ક્રાઇમ જામનગરમાં સિટી 'એ' ડિવિઝન પોલીસનો દરોડો: મહાપ્રભુજી બેઠક નજીક વેગેનઆર કારમાંથી 108 દારૂની બોટલો સાથે દંપતી ઝડપાયું, રૂ. 5.86 લાખનો મુદ્દામાલ કબજે.
શહેરમાં દારૂની હેરાફેરી રોકવા માટે પોલીસ દ્વારા ચલાવવામાં આવી રહેલા અભિયાન હેઠળ સિટી 'એ' ડિવિઝન પોલીસ સ્ટેશનની સર્વેલન્સ ટીમને વધુ એક મહત્વની સફળતા મળી છે. મહાપ્રભુજીની બેઠક નજીકથી એક વેગેનઆર કારમાંથી વિદેશી દારૂનો જથ્થો ઝડપી પાડવામાં આવ્યો છે. પોલીસે કારમાં સવાર દંપતીની ધરપકડ કરીને દારૂ, કાર અને મોબાઇલ ફોન સહિત કુલ રૂ. 5,86,400નો મુદ્દામાલ કબજે કરી વધુ તપાસ હાથ ધરી છે.
પોલીસ પાસેથી મળતી માહિતી મુજબ, સિટી 'એ' ડિવિઝનની સર્વેલન્સ ટીમના વિજયભાઈ કાનાણી, યોગેન્દ્રસિંહ સોઢા અને રવિરાજસિંહ જાડેજાને બાતમી મળી હતી કે ઠેબા ચોકડી તરફથી મહાપ્રભુજીની બેઠક તરફ એક સફેદ રંગની વેગેનઆર કારમાં દારૂનો જથ્થો લઈ જવામાં આવી રહ્યો છે.
બાતમીને આધારે પોલીસ ટીમે મહાપ્રભુજીની બેઠક તરફ જતાં માર્ગ પર વોચ ગોઠવી હતી. થોડા સમય બાદ GJ-06-EQ-2315 નંબરની સફેદ રંગની મારુતિ સુઝુકી વેગેનઆર કાર દેખાતા પોલીસે તેને અટકાવી તપાસ હાથ ધરી હતી.
કારની સઘન તલાશી દરમિયાન પોલીસે કારમાં બનાવેલા ગુપ્ત ચોરખાનામાંથી ઇંગ્લિશ દારૂની કુલ 108 બોટલો મળી આવી હતી. જપ્ત કરાયેલા દારૂની અંદાજિત કિંમત રૂ. 56,400 હોવાનું પોલીસે જણાવ્યું છે. ઉપરાંત કારમાંથી ત્રણ મોબાઇલ ફોન, જેની કિંમત અંદાજે રૂ. 30,000, પણ કબજે કરવામાં આવ્યા હતા. પોલીસે દારૂની હેરાફેરીમાં ઉપયોગમાં લેવાયેલી અંદાજે રૂ. 5 લાખ કિંમતની મારુતિ સુઝુકી વેગેનઆર કાર પણ જપ્ત કરી હતી.
આ કાર્યવાહી દરમિયાન પોલીસે કારમાં સવાર વિનોદ નાનજીભાઈ દામા (ઉંમર 38 વર્ષ) અને તેમની પત્ની પ્રિયાબેન વિનોદ દામા (ઉંમર 37 વર્ષ), બંને રહેવાસી દિગ્વિજય પ્લોટ-59, ડૉ. કટારિયા સાહેબના દવાખાના નજીક, જામનગર,ને સ્થળ પરથી જ ઝડપી પાડ્યા હતા.
પોલીસે દારૂ, મોબાઇલ ફોન અને કાર સહિત કુલ રૂ. 5,86,400નો મુદ્દામાલ કબજે કરીને બંને આરોપીઓ સામે સંબંધિત કલમો હેઠળ ગુનો નોંધી વધુ પૂછપરછ શરૂ કરી છે. તપાસ દરમિયાન દારૂનો જથ્થો ક્યાંથી લાવવામાં આવ્યો હતો, કોને પહોંચાડવાનો હતો અને આ હેરાફેરીમાં અન્ય કોણ સંડોવાયેલા છે તે અંગે પણ તપાસનો દોર શરૂ કરવામાં આવ્યો છે.
આ સમગ્ર કાર્યવાહી સિટી 'એ' ડિવિઝન પોલીસ સ્ટેશનના પોલીસ ઇન્સ્પેક્ટર વિપુલસિંહ ડોડીયાના માર્ગદર્શન હેઠળ હાથ ધરવામાં આવી હતી. સર્વેલન્સ ટીમના વિજયભાઈ કાનાણી, યોગેન્દ્રસિંહ સોઢા અને રવિરાજસિંહ જાડેજાને મળેલી ચોક્કસ બાતમીના આધારે સફળ દરોડો પાડીને દારૂની હેરાફેરીનો પ્રયાસ નિષ્ફળ બનાવવામાં આવ્યો હતો.
જામનગર શહેરમાં દારૂના ગેરકાયદે વેપાર અને હેરાફેરી સામે પોલીસ દ્વારા સતત કડક કાર્યવાહી કરવામાં આવી રહી છે. પોલીસ અધિકારીઓએ જણાવ્યું છે કે શહેરમાં આવા ગેરકાયદેસર ધંધા સામે આગળ પણ સઘન ચેકિંગ અને દરોડાની કામગીરી યથાવત રાખવામાં આવશે, જેથી કાયદો અને વ્યવસ્થા જળવાઈ રહે.
