મારું શહેર ચોમાસા પૂર્વે રાજ્ય સરકાર એલર્ટ: શાળાઓ માટે 32 મુદ્દાની સેફ્ટી ગાઈડલાઈન અમલમાં, જામનગરની તમામ શાળાઓને DEOએ આપ્યા કડક નિર્દેશ.

ગુજરાતમાં ચોમાસાની શરૂઆત અને નવા શૈક્ષણિક સત્રને ધ્યાનમાં રાખીને રાજ્ય સરકારના શિક્ષણ વિભાગે રાજ્યની તમામ સરકારી, ગ્રાન્ટેડ અને ખાનગી શાળાઓ માટે 32 મુદ્દાની વિશેષ સેફ્ટી ગાઈડલાઈન જાહેર કરી. વિદ્યાર્થીઓની સુરક્ષાને સર્વોચ્ચ પ્રાથમિકતા આપતા આ માર્ગદર્શિકાનો રાજ્યભરમાં કડક અમલ કરવા સૂચના આપવામાં આવી. જામનગર જિલ્લામાં પણ આ અંગે તમામ શાળાઓને જરૂરી સૂચનાઓ આપવામાં આવી હોવાનું જિલ્લા શિક્ષણાધિકારી (DEO) વિપુલ મહેતાએ જણાવ્યું.

શિક્ષણ વિભાગ દ્વારા બહાર પાડવામાં આવેલી માર્ગદર્શિકા મુજબ ચોમાસા દરમિયાન ભારે વરસાદ, પાણી ભરાવા, વીજ અકસ્માત, જર્જરિત ઈમારતો અને અન્ય કુદરતી આફતોને ધ્યાનમાં રાખીને દરેક શાળાએ આગોતરા સુરક્ષા વ્યવસ્થા સુનિશ્ચિત કરવાની રહેશે. વરસાદ શરૂ થાય તે પહેલાં શાળાના તમામ સમારકામના કામો પૂર્ણ કરી શાળા પરિસરને સંપૂર્ણપણે સુરક્ષિત બનાવવાનો નિર્દેશ આપવામાં આવ્યો.

માર્ગદર્શિકા અનુસાર શાળામાં લટકતા વીજ વાયરો, ખુલ્લા ઇલેક્ટ્રિક ફિટિંગ્સ, તૂટેલી દિવાલો, લીકેજવાળી છત અને અન્ય જોખમી માળખાકીય ખામીઓનું તાત્કાલિક સમારકામ કરાવવાનું રહેશે. જો જરૂરી હોય તો સ્થાનિક સ્વરાજ્ય સંસ્થાઓ, વીજ વિભાગ અથવા અન્ય સરકારી વિભાગોની મદદ લઈને કામગીરી પૂર્ણ કરવાની પણ સૂચના આપવામાં આવી.

ચોમાસામાં છત પર પાણી ભરાવાની સમસ્યા ટાળવા માટે તમામ શાળાઓને વોટર સ્પાઉટ અને વરસાદી પાણીના નિકાલની વ્યવસ્થાની સફાઈ કરવાનો આદેશ આપવામાં આવ્યો. શાળાના મેદાન તેમજ પરિસરમાં ક્યાંય પાણી ભરાઈ ન રહે તે માટે યોગ્ય ડ્રેનેજ વ્યવસ્થા સુનિશ્ચિત કરવાની રહેશે. લાંબા સમય સુધી પાણી ભરાઈ રહે તો મચ્છરો અને ચેપી રોગોનો ખતરો વધતો હોવાથી સ્વચ્છતા પર વિશેષ ભાર મૂકવામાં આવ્યો.

શાળાના જૂના અને જોખમી ફર્નિચરને તાત્કાલિક દૂર કરવા તેમજ ઇલેક્ટ્રિક સુરક્ષા માટે એમસીબી (MCB) સહિતની તમામ સુરક્ષા વ્યવસ્થાઓ કાર્યરત રાખવા પણ સૂચના આપવામાં આવી. જ્યાં જોખમની શક્યતા હોય તેવા વિસ્તારોમાં ચેતવણી દર્શાવતા બોર્ડ લગાવવા તેમજ જરૂરી હોય ત્યાં બેરિકેટિંગ કરવાની ફરજ રહેશે.

વિદ્યાર્થીઓની સલામતીને ધ્યાનમાં રાખીને શાળા પરિસરમાં આવેલી અન્ડરગ્રાઉન્ડ પાણીની ટાંકીઓને હંમેશા લોક મારીને બંધ રાખવાનો સ્પષ્ટ નિર્દેશ આપવામાં આવ્યો. જેથી અકસ્માતવશ કોઈ વિદ્યાર્થી ત્યાં પહોંચી ન શકે અને દુર્ઘટનાની શક્યતા સંપૂર્ણપણે ટાળી શકાય.

રાજ્ય સરકારે દરેક શાળામાં સ્કૂલ ડિઝાસ્ટર મેનેજમેન્ટ પ્લાનનો ફરજિયાત અમલ કરવાનો નિર્ણય લીધો. ભારે વરસાદ, પૂર, વીજ અકસ્માત અથવા અન્ય કોઈ આપત્તિ સર્જાય તો તાત્કાલિક અને અસરકારક રીતે પરિસ્થિતિનો સામનો કરી શકાય તે માટે દરેક શાળાએ આગોતરો આયોજન તૈયાર રાખવાનો રહેશે. શિક્ષકો અને કર્મચારીઓને પણ આપત્તિ વ્યવસ્થાપન અંગે જરૂરી માર્ગદર્શન આપવાનું રહેશે.

માર્ગદર્શિકા મુજબ દરેક શાળાના નોટિસ બોર્ડ પર તલાટી, પ્રાથમિક આરોગ્ય કેન્દ્રના ડોક્ટર, તરવૈયા, ફાયર બ્રિગેડ, પોલીસ અને 108 એમ્બ્યુલન્સ સહિતના જરૂરી ઈમરજન્સી સંપર્ક નંબરો સ્પષ્ટ રીતે દર્શાવવાના રહેશે. જેથી કોઈપણ અચાનક પરિસ્થિતિમાં તાત્કાલિક મદદ મેળવી શકાય.

ભારે વરસાદ અથવા પૂર જેવી પરિસ્થિતિ સર્જાય ત્યારે શાળાના આચાર્ય અને શિક્ષકોને પૂર્વ મંજૂરી વિના મથક છોડવાની મનાઈ કરવામાં આવી. આપત્તિ સમયે વિદ્યાર્થીઓની સુરક્ષા અને યોગ્ય સંકલન જળવાઈ રહે તે માટે આ સૂચનાને મહત્વપૂર્ણ ગણાવવામાં આવી.

રાજ્ય સરકારે ખાસ ભાર મૂક્યો કે કોઈપણ સંજોગોમાં જર્જરિત અથવા જોખમી ઓરડાઓમાં વિદ્યાર્થીઓને બેસાડવામાં ન આવે. આવા ઓરડાઓને સંપૂર્ણપણે બંધ રાખી ત્યાં બેરિકેટિંગ તેમજ ચેતવણીના બોર્ડ લગાવવા ફરજિયાત રહેશે. જો શાળા સુધી પહોંચતા રસ્તા પર પાણી ભરાવાની સ્થિતિ સર્જાય તો તેની જાણ તાત્કાલિક વાલીઓને કરવાની અને જરૂરિયાત મુજબ શાળા સંચાલનમાં યોગ્ય નિર્ણય લેવાનો રહેશે.

જિલ્લા શિક્ષણાધિકારી વિપુલ મહેતાના જણાવ્યા મુજબ જામનગર જિલ્લાના તમામ સરકારી, ગ્રાન્ટેડ અને ખાનગી શાળાઓને રાજ્ય સરકારની 32 મુદ્દાની માર્ગદર્શિકાનો કડક અમલ કરવા સૂચનાઓ આપી દેવામાં આવી. તમામ શાળાઓમાં જરૂરી સુરક્ષા વ્યવસ્થાઓની સમીક્ષા કરવામાં આવશે અને જ્યાં ખામીઓ જોવા મળશે ત્યાં તાત્કાલિક સુધારાત્મક કાર્યવાહી કરવા પણ જણાવવામાં આવ્યું.

રાજ્ય સરકારનો આ નિર્ણય ચોમાસા દરમિયાન વિદ્યાર્થીઓની સુરક્ષા સુનિશ્ચિત કરવા માટે મહત્વપૂર્ણ માનવામાં આવી રહ્યો. શિક્ષણ વિભાગનું માનવું છે કે આગોતરા આયોજન, નિયમિત દેખરેખ અને સમયસરની કામગીરી દ્વારા વરસાદી મોસમ દરમિયાન સર્જાઈ શકતી દુર્ઘટનાઓને અટકાવી શકાય અને વિદ્યાર્થીઓને સુરક્ષિત શૈક્ષણિક વાતાવરણ ઉપલબ્ધ કરાવી શકાય.