ક્રાઇમ મોદીના ચહેરાનો માસ્ક પહેરી ચોરે મોબાઇલ શોપમાં હાથફેરો કર્યો, 35થી 40 સ્માર્ટફોનની ચોરીથી ભીલવાડામાં ચકચાર.

રાજસ્થાનના ભીલવાડા જિલ્લામાં ચોરીનો એક અનોખો અને ચોંકાવનારો બનાવ સામે આવ્યો છે. જિલ્લાના કરેડા કસબામાં એક મોબાઇલ શોપમાં ચોરે વડા પ્રધાન નરેન્દ્ર મોદીના ચહેરાનો માસ્ક પહેરીને ચોરીને અંજામ આપ્યો હતો. આ ઘટનાએ સ્થાનિક લોકો અને પોલીસને પણ આશ્ચર્યમાં મૂકી દીધા છે.

પ્રાપ્ત માહિતી મુજબ, ચોર મોડી રાત્રે દુકાનની છત મારફતે અંદર પ્રવેશ્યો હતો. તેણે ખૂબ જ શાંતિપૂર્વક અને આયોજનબદ્ધ રીતે દુકાનમાં રાખેલા લગભગ 35થી 40 સ્માર્ટફોન ચોરી લીધા હતા. ચોરાયેલા મોબાઇલ ફોનની કુલ કિંમત અંદાજે રૂ. 4થી 5 લાખ હોવાનું જણાવવામાં આવ્યું છે.

દુકાનમાં લગાવવામાં આવેલા સીસીટીવી કેમેરાના ફૂટેજમાં સમગ્ર ઘટના કેદ થઈ ગઈ છે. ફૂટેજમાં આરોપી મોબાઇલ ફોન એકઠા કરતો સ્પષ્ટ દેખાય છે, પરંતુ ઓળખ છુપાવવા માટે તેણે વડા પ્રધાન નરેન્દ્ર મોદીના ચહેરાનો માસ્ક પહેર્યો હતો. માસ્કના કારણે શરૂઆતમાં તેની ઓળખ કરવી મુશ્કેલ બની છે.

ઘટનાની જાણ થતાં જ સ્થાનિક પોલીસ ઘટનાસ્થળે પહોંચી હતી અને સીસીટીવી ફૂટેજના આધારે તપાસ શરૂ કરી છે. પોલીસ આસપાસના વિસ્તારોના અન્ય કેમેરાના ફૂટેજ પણ ચકાસી રહી છે તેમજ શંકાસ્પદ વ્યક્તિઓની પૂછપરછ કરવામાં આવી રહી છે.

પોલીસનું માનવું છે કે આરોપીને દુકાનની રચના અને અંદર રાખવામાં આવેલા માલ અંગે અગાઉથી માહિતી હોઈ શકે છે. આ ઉપરાંત ચોરીની રીતને જોતા આરોપી વ્યાવસાયિક ચોર હોવાની પણ શક્યતા વ્યક્ત કરવામાં આવી રહી છે.

આ અનોખી ચોરીની ઘટનાની સમગ્ર વિસ્તારમાં ભારે ચર્ચા ચાલી રહી છે. ખાસ કરીને વડા પ્રધાનના ચહેરાનો માસ્ક પહેરીને ચોરી કરવાની ઘટનાએ લોકોમાં કુતૂહલ જગાવ્યું છે. પોલીસે ટૂંક સમયમાં આરોપીની ઓળખ કરીને તેની ધરપકડ કરવામાં આવશે તેવી આશા વ્યક્ત કરી છે.