ક્રાઇમ જામનગરમાં એસ.ઓ.જી.ની મોટી કાર્યવાહી: ૨૧.૯૫ લાખના કોકેન અને MDMA સાથે રાજસ્થાની શખ્સ ઝડપાયો.

જામનગર : જામનગર જિલ્લામાં નશાકારક પદાર્થોના વધતા વેપાર સામે પોલીસ દ્વારા શરૂ કરાયેલા "No Drugs In Jamnagar" અભિયાન અંતર્ગત સ્પેશિયલ ઓપરેશન ગ્રુપ (એસ.ઓ.જી.)ને મોટી સફળતા મળી છે. એસ.ઓ.જી.ની ટીમે શહેરમાંથી એક રાજસ્થાની શખ્સને ઝડપી પાડી તેની પાસેથી ૧૯ ગ્રામ કોકેન અને ૧૨૩ ગ્રામ MDMA (મેફેડ્રોન, એમ્ફેટામાઇન, મેથામ્ફેટામાઇન) સહિત કુલ ૧૪૨ ગ્રામ નશાકારક પાવડર કબ્જે કર્યો છે. જપ્ત કરાયેલા ડ્રગ્સ, મોબાઇલ ફોન અને અન્ય સામાન સહિત કુલ રૂ. ૨૧,૯૫,૫૦૦નો મુદ્દામાલ કબ્જે લેવામાં આવ્યો છે. સમગ્ર બનાવને લઈ સિટી "બી" ડિવિઝન પોલીસ મથકે એન.ડી.પી.એસ. એક્ટ હેઠળ ગંભીર ગુનો નોંધવામાં આવ્યો છે.

રાજકોટ રેન્જના નાયબ પોલીસ મહાનિરીક્ષક નિર્લિપ્ત રાય (આઈ.પી.એસ.)ના માર્ગદર્શન હેઠળ જામનગર જિલ્લામાં નશાકારક પદાર્થોના વેપાર પર કડક નિયંત્રણ લાવવા સૂચના આપવામાં આવી હતી. તેના અનુસંધાને જિલ્લા પોલીસ વડા ડો. રવિમોહન સૈનીએ યુવાધનને નશાની લતથી બચાવવા અને જિલ્લામાં ડ્રગ્સના નેટવર્કને તોડી પાડવા માટે "No Drugs In Jamnagar" નામનું વિશેષ અભિયાન શરૂ કર્યું છે. આ અભિયાન અંતર્ગત એસ.ઓ.જી.ની ટીમ સતત પેટ્રોલિંગ, બાતમીદારોનું નેટવર્ક અને ટેક્નિકલ સર્વેલન્સ દ્વારા ડ્રગ્સના વેપારીઓ પર નજર રાખી રહી છે.

આ દરમિયાન એસ.ઓ.જી.ના પોલીસ ઇન્સ્પેક્ટર વી.બી. ચૌધરી, પોલીસ સબ ઇન્સ્પેક્ટર એલ.એમ. ઝેરા અને એ.વી. ખેરના માર્ગદર્શન હેઠળ સ્ટાફ શહેરમાં પેટ્રોલિંગ કરી રહ્યો હતો. તે સમયે પોલીસ કોન્સ્ટેબલ મયુરરાજસિંહ જાડેજા, બળભદ્રસિંહ જાડેજા અને વિરેન્દ્રસિંહ જાડેજાને ચોક્કસ બાતમી મળી હતી કે નરસીરામ કુપારામ લુણા રબારી, હાલ સજુબા સ્કૂલ પાસે રહેતો અને મૂળ રાજસ્થાનના જાલોર જિલ્લાના અરણાઈ ગામનો રહેવાસી, ટાઉનહોલ નજીક કોટક મહિન્દ્રા બેંક પાછળની ગલીમાં નશાકારક પાવડર વેચવા આવવાનો છે. આ માહિતીના આધારે પોલીસે સ્થળ પર વોચ ગોઠવી હતી.

બાતમી મુજબનો શખ્સ સ્થળ પર પહોંચતા પોલીસે તેને કાયદેસરની કાર્યવાહી કરીને ઝડપી લીધો હતો. તેની તલાશી દરમિયાન તેની પાસેથી ૧૯ ગ્રામ કોકેન, કિંમત અંદાજે રૂ. ૯.૫૦ લાખ, તેમજ ૧૨૩ ગ્રામ MDMA, કિંમત અંદાજે રૂ. ૧૨.૩૦ લાખ, મળી આવ્યા હતા. ઉપરાંત તેની પાસેથી બે મોબાઇલ ફોન, એક ડિજિટલ વજન કાંટો અને અન્ય સામગ્રી પણ મળી આવી હતી. આમ કુલ રૂ. ૨૧,૯૫,૫૦૦નો મુદ્દામાલ જપ્ત કરવામાં આવ્યો હતો.

પોલીસે આરોપી સામે સિટી "બી" ડિવિઝન પોલીસ સ્ટેશનમાં ગુનો નં. ૧૧૨૦૨૦૦૯૨૬૧૪૭૪/૨૦૨૬ હેઠળ એન.ડી.પી.એસ. એક્ટની કલમ ૮(સી), ૨૧(બી), ૨૨(સી) અને ૨૯ મુજબ ગુનો નોંધી વધુ તપાસ શરૂ કરી છે. પોલીસ હવે આરોપી પાસે મળેલા ડ્રગ્સ ક્યાંથી લાવવામાં આવ્યા હતા, તેનો સપ્લાયર કોણ છે, જામનગરમાં તે કોને વેચતો હતો અને સમગ્ર રેકેટમાં અન્ય કેટલા લોકો સંડોવાયેલા છે તે દિશામાં સઘન તપાસ ચલાવી રહી છે.

પોલીસના જણાવ્યા મુજબ છેલ્લા કેટલાક સમયથી યુવાઓમાં કોકેન, MDMA સહિતના સિન્થેટિક ડ્રગ્સનો ઉપયોગ વધતો જોવા મળી રહ્યો છે. આ પ્રકારના નશાકારક પદાર્થો અત્યંત મોંઘા અને જીવલેણ અસર ધરાવતા હોવાથી પોલીસ આવા ગુનાઓને અત્યંત ગંભીરતાથી લઈ રહી છે. ડ્રગ્સના નેટવર્કને મૂળમાંથી ઉખેડી નાખવા માટે સ્થાનિક પોલીસ, એસ.ઓ.જી., એલ.સી.બી. અને અન્ય એજન્સીઓ વચ્ચે સંકલનથી સતત કાર્યવાહી કરવામાં આવી રહી છે.

એસ.ઓ.જી.ની આ કાર્યવાહી જામનગર જિલ્લામાં ડ્રગ્સ વિરોધી અભિયાનની સૌથી મહત્વપૂર્ણ સફળતાઓમાંની એક માનવામાં આવી રહી છે. પોલીસનું માનવું છે કે આ જથ્થો બજારમાં પહોંચ્યો હોત તો અનેક યુવાનો નશાની લતમાં ફસાઈ શક્યા હોત. હાલ આરોપીની સઘન પૂછપરછ ચાલી રહી છે અને તેના મોબાઇલ ફોનમાંથી મળનારી માહિતીના આધારે ડ્રગ્સ સપ્લાય ચેઇનના અન્ય આરોપીઓ સુધી પહોંચવા માટે તપાસનો વ્યાપ વધારવામાં આવ્યો છે. પોલીસે નાગરિકોને પણ અપીલ કરી છે કે ડ્રગ્સ સંબંધિત કોઈપણ શંકાસ્પદ પ્રવૃત્તિ અંગે તાત્કાલિક પોલીસને જાણ કરે જેથી સમાજને નશાના દૂષણથી બચાવી શકાય.