ટૉપ ન્યૂઝ દ્વારકા ITI ખાતે પાંચમો કૌશલ્ય દીક્ષાંત સમારોહ યોજાયો
દેવભૂમિ દ્વારકાની ઔદ્યોગિક તાલીમ સંસ્થા (ITI) ખાતે શનિવાર, તા. 21 નવેમ્બર, 2026ના રોજ પાંચમા ‘કૌશલ્ય દીક્ષાંત સમારોહ’નું ઉત્સાહભેર આયોજન કરવામાં આવ્યું હતું. શ્રમ, કૌશલ્ય વિકાસ અને રોજગાર વિભાગ, ગુજરાત સરકારના માર્ગદર્શન હેઠળ યોજાયેલા આ કાર્યક્રમનો મુખ્ય હેતુ તાલીમ પૂર્ણ કરી વિવિધ ટ્રેડમાં સફળતા મેળવનારા તાલીમાર્થીઓની સિદ્ધિઓને બિરદાવવાનો અને તેમના ઉજ્જવળ ભવિષ્ય માટે પ્રોત્સાહિત કરવાનો હતો. આ પ્રસંગે સંસ્થામાં ઉત્સવ જેવો માહોલ જોવા મળ્યો હતો. મોટી સંખ્યામાં તાલીમાર્થીઓ, મહાનુભાવો અને સંસ્થાના કર્મચારીઓ ઉપસ્થિત રહ્યા હતા.
આ કાર્યક્રમમાં મુખ્ય અતિથિ તરીકે ટાટા કેમિકલ્સના એપ્રેન્ટિસશીપ અને સ્કીલ ડેવલપમેન્ટ વિભાગના મેનેજર અનિલકુમાર બી. પટેલ ઉપસ્થિત રહ્યા હતા. જ્યારે અતિથિ વિશેષ તરીકે દ્વારકા તાલુકા પંચાયતના કારોબારી ચેરમેન શનીભા એ. સુમણીયાએ હાજરી આપી હતી. કાર્યક્રમની શરૂઆત મહાનુભાવોના હસ્તે દીપ પ્રાગટ્ય અને પ્રાર્થના સાથે કરવામાં આવી હતી. ત્યારબાદ સંસ્થાના આચાર્ય વી.કે. ગાગીયાએ ઉપસ્થિત મહેમાનોનું શાબ્દિક સ્વાગત કર્યું હતું. તેમણે સંસ્થાની અત્યાર સુધીની સિદ્ધિઓ, તાલીમાર્થીઓને આપવામાં આવતી વ્યવસાયલક્ષી તાલીમ અને કૌશલ્ય વિકાસ ક્ષેત્રે કરવામાં આવતી કામગીરી અંગે વિસ્તૃત માહિતી આપી હતી.
દીક્ષાંત સમારોહ દરમિયાન વિવિધ વ્યવસાયલક્ષી ટ્રેડમાં તાલીમ પૂર્ણ કરીને ઉત્તીર્ણ થયેલા તેજસ્વી તાલીમાર્થીઓને વિશેષ સન્માનિત કરવામાં આવ્યા હતા. ઉપસ્થિત મહાનુભાવોના હસ્તે સફળ તાલીમાર્થીઓને નેશનલ ટ્રેડ સર્ટિફિકેટ (NTC) એનાયત કરવામાં આવ્યાં હતાં. પ્રમાણપત્રો પ્રાપ્ત થતાં તાલીમાર્થીઓના ચહેરા પર ખુશી અને આત્મવિશ્વાસ જોવા મળ્યો હતો. આ પ્રસંગ તેમના માટે માત્ર શૈક્ષણિક સફળતાની ઉજવણી જ નહીં, પરંતુ વ્યવસાયિક જીવનમાં આગળ વધવાની નવી શરૂઆત સમાન બની રહ્યો હતો. તાલીમાર્થીઓની મહેનત અને કૌશલ્યને બિરદાવતાં મહાનુભાવોએ તેમને ભવિષ્યમાં પણ સતત પ્રગતિ કરતા રહેવા શુભેચ્છાઓ પાઠવી હતી.
કાર્યક્રમમાં ઉપસ્થિત મહાનુભાવોએ તાલીમાર્થીઓને માર્ગદર્શન આપતાં જણાવ્યું હતું કે આજના સ્પર્ધાત્મક યુગમાં માત્ર શૈક્ષણિક લાયકાત પૂરતી નથી, પરંતુ વ્યવહારુ જ્ઞાન અને વ્યવસાયલક્ષી કૌશલ્ય પણ એટલાં જ જરૂરી છે. યુવાનોએ પોતાની તાલીમનો યોગ્ય ઉપયોગ કરીને રોજગારની તકો પ્રાપ્ત કરવાની સાથે સ્વરોજગાર તરફ પણ આગળ વધવું જોઈએ. તેમણે ‘આત્મનિર્ભર ભારત’ અને ‘સ્કિલ ઇન્ડિયા’ અભિયાનને સફળ બનાવવા યુવાનોની ભૂમિકા મહત્ત્વપૂર્ણ ગણાવી હતી. કૌશલ્યના આધારે યુવાનો પોતાનું ભવિષ્ય ઘડી શકે છે અને દેશના આર્થિક વિકાસમાં પણ યોગદાન આપી શકે છે તેવો આશાવાદ વ્યક્ત કર્યો હતો.
આ પાંચમા કૌશલ્ય દીક્ષાંત સમારોહથી ITI દ્વારકાના તાલીમાર્થીઓમાં નવો ઉત્સાહ અને આત્મવિશ્વાસ જોવા મળ્યો હતો. વિવિધ ટ્રેડમાં તાલીમ પૂર્ણ કરનાર યુવાનોને પ્રમાણપત્રો એનાયત કરીને તેમની મહેનતને સન્માનિત કરવામાં આવી હતી. કાર્યક્રમના અંતે ઉપસ્થિત મહાનુભાવોનો આભાર વ્યક્ત કરવામાં આવ્યો હતો. આ સમગ્ર આયોજનમાં સંસ્થાના આચાર્ય વી.કે. ગાગીયા સહિત સમગ્ર સ્ટાફે જહેમત ઉઠાવી હતી. મોટી સંખ્યામાં તાલીમાર્થીઓની ઉપસ્થિતિ સાથે આ સમારોહ સફળતાપૂર્વક સંપન્ન થયો હતો.