મારું શહેર પ્રથમ વરસાદમાં જામનગરમાં જર્જરિત ઇમારતની છત ધરાશાયી, મોટી દુર્ઘટના ટળી.
જામનગર : શહેરમાં પ્રથમ વરસાદના જોરદાર રાઉન્ડ દરમિયાન પટણીવાડ વિસ્તારમાં આવેલી હુસૈની બાગ હોલની જૂની અને જર્જરિત ઇમારતની છત અચાનક ધરાશાયી થતાં વિસ્તારમાં ભારે અફરાતફરીનો માહોલ સર્જાયો હતો. આ ઘટના સદામ રેસ્ટોરન્ટ સામે બની હતી. સદનસીબે ઘટનાના સમયે છત નીચે કોઈ વ્યક્તિ હાજર ન હોવાથી મોટી જાનહાનિ ટળી હતી.
પ્રાપ્ત માહિતી મુજબ સોમવારે રાત્રે ભારે વરસાદ વરસી રહ્યો હતો ત્યારે વર્ષો જૂની અને બિસ્માર હાલતમાં આવેલી હુસૈની બાગ હોલની છત અચાનક તૂટી પડી હતી. જોરદાર ધડાકા સાથે છત ધરાશાયી થતાં આસપાસના લોકો દોડી આવ્યા હતા અને ઘટનાસ્થળે લોકોના ટોળેટોળા એકત્ર થઈ ગયા હતા. ઘટનાની જાણ થતાં સ્થાનિક લોકો દ્વારા તંત્રને પણ જાણ કરવામાં આવી હતી.
સ્થાનિકોના જણાવ્યા મુજબ ઇમારત લાંબા સમયથી જર્જરિત હાલતમાં હતી અને ભારે વરસાદને કારણે તેની છત નબળી પડી જતાં આખરે ધરાશાયી થઈ હતી. જોકે ઘટનાના સમયે ઇમારતમાં કોઈની અવરજવર ન હોવાથી મોટી દુર્ઘટના ટળી હતી. જો આ ઘટના દિવસના સમયે અથવા લોકોની અવરજવર દરમિયાન બની હોત તો ગંભીર જાનહાનિ સર્જાઈ શકતી હતી.
બનાવ બાદ સ્થાનિકોમાં જર્જરિત ઇમારતો અંગે ચિંતા વ્યાપી છે. રહિશોએ તંત્રને શહેરની જોખમી અને બિસ્માર ઇમારતોનું તાત્કાલિક સર્વેક્ષણ કરીને જરૂરી કાર્યવાહી કરવાની માંગ કરી છે, જેથી આગામી વરસાદી દિવસોમાં આવી દુર્ઘટનાઓને અટકાવી શકાય. ઘટનાને લઈને તંત્ર દ્વારા વધુ તપાસ અને જરૂરી કાર્યવાહી હાથ ધરવામાં આવી રહી છે.
