સ્ટેશનમાં નોંધાયેલી ફરિયાદ મુજબ ગરબા મહોત્સવના આયોજન સાથે જોડાયેલા કેટલાક ભાગીદારોએ સ્પોન્સર્સ અને ખાસ મહેમાનો માટે રાખવામાં આવેલી કમ્પ્લિમેન્ટરી ટિકિટોને ગેરકાયદેસર રીતે પેઇડ ટિકિટોમાં ફેરવી ઓનલાઈન અને ઓફલાઈન વેચી દીધી હોવાનો ગંભીર આરોપ છે. આ સમગ્ર ગેરરીતિના કારણે અન્ય ભાગીદારોને અંદાજે 8થી 10 કરોડ રૂપિયાનું આર્થિક નુકસાન થયું હોવાનું ફરિયાદમાં જણાવાયું છે. કરોડો રૂપિયાના આ કથિત ટિકિટ કૌભાંડને લઈને ઇવેન્ટ મેનેજમેન્ટ ક્ષેત્રમાં પણ ભારે ચર્ચા શરૂ થઈ છે અને હવે સમગ્ર મામલો પોલીસ તપાસ હેઠળ છે.
આ મામલે ઇવેન્ટ મેનેજમેન્ટ સાથે સંકળાયેલા 36 વર્ષીય અર્જુન ભૂતિયા દ્વારા સરખેજ પોલીસમાં ફરિયાદ નોંધાવવામાં આવી છે. ફરિયાદના આધારે પોલીસે દર્શાન શાહ, તેમના મેનેજર જયેશ પરમાર, રવિ શાહ અને સંજય દેસાઈ સામે ગુનો નોંધી વધુ તપાસ શરૂ કરી છે. ફરિયાદ મુજબ અર્જુન ભૂતિયા, જીગર ચૌહાણ, કૃષ્ણ ગઢવી અને દર્શન શાહે મળીને ‘AAI Events’ નામે ભાગીદારી હેઠળ નોરતા નગરી ગરબા મહોત્સવનું આયોજન કર્યું હતું. તમામ ભાગીદારો વચ્ચે નોટરાઈઝ્ડ ભાગીદારી કરાર પણ કરવામાં આવ્યો હતો. ત્યારબાદ દર્શન શાહની ભલામણથી તેમના મેનેજર જયેશ પરમારને પણ ભાગીદારીમાં સામેલ કરવામાં આવ્યા હતા. શરૂઆતમાં તમામ આયોજન સહમતિથી આગળ વધ્યું હતું, પરંતુ કાર્યક્રમ પૂર્ણ થયા બાદ થયેલી તપાસમાં કથિત ગેરરીતિઓ સામે આવતાં સમગ્ર મામલો વિવાદમાં ફેરવાઈ ગયો.
આયોજન દરમિયાન ટિકિટ વેચાણ માટે સ્પષ્ટ વ્યવસ્થા નક્કી કરવામાં આવી હતી. ગરબા મહોત્સવની ટિકિટો ઝોમેટોની ‘ડિસ્ટ્રિક્ટ’ એપ મારફતે ઓનલાઈન તેમજ ઓફલાઈન વેચવાની સંમતિ થઈ હતી. સાથે જ દરરોજ આશરે 4,000 કમ્પ્લિમેન્ટરી ટિકિટો સ્પોન્સર્સ, મહેમાનો અને પરિચિતો માટે રાખવામાં આવતી હતી. આ ટિકિટો સંપૂર્ણપણે મફત હોવાની અને અન્ય કોઈ વ્યક્તિને ભાગીદારોની લેખિત અથવા મૌખિક મંજૂરી વગર આપવામાં નહીં આવે તેવી સ્પષ્ટ શરત નક્કી કરવામાં આવી હતી. સમગ્ર ટિકિટિંગ પ્રક્રિયામાં પારદર્શિતા જળવાઈ રહે તે માટે દરેક ભાગીદારને માહિતી આપવામાં આવતી હતી. જોકે ફરિયાદ અનુસાર, આ જ કમ્પ્લિમેન્ટરી ટિકિટો પાછળથી ગેરકાયદેસર રીતે વેચાણ માટે વાપરવામાં આવી હોવાનું બહાર આવ્યું છે.
ગરબા મહોત્સવ દરમિયાન જ સમગ્ર ઘટનાનો પ્રથમ સંકેત મળ્યો હતો. કાર્યક્રમ દરમિયાન ગ્રાઉન્ડ પર બે અજાણ્યા વ્યક્તિઓ ગેરરીતે ટિકિટો વેચતા ઝડપાયા હતા. પૂછપરછ દરમિયાન તેમણે જણાવ્યું હતું કે તેમને આ ટિકિટો ‘ટિકિટ ટાવર’ કંપનીના ઉમંગ પાસેથી મળી હતી. જ્યારે ઉમંગનો સંપર્ક કરવામાં આવ્યો ત્યારે તેણે જણાવ્યું કે આ ટિકિટો તેને દર્શન શાહ દ્વારા આપવામાં આવી હતી અને તે મૂળ કમ્પ્લિમેન્ટરી ટિકિટો જ હતી. જોકે કાર્યક્રમ ચાલી રહ્યો હોવાથી અને કોઈ અવ્યવસ્થા ન સર્જાય તે હેતુથી ભાગીદારોએ તે સમયે જાહેર વિવાદ ટાળવાનો નિર્ણય લીધો હતો. પરંતુ આ ઘટનાએ ભાગીદારોના મનમાં શંકા ઉભી કરી હતી કે ક્યાંક ટિકિટિંગ પ્રક્રિયામાં મોટું કૌભાંડ તો નથી થયું.
ગરબા મહોત્સવ પૂર્ણ થયા બાદ સમગ્ર ટિકિટિંગ ડેટાની સમીક્ષા કરવામાં આવી ત્યારે કથિત ગેરરીતિનો મોટો ખુલાસો થયો હતો. ભાગીદારોએ ઝોમેટોના ‘ડિસ્ટ્રિક્ટ’ પ્લેટફોર્મ પરથી વેચાયેલી ટિકિટોનો રેકોર્ડ મેળવ્યો હતો. ત્યારબાદ ઝોમેટો પાસે સ્પષ્ટતા માંગવામાં આવતા માહિતી મળી કે કમ્પ્લિમેન્ટરી ટિકિટો દર્શન શાહના કન્સલ્ટન્ટ મારફતે તેમના ભત્રીજા રવિ શાહ સુધી પહોંચાડવામાં આવી હતી અને ત્યારબાદ તેને ઓનલાઈન પ્લેટફોર્મ પર મૂકી વેચી દેવામાં આવી હતી. ફરિયાદમાં આરોપ છે કે દર્શન શાહ, જયેશ પરમાર, રવિ શાહ અને સંજય દેસાઈએ અન્ય ભાગીદારોને જાણ કર્યા વગર કમ્પ્લિમેન્ટરી ટિકિટોના વેચાણ દ્વારા આશરે 8થી 10 કરોડ રૂપિયા મેળવી છેતરપિંડી આચરી હતી. જ્યારે આ મુદ્દે ખુલાસો માંગવામાં આવ્યો ત્યારે સંતોષકારક જવાબ આપવામાં આવ્યો નહોતો.
હાલ સરખેજ પોલીસ સમગ્ર મામલે ઊંડાણપૂર્વક તપાસ કરી રહી છે. તપાસના ભાગરૂપે ભાગીદારી કરાર, ટિકિટ વેચાણના તમામ રેકોર્ડ, બેંક એકાઉન્ટની વિગતો તેમજ ઝોમેટોના ટ્રાન્ઝેક્શન ડેટા એકત્રિત કરવામાં આવી રહ્યા છે. પોલીસે આર્થિક વ્યવહારોની તપાસ શરૂ કરી છે જેથી વાસ્તવમાં કેટલી કમ્પ્લિમેન્ટરી ટિકિટો વેચવામાં આવી, કેટલા નાણાં એકત્ર થયા અને તે રકમ કોના ખાતામાં જમા થઈ તેની ચોક્કસ માહિતી મેળવી શકાય. ઉપરાંત તમામ આરોપીઓની ભૂમિકા, જવાબદારી અને સંડોવણી અંગે પણ તપાસ ચાલી રહી છે. જો તપાસ દરમિયાન ગેરરીતિના પૂરતા પુરાવા મળશે તો સંબંધિત લોકો સામે કાયદેસરની કાર્યવાહી વધુ કડક બની શકે છે.
અમદાવાદના સૌથી મોટા અને લોકપ્રિય ગરબા મહોત્સવોમાં ગણાતા ‘નોરતા નગરી’ને લઈને સામે આવેલા આ કથિત કરોડોના ટિકિટ કૌભાંડે ઇવેન્ટ મેનેજમેન્ટ ક્ષેત્રમાં પારદર્શિતા અને નાણાકીય જવાબદારી અંગે અનેક પ્રશ્નો ઉભા કર્યા છે. જો કમ્પ્લિમેન્ટરી ટિકિટોનો ગેરકાયદેસર રીતે વ્યાપારી ઉપયોગ થયો હોવાનું સાબિત થશે તો તે માત્ર ભાગીદારો સાથેની છેતરપિંડી નહીં પરંતુ સમગ્ર ઇવેન્ટ મેનેજમેન્ટ સિસ્ટમ માટે ગંભીર ચિંતાનો વિષય બની શકે છે. હાલ સમગ્ર મામલો પોલીસ તપાસ હેઠળ હોવાથી તમામ હકીકતો તપાસ પૂર્ણ થયા બાદ જ સ્પષ્ટ થશે. પોલીસ દ્વારા પુરાવાના આધારે આગળની કાર્યવાહી કરવામાં આવી રહી છે અને આ કથિત કૌભાંડમાં સંડોવાયેલા દરેક વ્યક્તિની ભૂમિકા કાયદેસર રીતે નિર્ધારિત કરવામાં આવશે.
