મારું શહેર બોગસ સહકારી મંડળીઓના નામે ખેડૂતો સાથે દસ્તાવેજી કૌભાંડનો આક્ષેપ, તાત્કાલિક તપાસ અને કાર્યવાહીની માંગ.

જૂનાગઢ જિલ્લાના વિસાવદર તાલુકાના કાલસારી ગામમાં બોગસ સહકારી મંડળીઓના નામે ખેડૂતોની જમીન સંબંધિત દસ્તાવેજોમાં ગેરરીતિ અને છેતરપીંડી થયાના ગંભીર આક્ષેપો સામે આવ્યા છે. કાલસારી ગામના ખેડૂત રતિલાલ વધાસિયા દ્વારા રાજ્ય સરકાર અને સંબંધિત વિભાગોને લેખિત અરજી આપી સમગ્ર મામલે નિષ્પક્ષ તપાસ કરી દોષિતો સામે કડક કાર્યવાહી કરવાની માંગ કરવામાં આવી છે.

અરજીમાં જણાવ્યા મુજબ, અરજદારની સર્વે નંબર 169/પૈકી-2ની જમીન સંબંધિત દસ્તાવેજોમાં તેમની જાણ બહાર પ્રક્રિયા કરવામાં આવી હોવાનું જણાવાયું છે. અરજદારનો દાવો છે કે તેમણે ક્યારેય પોતાના આધાર કાર્ડ કે અન્ય જરૂરી દસ્તાવેજોના આધારે કોઈ સહકારી સંસ્થા માટે નોંધણી કરાવી નથી, તેમજ કોઈપણ પ્રકારના દસ્તાવેજો પર સહી કે અંગૂઠાનું નિશાન કર્યું નથી.

અરજીમાં વધુ આક્ષેપ કરવામાં આવ્યો છે કે સંબંધિત સહકારી સંસ્થાઓ અને કેટલાક વ્યક્તિઓ દ્વારા ખોટા હસ્તાક્ષરો તથા અંગૂઠાના નિશાનનો ઉપયોગ કરીને દસ્તાવેજી પ્રક્રિયા પૂર્ણ કરવામાં આવી છે. અરજદારના જણાવ્યા મુજબ, આ સમગ્ર કાર્યવાહી તેમની જાણ બહાર કરવામાં આવી હોવાથી તેઓ છેતરપીંડીનો ભોગ બન્યા છે.

રતિલાલ વધાસિયાએ અરજીમાં સ્પષ્ટ જણાવ્યું છે કે તેઓ ક્યારેય કોઈ સહકારી મંડળીના સભ્ય રહ્યા નથી. તેમ છતાં, તેમના નામે દસ્તાવેજી પ્રક્રિયા કરવામાં આવી હોવાનો તેમને આક્ષેપ છે. તેમણે આ સમગ્ર મામલામાં કાલસારી ગામના કેટલાક લોકોની સંડોવણી હોવાનો પણ દાવો કર્યો છે.

અરજદારનું કહેવું છે કે સમગ્ર મામલે જિલ્લા રજિસ્ટ્રાર કચેરી અને પોલીસ વિભાગ સમક્ષ રજૂઆતો કરવા છતાં હજુ સુધી કોઈ અસરકારક કાર્યવાહી કરવામાં આવી નથી. જેના કારણે ખેડૂતોમાં ભારે રોષ જોવા મળી રહ્યો હોવાનું પણ અરજીમાં ઉલ્લેખ કરવામાં આવ્યો છે.

અરજીમાં વધુમાં એવો પણ આક્ષેપ કરવામાં આવ્યો છે કે આ કેસમાં સંડોવાયેલા એક વ્યક્તિ રાજકીય પક્ષ સાથે જોડાયેલા હોવાથી કાર્યવાહી પ્રભાવિત થઈ રહી છે. જોકે, આ આક્ષેપોની સ્વતંત્ર રીતે કોઈ સત્તાવાર પુષ્ટિ થઈ નથી.

ખેડૂત રતિલાલ વધાસિયાએ રાજ્ય સરકાર, જિલ્લા વહીવટી તંત્ર, જિલ્લા રજિસ્ટ્રાર અને પોલીસ વિભાગને સમગ્ર પ્રકરણની નિષ્પક્ષ અને ઊંડાણપૂર્વક તપાસ કરાવવાની માંગ કરી છે. તેમણે દોષિતો સામે કાયદેસરની કાર્યવાહી કરીને નિર્દોષ ખેડૂતોને ન્યાય અપાવવાની અપીલ કરી છે.

હાલ આ મામલે સંબંધિત સરકારી વિભાગો તરફથી કોઈ સત્તાવાર નિવેદન જાહેર કરવામાં આવ્યું નથી. જો કે, અરજદાર દ્વારા કરવામાં આવેલા આક્ષેપોની તપાસ બાદ જ સમગ્ર ઘટનાક્રમ અંગે સ્પષ્ટતા થઈ શકશે. તેથી આક્ષેપોને હાલ ફરિયાદના દાવા તરીકે જ જોવામાં આવી રહ્યા છે.

રિપોર્ટ હરેશમહેતા વિસાવદર