અકસ્માત ચંબામાં મુસાફરોથી ભરેલી ખાનગી બસ પલટી: ગોઝારા અકસ્માતમાં 8 લોકોના મોત, અનેક મુસાફરો ઈજાગ્રસ્ત.

હિમાચલ પ્રદેશના ચંબા જિલ્લામાં શનિવાર, 8 ઓગસ્ટની સવારે એક ગમખ્વાર માર્ગ અકસ્માત સર્જાયો હતો. તીસા-બૈરાગઢ રોડ પર આવેલા ચાબુજ વળાંક પાસે મુસાફરોથી ભરેલી એક ખાનગી બસ અચાનક અકસ્માતનો ભોગ બની હતી. પ્રાથમિક માહિતી મુજબ બસમાં આશરે 20થી 25 મુસાફરો સવાર હતા. અકસ્માત એટલો ગંભીર હતો કે ઘટનામાં 8 મુસાફરોના મોત થયા છે, જ્યારે અનેક લોકો ઈજાગ્રસ્ત થયા હોવાનું સામે આવ્યું છે.

મળતી માહિતી અનુસાર, ખાનગી બસ બૈરાગઢથી ચંબા તરફ જઈ રહી હતી ત્યારે ચાબુજ વળાંક નજીક આ અકસ્માત સર્જાયો હતો. પ્રાથમિક રીતે જાણવા મળ્યા મુજબ વળાંક પાસે બસના ચાલકે સ્ટિયરિંગ પરથી નિયંત્રણ ગુમાવ્યું હતું, જેના કારણે બસ રસ્તા પર પલટી ગઈ હતી. અકસ્માત બાદ બસમાં સવાર મુસાફરોમાં ચીસાચીસ અને અફરાતફરીનો માહોલ સર્જાયો હતો.

અકસ્મતની જાણ થતાં જ આસપાસના સ્થાનિક લોકો ઘટનાસ્થળે પહોંચી ગયા હતા. ગ્રામજનોએ પોતાની રીતે બચાવ કામગીરી શરૂ કરી બસમાં ફસાયેલા મુસાફરોને બહાર કાઢવાનો પ્રયાસ કર્યો હતો. ત્યારબાદ પોલીસ અને વહીવટી તંત્રની ટીમો પણ તાત્કાલિક ઘટનાસ્થળે પહોંચી હતી. રાહત અને બચાવ કામગીરી દરમિયાન ઈજાગ્રસ્તોને બહાર કાઢીને સારવાર માટે નજીકની હોસ્પિટલમાં ખસેડવામાં આવ્યા હતા.

અકસ્મતમાં અનેક મુસાફરોને ગંભીર ઈજાઓ પહોંચી હોવાનું જાણવા મળ્યું છે. ઈજાગ્રસ્તોને તાત્કાલિક સારવાર મળે તે માટે સ્થાનિક તંત્ર દ્વારા જરૂરી વ્યવસ્થા કરવામાં આવી હતી. ગંભીર રીતે ઘાયલ થયેલા મુસાફરોને વધુ સારવાર માટે અન્ય હોસ્પિટલમાં ખસેડવાની જરૂરિયાત અંગે પણ તબીબી ટીમ દ્વારા નિર્ણય લેવામાં આવી રહ્યો છે.

ચંબાના પોલીસ અધિક્ષક વિજય સકલાનીએ અકસ્માતની પુષ્ટિ કરી છે. તેમના જણાવ્યા અનુસાર, બસ દુર્ઘટનામાં અત્યાર સુધીમાં 8 મુસાફરોના મોત થયા છે, જ્યારે અન્ય ઘાયલોને સારવાર માટે હોસ્પિટલ પહોંચાડવામાં આવ્યા છે. પોલીસ અને વહીવટી તંત્ર દ્વારા ઘટનાસ્થળે જરૂરી કાર્યવાહી હાથ ધરવામાં આવી છે.

હાલમાં અકસ્માતનું ચોક્કસ કારણ સ્પષ્ટ થયું નથી. બસની ઝડપ, રસ્તાની સ્થિતિ, વળાંક પરનું નિયંત્રણ ગુમાવવાનું કારણ અથવા અન્ય કોઈ પરિબળ જવાબદાર હતું કે નહીં તે અંગે પોલીસ તપાસ કરી રહી છે. અકસ્માતના ચોક્કસ કારણ અંગે તપાસ પૂર્ણ થયા બાદ જ સત્તાવાર રીતે વધુ વિગતો સામે આવશે.

ચંબાના પહાડી વિસ્તારોમાં આવેલા જોખમી વળાંકો અને માર્ગની ભૌગોલિક પરિસ્થિતિને કારણે વાહનચાલકો માટે ખાસ સાવચેતી જરૂરી રહે છે. હાલ આ દુર્ઘટનાએ સમગ્ર વિસ્તારમાં શોકનું વાતાવરણ સર્જ્યું છે. પોલીસ દ્વારા મૃતકોની ઓળખ અને અકસ્માત અંગેની અન્ય વિગતો એકત્રિત કરવાની કામગીરી હાથ ધરવામાં આવી છે, જ્યારે ઈજાગ્રસ્તોની સારવાર પર તંત્રનું ધ્યાન કેન્દ્રિત છે.