ટેક્નોલોજી Gen Zમાં જ્યોતિષશાસ્ત્રનો વધતો ક્રેઝ, અમદાવાદમાં 40 ટકા યુવાનો ભવિષ્ય જાણવા પહોંચે છે!
આવતીકાલે શું થશે અને જીવનમાં આગળ શું લખ્યું છે તે જાણવાની જિજ્ઞાસા દરેક વ્યક્તિને હોય છે. જોકે, હવે આ જિજ્ઞાસા માત્ર વડીલો પૂરતી મર્યાદિત રહી નથી, પરંતુ યુવા પેઢીમાં પણ જ્યોતિષશાસ્ત્ર પ્રત્યે આકર્ષણ ઝડપથી વધી રહ્યું છે. એક સમયે ગ્રહ-નક્ષત્ર, પંચાંગ, કુંડળી અને રાશિફળ જેવી બાબતોમાં મોટાભાગે વડીલો જ વિશ્વાસ રાખતા હતા અને સંતાનોના ભવિષ્ય અંગે સલાહ મેળવવા વાલીઓ જ્યોતિષીઓનો સંપર્ક કરતા હતા. પરંતુ આજની ટેકનોલોજી સાથે જોડાયેલી, સ્વતંત્ર વિચારસરણી ધરાવતી અને દરેક બાબતને તર્કની કસોટીએ ચકાસતી 'જેન ઝી' (Gen Z) પેઢીનું એક અલગ જ પાસું સામે આવ્યું છે. જીવનની અનિશ્ચિતતાઓ, કારકિર્દી, પ્રેમસંબંધો અને ભવિષ્ય અંગેના પ્રશ્નોના જવાબ મેળવવા હવે યુવાનો સામેથી જ જ્યોતિષશાસ્ત્રનો સહારો લઈ રહ્યા છે. અમદાવાદના જ્યોતિષીઓ પાસે આવતા લોકોમાં અંદાજે 35થી 40 ટકા યુવાનો 18થી 30 વર્ષની વયજૂથના હોવાનું સામે આવ્યું છે.
યુવાનોમાં જ્યોતિષશાસ્ત્ર પ્રત્યે વધતા આકર્ષણ પાછળ જીવનની વધતી સ્પર્ધા અને અનિશ્ચિતતાઓને મહત્ત્વનું કારણ માનવામાં આવે છે. કારકિર્દીની પસંદગી, નોકરીમાં સફળતા, વ્યવસાયની શરૂઆત, લગ્નજીવન અને પ્રેમસંબંધો જેવા મુદ્દાઓ અંગે યુવાનો જ્યોતિષીઓની સલાહ લઈ રહ્યા છે. ખાસ કરીને ભવિષ્ય અંગે સ્પષ્ટતા મેળવવાની ઇચ્છા અને માનસિક મૂંઝવણમાંથી બહાર આવવા માટે તેઓ કુંડળી અને ગ્રહોની સ્થિતિ જાણવામાં રસ દાખવી રહ્યા છે. સોશિયલ મીડિયા અને ઇન્ટરનેટના માધ્યમથી જ્યોતિષ સંબંધિત માહિતી સરળતાથી ઉપલબ્ધ થતી હોવાથી પણ યુવાનો આ ક્ષેત્ર તરફ આકર્ષાઈ રહ્યા છે. અગાઉ પરિવારના મોટા નિર્ણયો માટે જ્યોતિષની મુલાકાત લેવામાં આવતી હતી, પરંતુ હવે નાની-નાની બાબતોમાં પણ જ્યોતિષીય માર્ગદર્શન મેળવવાની પ્રવૃત્તિ વધી રહી છે.
બીજી તરફ, ટેકનોલોજીના યુગમાં ઓનલાઈન એસ્ટ્રોલોજી એપ્લિકેશનોની સંખ્યા પણ ઝડપથી વધી રહી છે. હવે આર્ટિફિશિયલ ઇન્ટેલિજન્સ (AI) આધારિત પ્લેટફોર્મ પણ જ્યોતિષીની જેમ સલાહ આપી રહ્યાં છે. મોબાઈલમાં જન્મતારીખ, જન્મસમય અને જન્મસ્થળ જેવી વિગતો દાખલ કરતાં જ કુંડળી, રાશિફળ અને ભવિષ્ય અંગેના જવાબો મળી જાય છે. જોકે, નિષ્ણાતો આ પ્રકારની AI આધારિત સલાહ અંગે સાવચેતી રાખવાની સલાહ આપે છે. તેમના મતે, આવી સલાહ હંમેશાં વ્યક્તિની વાસ્તવિક પરિસ્થિતિને અનુરૂપ કે વિશ્વસનીય હોય તે જરૂરી નથી. દરેક નાની બાબતમાં AI એસ્ટ્રોલોજી પર આધાર રાખવાથી યુવાનોની સ્વતંત્ર વિચારશક્તિ અને નિર્ણય લેવાની ક્ષમતા પર નકારાત્મક અસર થવાની શક્યતા પણ વ્યક્ત કરવામાં આવી રહી છે.
જ્યોતિષશાસ્ત્રના ક્ષેત્રમાં પણ છેલ્લા કેટલાક વર્ષોમાં મોટો બદલાવ જોવા મળી રહ્યો છે. અગાઉ આ વ્યવસાય મોટાભાગે વંશપરંપરાગત રીતે આગળ વધતો હતો, પરંતુ હવે યુવાનોની સાથે નિવૃત્ત વડીલો પણ છ મહિના કે એક વર્ષના વિશેષ અભ્યાસક્રમો કરીને જ્યોતિષશાસ્ત્રના ક્ષેત્રમાં પ્રવેશી રહ્યા છે. કેટલાક લોકો પાર્ટટાઇમ જ્યોતિષી તરીકે પણ કામ કરી રહ્યા છે. અમદાવાદમાં છેલ્લા એક દાયકામાં જ્યોતિષીઓની ઓફિસોની સંખ્યામાં વધારો થયો હોવાનું જોવા મળી રહ્યું છે. શહેરના વિવિધ વિસ્તારોમાં ડોક્ટર અને વકીલની ઓફિસની જેમ જ્યોતિષીઓની ઓફિસો પણ ખુલવા લાગી છે. આ વધતી લોકપ્રિયતાની વચ્ચે યોગ્ય અભ્યાસ અને અનુભવ ધરાવતા જ્યોતિષીઓની સાથે કેટલાક બોગસ જ્યોતિષીઓ પણ આ ક્ષેત્રમાં પ્રવેશી ગયા હોવાની ચિંતા વ્યક્ત કરવામાં આવી રહી છે.
આમ, આધુનિક ટેકનોલોજી અને તર્કશક્તિમાં વિશ્વાસ ધરાવતી Gen Z પેઢી પણ હવે પોતાના ભવિષ્યને લઈને જ્યોતિષશાસ્ત્ર તરફ વળી રહી છે. એક તરફ ઓનલાઈન એપ્લિકેશન અને AI દ્વારા જ્યોતિષીય સલાહ મેળવવાનું સરળ બન્યું છે, તો બીજી તરફ બોગસ માર્ગદર્શન અને ખોટા દાવાઓથી સાવચેત રહેવાની જરૂરિયાત પણ વધી છે. નિષ્ણાતોના મતે, ભવિષ્ય અંગે જિજ્ઞાસા રાખવી સ્વાભાવિક છે, પરંતુ જીવનના મહત્ત્વપૂર્ણ નિર્ણયો માત્ર જ્યોતિષીય આગાહીઓ કે AIની સલાહના આધારે લેવાને બદલે પોતાની સમજ, અભ્યાસ અને વાસ્તવિક પરિસ્થિતિને પ્રાથમિકતા આપવી જરૂરી છે.