મારું શહેર સંસદ માર્ચમાં વિદ્યાર્થી પર પેલેટ ગન ચલાવનાર RAF જવાનની ઓળખ, 7 રાઉન્ડ ફાયરિંગનો ખુલાસો.
નીટ પેપર લીક વિરોધ પ્રદર્શન અને સંસદ માર્ચ દરમિયાન વિદ્યાર્થીઓ પર પેલેટ ગનના ઉપયોગના મામલે સેન્ટ્રલ રિઝર્વ પોલીસ ફોર્સ (CRPF)ની આંતરિક તપાસમાં મહત્વપૂર્ણ ખુલાસો થયો છે. તપાસ ટીમે તે રેપિડ એક્શન ફોર્સ (RAF)ના જવાનની ઓળખ કરી લીધી છે, જેણે પ્રદર્શન દરમિયાન પેલેટ ગનથી ફાયરિંગ કર્યું હતું.
તપાસમાં સામે આવ્યું છે કે સંબંધિત જવાને કુલ 7 રાઉન્ડ ફાયરિંગ કર્યું હતું. જેમાંથી 5 રાઉન્ડ સીધા પ્રદર્શનકારીઓને વાગ્યા હતા, જ્યારે 2 રાઉન્ડ જમીન તરફ ફાયર કરવામાં આવ્યા હતા. સમગ્ર ઘટના દિલ્હીના કનોટ પ્લેસ વિસ્તારમાં બની હતી.
CRPFના સૂત્રોના જણાવ્યા મુજબ, હવે તપાસ ટીમ એ બાબતની પણ તપાસ કરી રહી છે કે કઈ પરિસ્થિતિમાં પેલેટ ગનનો ઉપયોગ કરવાનો નિર્ણય લેવામાં આવ્યો હતો અને ફાયરિંગ માટે જરૂરી નિયમોનું પાલન કરવામાં આવ્યું હતું કે નહીં. આ સમગ્ર મામલે તૈયાર થઈ રહેલો તપાસ અહેવાલ આગામી એક સપ્તાહમાં સોંપાય તેવી શક્યતા છે. ત્યારબાદ જવાબદાર સામે વિભાગીય અથવા કાનૂની કાર્યવાહી અંગે નિર્ણય લેવામાં આવશે.
વિદ્યાર્થીઓના આરોપ બાદ શરૂ થઈ તપાસ
20 જુલાઈએ સંસદ માર્ચ દરમિયાન વિદ્યાર્થીઓ અને પોલીસ વચ્ચે ઘર્ષણ સર્જાતા પોલીસે લાઠીચાર્જ તેમજ ટીયર ગેસના શેલ છોડ્યા હતા. ત્યારબાદ અનેક વિદ્યાર્થીઓએ આરોપ લગાવ્યો હતો કે તેમની સામે પેલેટ ગનનો પણ ઉપયોગ કરવામાં આવ્યો હતો. શરૂઆતમાં દિલ્હી પોલીસે આવા આરોપોને નકારી કાઢ્યા હતા.
પરંતુ બાદમાં સફદરજંગ હોસ્પિટલમાં સારવાર માટે આવેલા એક ઘાયલ વિદ્યાર્થીના શરીરમાં પેલેટ જેવી ઈજાઓ હોવાનું તબીબી તપાસમાં સામે આવતા સમગ્ર મામલો ગંભીર બન્યો હતો. ત્યારબાદ CRPF દ્વારા આંતરિક તપાસના આદેશ આપવામાં આવ્યા હતા.
RAF દ્વારા હથિયારોના ઉપયોગ પર રોક
આ ઘટનાને પગલે RAFના મહાનિરીક્ષક સીમા ધૂંડિયાની અધ્યક્ષતામાં ઉચ્ચસ્તરીય બેઠક યોજાઈ હતી. બેઠકમાં આગામી આદેશ સુધી દિલ્હીમાં પ્રોજેક્ટાઇલ એક્શન ગન, એન્ટી-રાયટ ગન અને ઇલેક્ટ્રિક શોક હથિયારોના ઉપયોગ પર પ્રતિબંધ મૂકવાનો નિર્ણય લેવામાં આવ્યો હતો, જેથી ભવિષ્યમાં આવી વિવાદાસ્પદ સ્થિતિ ઊભી ન થાય.
તપાસ રિપોર્ટ બાદ થશે કાર્યવાહી
હાલ તપાસ ટીમ ઘટનાના તમામ વીડિયો, CCTV ફૂટેજ, વાયરલ ક્લિપ્સ તેમજ ડ્યૂટી પર રહેલા જવાનોના નિવેદનોના આધારે સમગ્ર ઘટનાક્રમની ચકાસણી કરી રહી છે. તપાસ રિપોર્ટ જાહેર થયા બાદ પેલેટ ગનના ઉપયોગ અંગે જવાબદારી નક્કી કરવામાં આવશે અને જો નિયમોનો ભંગ થયો હોવાનું સામે આવશે તો સંબંધિત જવાન સામે કડક કાર્યવાહી કરવામાં આવી શકે છે.
