મારું શહેર કેશોદ નગરપાલિકાની કાર્યવાહીથી વિવાદ: રહેણાંક વિસ્તારમાં વેપાર અંગે નોટિસ બાદ વેપારીઓમાં ચર્ચા.
કેશોદ નગરપાલિકા દ્વારા રહેણાંક વિસ્તારમાં વ્યાવસાયિક પ્રવૃત્તિઓ અંગે હાથ ધરાયેલી કાર્યવાહી બાદ શહેરમાં ચર્ચાનો માહોલ સર્જાયો છે. રહેણાંક વિસ્તારમાં આવશ્યક ચીજવસ્તુઓનું વેચાણ કરતી એક વેપારીને નોટિસ પાઠવાતા વેપારીઓ અને સ્થાનિક નાગરિકોમાં વિવિધ પ્રકારની પ્રતિક્રિયાઓ જોવા મળી રહી છે.
મળતી માહિતી મુજબ, કેશોદના શક્તિનગર કો-ઓપરેટિવ હાઉસિંગ સોસાયટીમાં પોતાના રહેણાંક મકાનના આગળના ભાગમાં અનાજ, કરિયાણા અને પ્રોવિઝન સ્ટોર ચલાવતા ઇન્દુબેન ચત્રભુજ ઠક્કરને કેશોદ નગરપાલિકા દ્વારા નોટિસ પાઠવવામાં આવી છે. નોટિસમાં જણાવાયું છે કે રહેણાંક હેતુ માટે ફાળવાયેલી મિલકતનો વાણિજ્યિક ઉપયોગ કરવામાં આવતો હોવાથી તે સંબંધિત નિયમો અને શરતોનું ઉલ્લંઘન હોઈ શકે છે. નગરપાલિકાએ સંબંધિત આધાર-પુરાવા રજૂ કરવા લેખિતમાં સૂચના આપી છે.
નગરપાલિકાની આ કાર્યવાહી બાદ કેટલાક વેપારીઓ અને સ્થાનિકોએ પ્રશ્ન ઉઠાવ્યો છે કે જો રહેણાંક વિસ્તારોમાં વ્યાવસાયિક ઉપયોગ સામે કાર્યવાહી કરવામાં આવી રહી છે, તો શહેરમાં અન્ય સ્થળોએ રહેણાંક વિસ્તારોમાં કાર્યરત મોબાઈલ ટાવર, વિવિધ ઉદ્યોગો, હેતુફેર વગરના બાંધકામો, પાર્કિંગ જગ્યાના અન્ય ઉપયોગ અને અન્ય કથિત અનિયમિતતાઓ સામે પણ સમાન ધોરણે કાર્યવાહી થવી જોઈએ.
સ્થાનિક વેપારીઓનું કહેવું છે કે શહેરના અનેક રહેણાંક વિસ્તારોમાં વર્ષોથી કરિયાણા, દૂધ, દવાખાના તથા અન્ય આવશ્યક ચીજવસ્તુઓની નાની દુકાનો કાર્યરત છે, જે સ્થાનિક રહેવાસીઓની દૈનિક જરૂરિયાતો પૂરી કરે છે. તેઓનું માનવું છે કે આવા મુદ્દાઓમાં કોઈપણ કાર્યવાહી કરતાં પહેલાં સ્પષ્ટ નીતિ અને સમાન અમલ જરૂરી છે.
બીજી તરફ, નગરપાલિકાનો અભિપ્રાય છે કે શહેરમાં બાંધકામ અને જમીન ઉપયોગ સંબંધિત નિયમોનું પાલન કરાવવાની જવાબદારી સ્થાનિક સ્વરાજ્ય સંસ્થાની છે. જો કોઈ મિલકતનો ઉપયોગ મંજૂર હેતુથી અલગ રીતે કરવામાં આવતો હોય તો નિયમો અનુસાર કાર્યવાહી કરવામાં આવી શકે છે.
આ મુદ્દે વેપારી સંગઠનો દ્વારા પણ ચર્ચા શરૂ થઈ હોવાનું જાણવા મળી રહ્યું છે. કેટલાક વેપારીઓએ સમગ્ર મામલે નગરપાલિકા સમક્ષ રજૂઆત કરવાની તૈયારી દર્શાવી છે અને તમામ પ્રકારની કથિત ગેરરીતિઓ સામે ભેદભાવ વગર સમાન કાર્યવાહી કરવાની માંગ કરી છે.
હાલ આ મામલે કેશોદ નગરપાલિકા તરફથી સત્તાવાર રીતે કોઈ વિગતવાર સ્પષ્ટતા જાહેર કરવામાં આવી નથી. વેપારીઓની રજૂઆત અને નગરપાલિકાના આગામી નિર્ણય પર હવે સૌની નજર ટકેલી છે.
રિપોર્ટર શોભના બાલસ કેશોદ
