ક્રાઇમ ઓખાના સુદર્શન સેતુ પાસે પર્દાફાશ થયેલા જીએસટી કૌભાંડમાં મોટો ખુલાસો: વડોદરા, ભરૂચ અને મુંબઈના 7 શખ્સ એલસીબીના હાથે ઝડપાયા.
દેવભૂમિ દ્વારકા જિલ્લામાં ઓખા સ્થિત સુદર્શન સેતુ નજીક બહાર આવેલા કરોડો રૂપિયાના સંભવિત જીએસટી કૌભાંડમાં દ્વારકા જિલ્લા લોકલ ક્રાઈમ બ્રાન્ચ (એલસીબી)ને મોટી સફળતા મળી છે. સરકારમાં ભરવાના થતા કરની રકમથી બચવા માટે વાહનોના ખોટા દસ્તાવેજો, નકલી નંબર પ્લેટ અને ઈ-વે બિલનો ઉપયોગ કરીને છેતરપિંડી આચરતી આંતરરાજ્ય ટોળકીના વડોદરા, ભરૂચ અને મુંબઈના સાત શખ્સોની પોલીસે ધરપકડ કરી છે. કાર્યવાહી દરમિયાન પોલીસે બે આઈસર ટ્રક, બે કાર, ભંગારનો જથ્થો, મોબાઇલ ફોન, રોકડ રકમ સહિત કુલ રૂ. 58.86 લાખથી વધુનો મુદ્દામાલ કબ્જે કરીને વધુ તપાસ શરૂ કરી છે.
પ્રાપ્ત માહિતી મુજબ થોડા દિવસો અગાઉ ઓખા સ્થિત સુદર્શન સેતુ પાસે પોલીસે એક આઈસર વાહનની ચકાસણી દરમિયાન શંકાસ્પદ દસ્તાવેજો અને વાહનની નંબર પ્લેટમાં ગેરરીતિ હોવાનું ધ્યાનમાં આવ્યું હતું. પ્રાથમિક તપાસમાં જાણવા મળ્યું હતું કે વાહનના નંબર અને દસ્તાવેજોમાં ફેરફાર કરીને સરકારને ચૂકવવાના જીએસટી સહિતના કરમાં છેતરપિંડી કરવામાં આવી રહી હતી. ત્યારબાદ સ્થાનિક પોલીસમાં વિધિવત ફરિયાદ નોંધાયા બાદ સમગ્ર તપાસ દ્વારકા જિલ્લા એલસીબીને સોંપવામાં આવી હતી.
એલસીબીની સઘન તપાસમાં સામે આવ્યું કે આરોપીઓએ પૂર્વ આયોજિત કાવતરાના ભાગરૂપે ઓખા દરિયાકાંઠે તૈયાર કરાયેલા કામચલાઉ પ્લેટફોર્મમાંથી નીકળતા લોખંડના ભંગારના પરિવહન માટે બે એકસરખા દેખાવવાળા આઈસર વાહનોનો ઉપયોગ કર્યો હતો. એક વાહનમાં ક્ષમતા મુજબ રેતી અને સિમેન્ટના બ્લોક્સ ભરવામાં આવતા હતા, જ્યારે બીજા વાહનમાં ભારે વજનનો લોખંડનો ભંગાર ભરવામાં આવતો હતો. ત્યારબાદ બંને વાહનોની નંબર પ્લેટમાં છેડછાડ કરીને ઓછી કિંમત અને ઓછા વજનના માલવાળી ગાડીના દસ્તાવેજોના આધારે ભંગાર ભરેલી ગાડી માટે ઈ-વે બિલ ઓનલાઈન જનરેટ કરવામાં આવતું હતું. આ રીતે ખોટા વજન અને ખોટા દસ્તાવેજોના આધારે સરકારને ચૂકવવાના કરમાં છેતરપિંડી કરવામાં આવતી હોવાનું તપાસમાં બહાર આવ્યું છે.
આ કૌભાંડનો ભેદ ઉકેલ્યા બાદ એલસીબીએ વડોદરા, ભરૂચ અને મુંબઈ સુધી તપાસનો વ્યાપ વધારી સાત આરોપીઓને ઝડપી પાડ્યા હતા. ઝડપાયેલા આરોપીઓમાં મુકેશ બજરંગલાલ સુથાર, રવિ કુંદનભાઈ મિશ્રા, નુરમિયાં ઉર્ફે બબલુ સોકતઅલી પઠાણ, બબનકુમાર શિવકુમાર ભારદ્વાજ, દેવાંશુ નારાયણભાઈ રાજપુત, જયસુખ કાળાભાઈ વાઢેર અને હિલેરી પોલ એન્ટોની કેસ્ટેલીનો સમાવેશ થાય છે. પોલીસે તમામ આરોપીઓની પૂછપરછ શરૂ કરી છે અને આ કૌભાંડમાં અન્ય વ્યક્તિઓ અથવા કંપનીઓની સંડોવણી છે કે કેમ તે દિશામાં પણ તપાસ ચાલી રહી છે.
પોલીસે આરોપીઓ પાસેથી રૂ. 30 લાખની કિંમતના બે આઈસર ટ્રક, રૂ. 22 લાખની કિંમતની બે કાર, રૂ. 42 હજારની રોકડ રકમ, રૂ. 60 હજારની કિંમતના 11 મોબાઇલ ફોન તેમજ રૂ. 5.74 લાખની કિંમતનો અંદાજે 28,700 કિલોગ્રામ લોખંડનો ભંગાર કબ્જે કર્યો છે. આમ કુલ રૂ. 58.86 લાખથી વધુનો મુદ્દામાલ જપ્ત કરીને તમામ વસ્તુઓ કાયદેસરની કાર્યવાહી હેઠળ કબજે લેવામાં આવી છે.
પ્રાથમિક પૂછપરછમાં આરોપીઓએ એકસરખા દેખાતા બે વાહનો ભાડે મેળવી સમગ્ર કાવતરું અમલમાં મૂક્યાની કબૂલાત આપી હોવાનું પોલીસ સૂત્રોએ જણાવ્યું છે. ગાડીઓના નંબર બદલવા, નકલી દસ્તાવેજો તૈયાર કરવા અને ઓનલાઈન ઈ-વે બિલ જનરેટ કરીને માલસામાનના વજનમાં ગેરરીતિ દર્શાવી સરકારને આર્થિક નુકસાન પહોંચાડવાની મોડસ ઓપરેન્ડી અપનાવવામાં આવતી હતી. આ સમગ્ર પ્રક્રિયા ખૂબ જ આયોજનબદ્ધ રીતે કરવામાં આવતી હોવાથી શરૂઆતમાં કોઈને શંકા ન જાય તે રીતે કામગીરી ચલાવવામાં આવતી હતી.
દ્વારકા જિલ્લા એલસીબી દ્વારા નોંધાયેલા આ કેસમાં સરકાર સામે વિશ્વાસઘાત, છેતરપિંડી, ખોટા દસ્તાવેજો તૈયાર કરવા, વાહનના નંબર પ્લેટમાં ગેરકાયદેસર ફેરફાર કરવા તેમજ જીએસટી સંબંધિત નિયમોના ભંગ સહિતની વિવિધ કાયદાકીય જોગવાઈઓ હેઠળ કાર્યવાહી કરવામાં આવી રહી છે. પોલીસ હવે આ કૌભાંડનું નેટવર્ક કેટલું વિસ્તૃત છે, અગાઉ પણ આવી રીતે કરચોરી કરવામાં આવી હતી કે કેમ, તેમાં અન્ય રાજ્યોના લોકો અથવા કંપનીઓ સંડોવાયેલા છે કે નહીં તેમજ સરકારને કેટલા પ્રમાણમાં આવકનું નુકસાન થયું છે તે સહિતના તમામ પાસાઓની ઊંડાણપૂર્વક તપાસ કરી રહી છે.
