ક્રાઇમ હું 100 લોકોને લઈને આવીશ... તમને જોઈ લઈશ! જામનગરમાં વીજ ચેકિંગ ટીમને ધમકી, મહિલા ઇજનેરને રૂમમાં પૂરી ડખ્ખો.
જામનગર શહેરના વાઘેરવાડા વિસ્તારમાં વીજ ચેકિંગ માટે ગયેલી પીજીવીસીએલ (PGVCL)ની ટીમ સાથે ગંભીર ગેરવર્તન અને સરકારી ફરજમાં અવરોધ ઉભો કર્યાનો બનાવ સામે આવ્યો છે. વીજ ચોરી ઝડપાઈ જતાં ઉશ્કેરાયેલા આરોપીઓએ મહિલા જૂનિયર ઇજનેર સાથે ઝપાઝપી કરી તેમને રૂમમાં પૂરી દેતા તેમજ સમગ્ર ટીમને ધમકીઓ આપતા મામલો પોલીસ મથકે પહોંચ્યો છે. આ ઘટનાને લઈને શહેરમાં સરકારી કર્મચારીઓની સુરક્ષા અંગે પણ ચર્ચા શરૂ થઈ છે.
પ્રાપ્ત વિગતો મુજબ જામનગરના લાલવાડી સમૃદ્ધિ પાર્ક વિસ્તારમાં રહેતા અને દરબારગઢ સબ ડિવિઝનમાં જૂનિયર ઇજનેર તરીકે ફરજ બજાવતા કોમલ રવિ ચંદારાણા (ઉ.વ. 37) પોતાના સ્ટાફ સાથે તા. 4 જુલાઈના રોજ વાઘેરવાડાના ભાયાનો ડેલો વિસ્તારમાં વીજ જોડાણોની નિયમિત તપાસ માટે પહોંચ્યા હતા. ચેકિંગ દરમિયાન એક મકાનમાં શંકાસ્પદ સ્થિતિ જણાતા ટીમ તપાસ માટે અંદર પ્રવેશી હતી.
ફરિયાદ મુજબ તપાસ શરૂ થતાં જ મકાનમાં રહેલી એક મહિલા ઉતાવળમાં ઉપરના માળે દોડી ગઈ હતી. શંકાના આધારે મહિલા ઇજનેર અને અન્ય સ્ટાફ પણ ઉપર તપાસ કરવા પહોંચ્યા હતા. તપાસ દરમિયાન વીજ ચોરી થતી હોવાના પુરાવા મળ્યા હોવાનું ફરિયાદમાં જણાવાયું છે. નિયમ મુજબ વીજ ઉપકરણો અને કનેક્શનનો વીડિયો રેકોર્ડ કરવામાં આવી રહ્યો હતો.
આ દરમિયાન આરોપી મુર્તુઝા મુનાવર ભાયાએ ઉશ્કેરાઈ જઈ મહિલા ઇજનેર સાથે ઝપાઝપી કરી હતી અને વીડિયો બનાવવાનો વિરોધ કર્યો હતો. ફરિયાદ અનુસાર આરોપીઓએ મહિલા કર્મચારીને રૂમમાં ધકેલી બહારથી દરવાજો બંધ કરી દીધો હતો. ઘટનાના પગલે સ્થળ પર હાજર અન્ય સ્ટાફમાં પણ ભારે દોડધામ મચી ગઈ હતી. બાદમાં હાજર એસ.આર.પી. જવાનો અને પોલીસના એ.એસ.આઈ.એ દરવાજો ખોલાવી મહિલા ઇજનેરને સુરક્ષિત બહાર કાઢ્યા હતા.
ફરિયાદમાં વધુમાં જણાવાયું છે કે આરોપી મુનાવર જુસબ ભાયાએ સમગ્ર વીજ ટીમને ધમકી આપતાં કહ્યું હતું કે, "હું 100 લોકોને લઈને આવીશ, તમને જોઈ લઈશ." ઉપરાંત ટીમ સાથે ગાળાગાળી કરી સરકારી કામગીરીમાં અવરોધ ઉભો કર્યો હોવાનું પણ ફરિયાદમાં નોંધાયું છે. ઘટનાના કારણે થોડા સમય માટે વિસ્તારમાં તંગદિલીનો માહોલ સર્જાયો હતો.
આ બનાવને પગલે કોમલ ચંદારાણાએ સિટી 'એ' ડિવિઝન પોલીસ સ્ટેશનમાં મુનાવર જુસબ ભાયા, મુર્તુઝા મુનાવર ભાયા અને એક અજાણી મહિલા સામે ફરિયાદ નોંધાવી છે. પોલીસે સરકારી કર્મચારીને ફરજ બજાવતા અટકાવવી, ધમકી આપવી, ઝપાઝપી કરવી અને અન્ય સંબંધિત કલમો હેઠળ ગુનો નોંધી તપાસ શરૂ કરી છે. પોલીસે ઘટનાસ્થળે હાજર સાક્ષીઓના નિવેદનો તેમજ ઉપલબ્ધ પુરાવાઓ એકત્ર કરવાની કાર્યવાહી હાથ ધરી છે.
વીજ ચોરી સામે ચાલતી કાર્યવાહીમાં સરકારી અધિકારીઓ સાથે આ પ્રકારની ગેરવર્તન અને ધમકીની ઘટનાઓ ચિંતાજનક માનવામાં આવી રહી છે. પોલીસ સમગ્ર ઘટનાની તમામ દિશામાં તપાસ કરી રહી છે અને પુરાવાના આધારે આગળની કાયદેસરની કાર્યવાહી કરવામાં આવશે. બીજી તરફ વીજ વિભાગના અધિકારીઓએ પણ આવી ઘટનાઓ સામે કડક વલણ અપનાવવાની જરૂરિયાત પર ભાર મૂક્યો છે, જેથી સરકારી કર્મચારીઓ નિર્ભય રીતે પોતાની ફરજ બજાવી શકે.
