ક્રાઇમ સૌરવ ગાંગુલીને ફરી જાનથી મારી નાખવાની ધમકી, CAB ઓફિસે મળ્યા બે ધમકીભર્યા પત્ર

ભૂતપૂર્વ ભારતીય ક્રિકેટ કેપ્ટન અને દિગ્ગજ ક્રિકેટર સૌરવ ગાંગુલીને ફરી એકવાર જાનથી મારી નાખવાની ધમકી મળતા ચકચાર મચી છે. ક્રિકેટ એસોસિએશન ઓફ બંગાળ (CAB)ની ઓફિસમાં કુરિયર મારફતે બે ધમકીભર્યા પત્રો પહોંચ્યા હોવાનું સામે આવ્યું છે.

પોલીસના જણાવ્યા અનુસાર, કુરિયર ખોલવામાં આવતા તેમાં અંગ્રેજીમાં લખાયેલા બે પત્રો મળી આવ્યા હતા. આ પત્રોમાં સૌરવ ગાંગુલી ઉપરાંત તેમની પત્ની ડોના ગાંગુલી અને તેમના સ્ટાફને જાનથી મારી નાખવાની સીધી ધમકી આપવામાં આવી હતી. પત્રોમાં આક્રમક અને હિંસક ભાષાનો ઉપયોગ કરવામાં આવ્યો હોવાનું પણ જણાવાયું છે.

ધમકીભર્યા પત્રો મળ્યા બાદ CAB ઓફિસમાં તાત્કાલિક ચકચાર મચી ગઈ હતી. સમગ્ર મામલાની ગંભીરતાને ધ્યાનમાં રાખીને ગાંગુલી પરિવાર દ્વારા કોલકાતાના ઠાકુરપુકુર પોલીસ સ્ટેશનમાં ફરિયાદ નોંધાવવામાં આવી છે. પોલીસ હવે પત્રો ક્યાંથી મોકલવામાં આવ્યા અને તેની પાછળ કોણ છે તે અંગે તપાસ કરી રહી છે.

સૌરવ ગાંગુલીને આ પ્રકારની ધમકી પહેલીવાર મળી હોય એવું નથી. પરિવારના જણાવ્યા પ્રમાણે છેલ્લા લગભગ છ મહિનાથી આવા ધમકીભર્યા પત્રો મળતા રહ્યા હતા. શરૂઆતમાં પરિવારજનોએ આ ધમકીઓને ગંભીરતાથી લીધી નહોતી અને તેને કોઈ સનકી પ્રશંસક અથવા અંગત અદાવત ધરાવતી વ્યક્તિનું કૃત્ય માનીને અવગણ્યું હતું.

પરંતુ હવે ફરીથી CAB ઓફિસમાં બે પત્રો પહોંચ્યા બાદ મામલો ગંભીર બન્યો છે. પત્રોમાં માત્ર સૌરવ ગાંગુલી જ નહીં પરંતુ તેમની પત્ની ડોના અને સ્ટાફને પણ નિશાન બનાવવામાં આવ્યા હોવાથી સુરક્ષાને લઈને ચિંતા વધી છે.

પોલીસે ધમકીભર્યા બંને પત્રોને તપાસના ભાગરૂપે ધ્યાનમાં લીધા છે અને કુરિયર સંબંધિત વિગતોની પણ તપાસ શરૂ કરી છે. પત્રો મોકલનાર વ્યક્તિની ઓળખ, તેના હેતુ અને અગાઉ મળેલા ધમકીભર્યા પત્રો સાથે કોઈ કડી છે કે નહીં તે અંગે તપાસ ચાલી રહી છે.

હાલ સમગ્ર મામલે પોલીસ તપાસ ચાલુ છે અને ધમકી પાછળનું ચોક્કસ કારણ હજુ સ્પષ્ટ થયું નથી. જોકે, એક જાણીતા ક્રિકેટર અને તેમના પરિવારને વારંવાર આવી ધમકીઓ મળતી હોવાના કારણે પોલીસ આ ઘટનાને ગંભીરતાથી લઈ રહી છે. હવે તપાસ બાદ જ સ્પષ્ટ થશે કે આ ધમકી માત્ર પત્રો સુધી મર્યાદિત છે કે તેની પાછળ કોઈ વાસ્તવિક ખતરો પણ છે.