આંતરરાષ્ટ્રીય ઈરાન પર બીજા વિશ્વયુદ્ધ પછીનો સૌથી મોટો હુમલો થવાનો હતો, પરંતુ ગલ્ફ દેશોની વિનંતીથી નિર્ણય ટાળ્યો: ટ્રમ્પનો દાવો

અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ઈરાનને લઈને મોટો દાવો કર્યો છે. ટ્રમ્પના જણાવ્યા અનુસાર, અમેરિકા ઈરાન પર બીજા વિશ્વયુદ્ધ પછીનો સૌથી મોટો લશ્કરી હુમલો કરવાની તૈયારીમાં હતું, પરંતુ સાઉદી અરેબિયા, સંયુક્ત આરબ અમીરાત (UAE) અને કતારના નેતાઓની વિનંતી બાદ આ કાર્યવાહી હાલ પૂરતી સ્થગિત કરવાનો નિર્ણય લેવામાં આવ્યો હતો.

ટ્રમ્પે જણાવ્યું કે ગલ્ફ દેશોના નેતાઓએ તેમને સમજાવ્યું હતું કે ઈરાન સાથે ગંભીર વાટાઘાટો ચાલી રહી છે અને હુમલો અટકાવવામાં આવે તો રાજદ્વારી ઉકેલની શક્યતા વધી શકે છે. તેમના કહેવા મુજબ, આ વિનંતીનો માન રાખીને અમેરિકાએ આયોજનબદ્ધ હુમલો રોકી દીધો, જોકે જો સ્વીકાર્ય સમજૂતી નહીં થાય તો સૈન્યને તાત્કાલિક કાર્યવાહી માટે તૈયાર રહેવાનો આદેશ આપવામાં આવ્યો છે.

ટ્રમ્પના આ નિવેદન બાદ મધ્ય પૂર્વની સ્થિતિ ફરી ચર્ચાના કેન્દ્રમાં આવી છે. તેમણે દાવો કર્યો કે હુમલો અટકાવવાનો નિર્ણય શાંતિપૂર્ણ ઉકેલને એક તક આપવા માટે લેવામાં આવ્યો હતો. જોકે, ઈરાનના વિદેશ મંત્રાલયે ટ્રમ્પના કેટલાક દાવાઓને નકારી કાઢ્યા છે અને સીધી અમેરિકા-ઈરાન વાટાઘાટો થઈ રહી હોવાનો ઇનકાર કર્યો છે.

આ દરમિયાન વિશ્લેષકોનું માનવું છે કે ગલ્ફ ક્ષેત્રમાં વધતું તણાવ વૈશ્વિક તેલ બજાર અને આંતરરાષ્ટ્રીય સુરક્ષા માટે મહત્વનો મુદ્દો છે. અમેરિકા, ઈરાન અને ગલ્ફ દેશો વચ્ચેની રાજદ્વારી પ્રક્રિયાના આગામી પગલાં પર હવે સમગ્ર વિશ્વની નજર છે.