જાહેરાત
તાજા સમાચાર
અમદાવાદમાં અમિત શાહના હસ્તે ₹1,400 કરોડથી વધુના 30 વિકાસ પ્રકલ્પોનું લોકાર્પણ અને ખાતમુહૂર્ત: 9 હજારથી વધુ પરિવારોને મળશે પાકા મકાનો. | સુરતમાં નાયબ મુખ્યમંત્રી હર્ષ સંઘવીની ઉપસ્થિતિમાં દીપાવલી અને વિક્રમ સંવત ૨૦૮૩ના નૂતન વર્ષનો સ્નેહમિલન સમારોહ યોજાયો. | દિવાળી બાદ અમદાવાદમાં વાયુ પ્રદૂષણનો પ્રકોપ: 17 વિસ્તારોમાં AQI 200ને પાર, થલતેજ સૌથી વધુ પ્રદૂષિત. | કાળી ચૌદશે દેવભૂમિ દ્વારકાના કજુરડા-વિજયનગરના સ્મશાનમાં યોજાયો ‘જ્યોત જલાવો, ભૂત ભગાવો’ કાર્યક્રમ. | ભાણવડના શિવ બળદ આશ્રમમાં અનોખી દિવાળીની ઉજવણી: દાતાઓના સહયોગથી અશક્ત અને નિરાધાર બળદોને પૌષ્ટિક ખોળ ખવડાવી જીવદયાનો સંદેશ. | ગુજરાતમાં ભ્રષ્ટાચારનો ચોંકાવનારો ચહેરો: એક વર્ષમાં 152 સરકારી કર્મચારીઓ લાંચ લેતા ઝડપાયા, રૂ. 13 કરોડની લાંચનો ખુલાસો. | મીની મથુરા માધવપુર ઘેડમાં ભાઈબીજના પર્વે ઉમટશે શ્રદ્ધાળુઓનો મહેરામણ. | મીની મથુરા માધવપુર ઘેડમાં ભાઈબીજના પર્વે ઉમટશે શ્રદ્ધાળુઓનો મહેરામણ. | માધવપુર SBI બેંકમાં નવી ચલણી નોટોની અછતથી ગ્રાહકોમાં નારાજગી: દિવાળીના તહેવારમાં નવી નોટો માટે લોકોની માંગ તેજ. | ગીરના જંગલમાં વધુ 100 જીપ્સી ઉમેરવાની કવાયત સામે વિરોધ: વન્યજીવોની સુરક્ષા અને પર્યાવરણ પર વધતા પ્રવાસન ભારણ અંગે ચિંતા. |
પાછા મુખ્ય સમાચાર પર
ક્રાઇમ ૧૯૬ વાર જોવાયેલ • 4 મહિના પેહલા

ક્રાઇમ જૂની અદાવતમાં જામનગરમાં યુવક પર ધારીયાથી જીવલેણ હુમલો, ગળા અને ગરદનમાં ગંભીર ઇજાઓ

જૂની અદાવતમાં જામનગરમાં યુવક પર ધારીયાથી જીવલેણ હુમલો, ગળા અને ગરદનમાં ગંભીર ઇજાઓ

જામનગર શહેરમાં જૂની અદાવતના ખારને લઈ જાહેર માર્ગ પર એક યુવક પર ધારીયા વડે જીવલેણ હુમલો કરવામાં આવ્યો હોવાની ચોંકાવનારી ઘટના સામે આવી છે. ચાલતી રિક્ષામાંથી ઉતરી આરોપીએ યુવકના ગળા અને ગરદન પર એક પછી એક ઘા ઝીંકતા ભારે રક્તસ્ત્રાવ થયો હતો. ગંભીર રીતે ઇજાગ્રસ્ત બનેલા યુવકને તાત્કાલિક સારવાર માટે જી.જી. હોસ્પિટલમાં ખસેડવામાં આવ્યો હતો. સમગ્ર મામલે પોલીસ ફરિયાદ નોંધાઈ છે અને વધુ તપાસ હાથ ધરવામાં આવી રહી છે.

પ્રાપ્ત વિગતો મુજબ, જામનગરના કિશન ચોક વિસ્તારમાં મકરાણી કબ્રસ્તાન નજીક રહેતા અને વાહનોની લે-વેચનો વ્યવસાય કરતા શહેઝાદભાઈ સલીમભાઈ મકરાણી તા. 20 જૂનના રોજ પોતાના મિત્ર નઈમ યુસુફભાઈ બ્લોચ સાથે મોટરસાયકલ પર પવનચક્કી વિસ્તારથી ઘરે પરત ફરી રહ્યા હતા.

દરમિયાન તેઓ હર્ષદ મિલની ચાલી નજીક આવેલી રજવાડી હોટલ સામે પહોંચ્યા હતા ત્યારે પાછળથી આવેલી એક રિક્ષા તેમની બાજુમાં આવી હતી. ફરિયાદ અનુસાર, રિક્ષાની પાછળની સીટમાં બેઠેલા કામીલ જાનમામદ બ્લોચ (રહે. ટીટોડીવાડી, જામનગર)ના હાથમાં લોખંડનું ધારીયું હતું.

આરોપીએ ચાલતી રિક્ષામાંથી જ અચાનક શહેઝાદભાઈના ગળાના આગળના ભાગે ધારીયાનો જોરદાર ઘા ઝીંક્યો હતો. હુમલાથી ગભરાઈ ગયેલા શહેઝાદભાઈએ મોટરસાયકલની ગતિ ધીમી કરી દીધી હતી. તે જ સમયે રિક્ષા પણ ધીમી પડતાં કામીલ બ્લોચ રિક્ષામાંથી નીચે ઉતરી આવ્યો હતો અને ફરી એક વખત ધારીયાથી તેમની ગરદનના પાછળના ભાગે હુમલો કર્યો હતો.

અચાનક થયેલા હુમલાના કારણે મોટરસાયકલ પાછળ બેઠેલા મિત્ર નઈમ યુસુફભાઈ બ્લોચ રસ્તા પર પડી ગયા હતા. જોકે આરોપી ત્યાં અટક્યો નહોતો. ફરિયાદ મુજબ તેણે ત્રીજો ઘા મારી શહેઝાદભાઈના ડાબા ખભાના ભાગે ગંભીર ઇજા પહોંચાડી હતી.

હુમલા દરમિયાન કામીલ બ્લોચે ગાળો ભાંડી ખુલ્લેઆમ જાનથી મારી નાખવાની ધમકી પણ આપી હતી. “આજે તને જાનથી મારી નાખવો છે” તેમ કહી તે ફરિયાદીની પાછળ દોડ્યો હોવાનું ફરિયાદમાં જણાવાયું છે.

બીજી તરફ, હુમલામાં સામેલ રિક્ષા ચાલકે પણ રિક્ષામાંથી બીજું લોખંડનું ધારીયું બહાર કાઢી મિત્ર નઈમની પાછળ દોડ લગાવી હતી. જોકે કામીલ બ્લોચે તેને નઈમને નહીં પરંતુ શહેઝાદને નિશાન બનાવવાનું હોવાનું જણાવ્યું હતું, જેના કારણે સમગ્ર હુમલો પૂર્વયોજિત હોવાની શંકા વધુ મજબૂત બની રહી છે.

જીવ બચાવવા માટે શહેઝાદભાઈ ત્યાંથી મોટરસાયકલ લઈને નીલકંઠનગર સોસાયટી તરફ ભાગી છૂટ્યા હતા. હુમલાના કારણે તેમના ગળા અને ગરદનમાંથી ભારે રક્તસ્ત્રાવ શરૂ થયો હતો. ઘટનાને પગલે આસપાસના લોકો એકત્ર થયા હતા અને તાત્કાલિક 108 ઇમરજન્સી એમ્બ્યુલન્સ સેવાને જાણ કરવામાં આવી હતી.

ત્યારબાદ ઇજાગ્રસ્ત શહેઝાદભાઈને સારવાર માટે જામનગરની જી.જી. હોસ્પિટલ ખાતે ખસેડવામાં આવ્યા હતા, જ્યાં તેમની તબીબી સારવાર શરૂ કરવામાં આવી હતી. તબીબોના જણાવ્યા મુજબ ગળા અને ગરદન જેવા સંવેદનશીલ ભાગોમાં ઇજા પહોંચતા મામલો ગંભીર ગણાય છે.

બનાવ અંગેની ફરિયાદના આધારે પોલીસે આરોપી કામીલ જાનમામદ બ્લોચ તેમજ હુમલામાં સંડોવાયેલા રિક્ષા ચાલક વિરુદ્ધ ગુનો નોંધવાની કાર્યવાહી હાથ ધરી છે. હુમલાના કારણો, જૂની અદાવતની હકીકતો તેમજ અન્ય સંડોવાયેલા શખ્સોની ભૂમિકા અંગે તપાસ શરૂ કરવામાં આવી છે.

જાહેર માર્ગ પર દિવસદાઢે બનેલી આ ઘટનાએ શહેરમાં કાયદો અને વ્યવસ્થાની સ્થિતિ અંગે ચર્ચા જગાવી છે. પોલીસ દ્વારા આરોપીઓને ઝડપી પાડવા તેમજ સમગ્ર ઘટનાક્રમના તમામ પાસાઓની તપાસ માટે કાર્યવાહી તેજ કરવામાં આવી હોવાનું જાણવા મળે છે.

આ સમાચાર શેર કરો:
સમય સંદેશ મેનુ