રૂ. 1.55 કરોડનો મુદ્દામાલ જપ્ત, 3 આરોપીઓ ઝડપાયા

જેતપુર: રાજકોટ જિલ્લાના જેતપુરમાં ઉદ્યોગનગર પોલીસે એક મોટા ટેક્સચોરી અને છેતરપિંડીના કૌભાંડનો પર્દાફાશ કરતાં ટ્રાવેલ્સ બસોના સંચાલકોમાં ભારે ચકચાર મચી ગઈ છે. એક જ રજીસ્ટ્રેશન નંબર પ્લેટનો ઉપયોગ કરીને એકથી વધુ લક્ઝરી બસો રસ્તા પર દોડાવી સરકારને લાખો રૂપિયાના ટેક્સની ચોરી કરવામાં આવતી હોવાનો ભેદ ખુલ્યો છે. આ સમગ્ર કાર્યવાહી દરમિયાન પોલીસે કુલ રૂ. 1,55,50,000ના મુદ્દામાલ સાથે 11 વાહનો અને 31 શંકાસ્પદ ડુપ્લિકેટ નંબર પ્લેટો જપ્ત કરી ત્રણ આરોપીઓની ધરપકડ કરી છે.

જેતપુર ઉદ્યોગનગર પોલીસ સ્ટેશનની સર્વેલન્સ ટીમને ખાનગી બાતમી મળી હતી કે મુસાફરોની અવરજવર કરતી કેટલીક ખાનગી ટ્રાવેલ્સ બસોમાં એક જ રજીસ્ટ્રેશન નંબર પ્લેટનો ઉપયોગ બે કે તેથી વધુ બસોમાં કરવામાં આવી રહ્યો છે. આ માહિતીના આધારે પોલીસે જેતપુર નજીક રબારીકા ચોકડી પાસે નેશનલ હાઇવે પર ખાસ વોચ ગોઠવી હતી.

દરમિયાન જૂનાગઢ તરફથી આવી રહેલી 'શ્રી મહાલક્ષ્મી' નામની બ્લુ કલરની લક્ઝરી બસ, જેના પર AR 01 U 9905 નંબર પ્લેટ લગાવવામાં આવી હતી, તેને અટકાવી તપાસ કરવામાં આવી હતી. તપાસ દરમિયાન નંબર પ્લેટ શંકાસ્પદ હોવાનું સામે આવતા વધુ ચકાસણી હાથ ધરવામાં આવી હતી. પોલીસ તપાસમાં બસ પર લગાવેલી નંબર પ્લેટ ખોટી હોવાનું ખુલતા બસના ચાલક **કૌશિકભાઈ યોગેશભાઈ જયસ્વાલ (રહે. મેંદરડા, જિલ્લા જૂનાગઢ)**ની ધરપકડ કરવામાં આવી હતી. પોલીસે અંદાજે રૂ. 15 લાખ કિંમતની બસ જપ્ત કરીને કાયદેસરની કાર્યવાહી શરૂ કરી હતી.

પ્રાથમિક કાર્યવાહી બાદ પોલીસે તપાસનો વ્યાપ વધારતા જેતપુર-જૂનાગઢ ફોર-લેન હાઇવે પર બંસી ફેશન સામે આવેલા **'પાવન ટ્રાવેલ્સ'**ના ડેલા પર દરોડો પાડ્યો હતો. ત્યાં પહોંચેલી પોલીસ ટીમ પણ એકસાથે ચાર લક્ઝરી બસો પર એક જ આરટીઓ નંબર GJ 14 T 0932 જોઈને આશ્ચર્યચકિત થઈ ગઈ હતી. ચારેય બસો પર એક જ નંબર પ્લેટનો ઉપયોગ થતો હોવાનું સામે આવ્યું હતું. આ ચાર બસોની અંદાજિત કિંમત રૂ. 65 લાખ હોવાનું પોલીસે જણાવ્યું છે.

તપાસ દરમિયાન માત્ર ચાર બસો જ નહીં પરંતુ અન્ય પાંચ લક્ઝરી બસો અને એક મારુતિ વાન પણ શંકાસ્પદ હાલતમાં મળી આવ્યા હતા. પોલીસે BNSSની કલમ 106 હેઠળ શંકાસ્પદ મિલકત તરીકે કુલ પાંચ બસો અને એક વાન સહિત અંદાજે રૂ. 75.50 લાખની સંપત્તિ કબજે લીધી હતી. ઉપરાંત સ્થળ પરથી જુદા જુદા વાહનોમાં ઉપયોગ માટે તૈયાર રાખવામાં આવેલી કુલ 31 ડુપ્લિકેટ નંબર પ્લેટો પણ જપ્ત કરવામાં આવી હતી.

આ કાર્યવાહી દરમિયાન પોલીસે ટ્રાવેલ્સ સંચાલક અલ્પેશભાઈ ઉર્ફે ટોનુભાઈ નવીનચંદ્ર જયસ્વાલ તથા તેમના પુત્ર પાવનભાઈ અલ્પેશભાઈ જયસ્વાલ (બંને રહે. જેતપુર)ની પણ ધરપકડ કરી હતી. આ રીતે પોલીસે કુલ ત્રણ આરોપીઓને કાયદાના હવાલે કર્યા છે.

પોલીસ તપાસમાં સામે આવ્યું છે કે આરોપીઓ એક જ રજીસ્ટ્રેશન નંબરનો ઉપયોગ કરીને અનેક બસો ગેરકાયદેસર રીતે રાજ્યભરમાં દોડાવતા હતા. આ પદ્ધતિથી તેઓ વાહન નોંધણી, રોડ ટેક્સ અને અન્ય સરકારી કરની મોટા પાયે ચોરી કરતા હતા. સાથે જ પોલીસ, આરટીઓ અને અન્ય સરકારી એજન્સીઓને ખોટી માહિતી આપી ભ્રમિત કરવાનો પ્રયાસ પણ કરવામાં આવતો હતો. આવા કૌભાંડથી સરકારને લાખો રૂપિયાનું આર્થિક નુકસાન થવાની સંભાવના વ્યક્ત કરવામાં આવી રહી છે.

આ સમગ્ર મામલે જેતપુર ઉદ્યોગનગર પોલીસે ત્રણેય આરોપીઓ સામે ભારતીય ન્યાય સંહિતા (BNS)-2023ની કલમ 318(4) (છેતરપિંડી), 336(2), 336(3), 340(2) (ખોટા દસ્તાવેજો અને નંબર પ્લેટ બનાવવી) ઉપરાંત મોટર વ્હીકલ એક્ટની કલમ 39 અને 192 હેઠળ ગુનો નોંધી વધુ તપાસ શરૂ કરી છે.

પોલીસ હવે જપ્ત કરાયેલા તમામ વાહનોના માલિકો, તેમના આરટીઓ રેકોર્ડ, ટેક્સ ભરપાઈની વિગતો તેમજ આ રેકેટમાં અન્ય કોઈ વ્યક્તિ અથવા ટ્રાવેલ્સ સંચાલકો સંડોવાયેલા છે કે નહીં તે દિશામાં પણ તપાસ આગળ ધપાવી રહી છે. આ કૌભાંડનો વ્યાપ અન્ય જિલ્લાઓ સુધી ફેલાયેલો હોવાની સંભાવનાને ધ્યાનમાં રાખીને તપાસનો વ્યાપ વધુ વિસ્તૃત કરવામાં આવ્યો છે.

પ્રાથમિક દ્રષ્ટિએ આ કાર્યવાહી ટ્રાવેલ્સ ક્ષેત્રમાં ગેરરીતિઓ સામે જેતપુર પોલીસની સૌથી મોટી કાર્યવાહી પૈકીની એક માનવામાં આવી રહી છે. ડુપ્લિકેટ નંબર પ્લેટનો ઉપયોગ કરીને વાહનો ચલાવવાના આવા ગેરકાયદેસર કૃત્યો સામે હવે પોલીસ વધુ કડક કાર્યવાહી કરશે તેવા સંકેતો પણ આ ઓપરેશનથી મળ્યા છે.

ફોટો અને અહેવાલ: માનસી સાવલિયા, જેતપુર.