ક્રાઇમ 30 સેકન્ડમાં 30 લાખની ચોરી, સુરતના જ્વેલરી કારખાનામાંથી બંગાળી કારીગર સોનું-હીરા લઈને ફરાર
સુરત શહેરમાં જ્વેલરી ઉદ્યોગને હચમચાવી દે તેવી ચોરીની ઘટના સામે આવી છે. શહેરના એક જ્વેલરી કારખાનામાં માત્ર 30 સેકન્ડમાં અંદાજે રૂ.30 લાખના સોના અને હીરાની ચોરી કરવામાં આવી હતી. સમગ્ર ઘટના કારખાનામાં લાગેલા સીસીટીવી કેમેરામાં કેદ થઈ ગઈ છે. પ્રાથમિક માહિતી મુજબ બંગાળી કારીગરે મેનેજરની માત્ર 10 મિનિટની ગેરહાજરીનો લાભ ઉઠાવી કિંમતી દાગીના અને હીરા લઈને ફરાર થઈ ગયો હતો.
મળતી માહિતી મુજબ ઘટનાના સમયે કારખાનાનો મેનેજર થોડા સમય માટે બહાર ગયો હતો. આ દરમિયાન આરોપી કારીગરે તકનો લાભ લઈ કારખાનામાં રહેલા સોના અને હીરાના દાગીના પોતાના કબજામાં લઈને ઝડપથી સ્થળ છોડ્યું હતું. સમગ્ર ઘટનાને અંજામ આપવામાં આરોપીને માત્ર 30 સેકન્ડ જેટલો સમય લાગ્યો હોવાનું સીસીટીવી ફૂટેજમાં સામે આવ્યું છે.
ચોરીની જાણ થતાં જ કારખાનાના સંચાલકોમાં દોડધામ મચી ગઈ હતી. સીસીટીવી ફૂટેજ તપાસતાં આરોપીની સમગ્ર હરકત સ્પષ્ટ રીતે કેદ થઈ હોવાનું સામે આવ્યું છે. ફૂટેજના આધારે આરોપીની ઓળખ અને તેની હિલચાલ અંગે માહિતી એકત્રિત કરવાની કાર્યવાહી શરૂ કરવામાં આવી છે.
ચોરીમાં અંદાજે રૂ.30 લાખના સોના અને હીરાના દાગીના ચોરાયા હોવાનું પ્રાથમિક રીતે સામે આવ્યું છે. ઘટનાને કારણે જ્વેલરી ઉદ્યોગ સાથે સંકળાયેલા વેપારીઓમાં પણ ચિંતા જોવા મળી રહી છે. કિંમતી માલસામાનની સુરક્ષાને લઈને વધુ સાવચેતી રાખવાની જરૂરિયાત ફરી એકવાર ઉજાગર થઈ છે.
ઘટનાની જાણ પોલીસને કરવામાં આવતા પોલીસે સ્થળ પર પહોંચી તપાસ હાથ ધરી હતી. સીસીટીવી ફૂટેજ સહિતના પુરાવાઓના આધારે આરોપીની શોધખોળ શરૂ કરવામાં આવી છે. આરોપી કઈ દિશામાં ફરાર થયો અને ચોરાયેલા મુદ્દામાલનો ક્યાં નિકાલ કરવાનો પ્રયાસ કર્યો તે સહિતના તમામ પાસાઓની તપાસ ચાલી રહી છે.
પોલીસ દ્વારા કારખાનાના કર્મચારીઓ તેમજ સંબંધિત લોકોના નિવેદનો પણ લેવામાં આવી રહ્યા છે. આરોપીને ઝડપી ચોરાયેલો મુદ્દામાલ પરત મેળવવા માટે વિવિધ ટીમોને કામગીરી સોંપવામાં આવી હોવાનું જાણવા મળ્યું છે. સીસીટીવી ફૂટેજ તપાસમાં મહત્વપૂર્ણ કડી સાબિત થઈ રહ્યું છે.
માત્ર 30 સેકન્ડમાં રૂ.30 લાખની ચોરી અને મેનેજરની 10 મિનિટની ગેરહાજરી દરમિયાન બનેલી આ ઘટનાએ સુરતના જ્વેલરી ઉદ્યોગમાં ચકચાર મચાવી છે. હાલ પોલીસ સીસીટીવીના આધારે આરોપી બંગાળી કારીગરને ઝડપી પાડવા અને સમગ્ર ઘટનાનો ભેદ ઉકેલવા માટે વધુ તપાસ ચલાવી રહી છે.
