મારું શહેર કેશોદમાં નંબર પ્લેટ વગર વાહન ચલાવતી GRD કર્મચારી સામે પોલીસની કાર્યવાહી.

કેશોદ શહેરમાં ખાખી વર્ધી પહેરીને નંબર પ્લેટ વગર વાહન ચલાવતી યુવતીનો ફોટો સોશિયલ મીડિયા પર વાયરલ થતાં પોલીસ તંત્ર હરકતમાં આવ્યું હતું.

સોશિયલ મીડિયામાં વાયરલ થયેલા ફોટામાં યુવતીના વાહનની પાછળની નંબર પ્લેટ ન હોવાનું ધ્યાન પર આવતા કેશોદ પોલીસે સમગ્ર મામલાની ગંભીરતાથી નોંધ લીધી હતી. ટ્રાફિકના નિયમોનું પાલન થાય અને કાયદો તમામ માટે સમાન રીતે લાગુ પડે તે હેતુથી પોલીસે તાત્કાલિક તપાસ હાથ ધરી હતી.

પોલીસ દ્વારા વાયરલ થયેલા ફોટાના આધારે વાહન અને તેને ચલાવતી યુવતી અંગે તપાસ કરવામાં આવી હતી. તપાસ દરમિયાન યુવતી કેશોદ ખાતે GRDમાં ફરજ બજાવતી કડવી જોરા નામની કર્મચારી હોવાનું સામે આવ્યું હતું.

પોલીસે સમગ્ર મામલે નિયમ મુજબ કાર્યવાહી કરી યુવતીને વાહનના નિયમોના ભંગ બદલ દંડ ફટકાર્યો હતો. પોલીસની તાત્કાલિક તપાસ અને કાર્યવાહીથી સ્પષ્ટ સંદેશ આપવામાં આવ્યો છે કે ટ્રાફિકના નિયમોનું પાલન કરાવવાની જવાબદારી ધરાવતા કર્મચારીઓ માટે પણ નિયમોમાં કોઈ છૂટછાટ રાખવામાં આવતી નથી.

સામાન્ય નાગરિક હોય કે પોલીસ વિભાગ સાથે સંકળાયેલ કર્મચારી, વાહન ચલાવતી વખતે જરૂરી દસ્તાવેજો અને નંબર પ્લેટ સહિતના તમામ ટ્રાફિક નિયમોનું પાલન કરવું ફરજિયાત છે. સોશિયલ મીડિયા પર વાયરલ થયેલા ફોટાને માત્ર અવગણવાને બદલે પોલીસ દ્વારા તેની નોંધ લઈ તાત્કાલિક તપાસ કરી કાર્યવાહી કરવામાં આવતા પોલીસની સતર્કતા અને જવાબદારીપૂર્વકની કામગીરી જોવા મળી છે.

કેશોદ પોલીસ દ્વારા નાગરિકોને પણ અપીલ કરવામાં આવે છે કે વાહન ચલાવતી વખતે ટ્રાફિકના તમામ નિયમોનું પાલન કરે અને વાહનમાં આગળ-પાછળ નિયમ મુજબ નંબર પ્લેટ લગાવેલી હોય તેની ખાસ તકેદારી રાખે.

રિપોર્ટર:- શોભના બાલાષ કેશોદ