ક્રાઇમ જામનગરમાં ઓનલાઈન ચેટિંગ એપથી યુવકને ફસાવી અપહરણ અને રૂ. 74 હજારની લૂંટ, ચાર આરોપીઓ સામે ગુનો નોંધાયો
જામનગરમાં ઓનલાઈન ચેટિંગ એપ મારફતે ઓળખાણ કેળવી એક યુવકનું અપહરણ કરીને તેની પાસેથી રોકડ, મોબાઇલ અને બેંક ખાતામાંથી કુલ રૂ. 74 હજારની લૂંટ ચલાવ્યાનો ગંભીર બનાવ સામે આવ્યો છે. આ ઘટનાને લઈને પંચકોશી બી. ડિવિઝન પોલીસ સ્ટેશનમાં ચાર આરોપીઓ સામે ગુનો નોંધવામાં આવ્યો છે. પ્રાથમિક તપાસ મુજબ આરોપીઓએ ગ્રાઇન્ડર (Grindr) ચેટિંગ એપ મારફતે મિત્રતા કેળવી યુવકને મળવા બોલાવ્યો હતો અને ત્યારબાદ તેને નિર્જન વિસ્તારમાં લઈ જઈ માર માર્યો, હથિયારની ધમકી આપી લૂંટ ચલાવી હતી.
પોલીસ ફરિયાદ મુજબ જામનગર નજીકના દરેડ ગામમાં રહેતા અને મજૂરી કામ કરતા ભીખાલાલ ઉર્ફે રણમલ ભોજાભાઈ કળોતરાએ જણાવ્યું હતું કે તેઓએ ગ્રાઇન્ડર એપ પર "કરણ" નામની આઈડી સાથે ચેટિંગ શરૂ કર્યું હતું. ચેટિંગ દરમિયાન સામેવાળી વ્યક્તિએ પોતાનું નામ રવીરાજ હોવાનું અને પોતે ખંભાળિયાનો રહેવાસી હોવાનું જણાવ્યું હતું. બંને વચ્ચે વાતચીત બાદ જામનગરના લાલપુર બાયપાસ વિસ્તારમાં રૂબરૂ મળવાનું નક્કી કરવામાં આવ્યું હતું.
નક્કી કરેલા સ્થળે કાળા રંગની સ્વિફ્ટ કાર (રજિસ્ટ્રેશન નંબર GJ-10-EH-1605) લઈને રવીરાજ આવ્યો હતો. ફરિયાદી કારમાં બેઠા બાદ આરોપીએ કારને બે ભાઈના ડુંગર તરફ લઈ ગયો હતો. રસ્તામાં એક દુકાન નજીક કાર ઉભી રાખીને તેણે પોતાના અન્ય ત્રણ સાગરિતો સાથે વાતચીત કરી હતી. ત્યારબાદ ચારેય આરોપીઓ ફરિયાદીને નિર્જન વિસ્તારમાં લઈ ગયા હતા, જ્યાં સમગ્ર ઘટનાને અંજામ આપવામાં આવ્યો હોવાનું ફરિયાદમાં જણાવાયું છે.
ફરિયાદ અનુસાર નિર્જન વિસ્તારમાં પહોંચ્યા બાદ ચારેય આરોપીઓએ ફરિયાદીને માર માર્યો હતો અને બળજબરીપૂર્વક કારમાં બેસાડી તેનું અપહરણ કર્યું હતું. એક આરોપીએ છરી બતાવી હતી જ્યારે અન્ય આરોપીએ ધોકો બતાવી રૂ. 1 લાખની માંગણી કરી હતી. ફરિયાદીએ રૂપિયા આપવાનો ઇનકાર કરતાં આરોપીઓએ તેને ગાળો આપી જાનથી મારી નાખવાની ધમકી આપી હતી. આ દરમિયાન ફરિયાદી પાસેથી અંદાજે રૂ. 15 હજારની કિંમતનો મોબાઇલ ફોન, પાકીટમાં રહેલા ATM કાર્ડ તેમજ રૂ. 1 હજારની રોકડ લૂંટી લેવામાં આવી હતી.
આટલેથી આરોપીઓ અટક્યા નહોતા. ફરિયાદીના ATM કાર્ડનો ઉપયોગ કરીને તેના બેંક ખાતામાંથી રૂ. 58 હજાર ઉપાડી લેવામાં આવ્યા હોવાનું પણ ફરિયાદમાં જણાવાયું છે. આમ રોકડ, મોબાઇલ અને બેંક ખાતામાંથી ઉપાડેલી રકમ સહિત કુલ અંદાજે રૂ. 74 હજારની લૂંટ ચલાવવામાં આવી હોવાનો આક્ષેપ કરવામાં આવ્યો છે. સમગ્ર ઘટનાએ ઓનલાઈન ચેટિંગ એપનો દુરુપયોગ કરીને ગુનાઓ આચરવાની વધતી ઘટનાઓ સામે પણ ચિંતા ઉભી કરી છે.
આ બનાવ અંગે પંચકોશી બી. ડિવિઝન પોલીસ સ્ટેશનમાં ચાર આરોપીઓ સામે ભારતીય ન્યાય સંહિતા (BNS)ની કલમ 309(6), 140(2), 61(2) તેમજ ગુજરાત પોલીસ અધિનિયમની કલમ 135(1) હેઠળ ગુનો નોંધવામાં આવ્યો છે. પોલીસ દ્વારા કારની વિગતો, મોબાઇલ કોલ ડેટા, સીસીટીવી ફૂટેજ અને બેંક ટ્રાન્ઝેક્શન સહિતના ટેકનિકલ પુરાવાઓના આધારે આરોપીઓને ઝડપી પાડવા માટે કાર્યવાહી હાથ ધરવામાં આવી છે.
આ કેસની વધુ તપાસ પંચકોશી બી. ડિવિઝનના પોલીસ ઇન્સ્પેક્ટર વી. જે. રાઠોડ અને તેમની ટીમ કરી રહી છે. પોલીસ દ્વારા નાગરિકોને પણ અપીલ કરવામાં આવી છે કે સોશિયલ મીડિયા અથવા ઓનલાઈન ચેટિંગ એપ પર અજાણ્યા લોકો સાથે સંપર્ક કરતી વખતે પૂરતી સાવચેતી રાખવી, વ્યક્તિની ઓળખની ખાતરી કર્યા વગર એકાંત સ્થળે મુલાકાત ન ગોઠવવી અને કોઈપણ શંકાસ્પદ પ્રવૃત્તિ અંગે તાત્કાલિક પોલીસને જાણ કરવી. પોલીસે જણાવ્યું છે કે કેસના તમામ પાસાઓની તપાસ કરીને આરોપીઓ સામે કડક કાયદેસરની કાર્યવાહી કરવામાં આવશે.
