ઈન્ડિયા કોલા અને પાણી બાદ હવે ₹10માં આઈસ્ક્રીમ! અંબાણીએ ‘બોમ્બે ક્રીમરી’થી બજારમાં એન્ટ્રી

ભારતીય ટેલિકોમ ક્ષેત્રમાં Jioથી હલચલ મચાવ્યા બાદ હવે મુકેશ અંબાણીની નજર FMCG માર્કેટ પર છે. રિલાયન્સ કન્ઝ્યુમર પ્રોડક્ટ્સ લિમિટેડે ‘બોમ્બે ક્રીમરી’ નામની આઈસ્ક્રીમ બ્રાન્ડ સાથે બજારમાં એન્ટ્રી કરી છે. ખાસ વાત એ છે કે આઈસ્ક્રીમની શરૂઆતની કિંમત માત્ર ₹10 રાખવામાં આવી છે.

બોમ્બે ક્રીમરી હેઠળ કપ, કોન, બાર, સ્ટિક અને ટબ સહિતના વિવિધ વિકલ્પો ઉપલબ્ધ કરાવવામાં આવશે. રિલાયન્સની આ એન્ટ્રીથી અમૂલ, વાડીલાલ, મધર ડેરી અને ક્વોલિટી વોલ્સ જેવી સ્થાપિત બ્રાન્ડ્સ સામે સ્પર્ધા વધુ તીવ્ર બનવાની શક્યતા છે.

રિલાયન્સના જણાવ્યા અનુસાર, બોમ્બે ક્રીમરીના ઉત્પાદનો ડેરી ક્રીમ અને ગુણવત્તાયુક્ત ઘટકોમાંથી બનાવવામાં આવશે. હાલ બ્રાન્ડનું લોન્ચિંગ પશ્ચિમ ભારતમાં કરવામાં આવ્યું છે અને આગામી સમયમાં રિલાયન્સ રિટેલ તથા JioMartના નેટવર્ક મારફતે દેશભરમાં વિસ્તરણ કરવાની યોજના છે.

₹10નો પ્રાઇસ પોઇન્ટ રિલાયન્સ માટે નવો નથી. કંપનીએ અગાઉ Campa Cola અને પેકેજ્ડ ડ્રિંકિંગ વોટર જેવા સેગમેન્ટમાં પણ આક્રમક કિંમત સાથે એન્ટ્રી કરી હતી. હવે આ જ વ્યૂહરચના આઈસ્ક્રીમ માર્કેટમાં અપનાવવામાં આવી રહી છે.

ભારતીય આઈસ્ક્રીમ માર્કેટ ₹20,000 કરોડથી વધુનું હોવાનું કહેવાય છે અને ખાસ કરીને ટિયર-2 તથા ટિયર-3 શહેરોમાં માંગ વધી રહી છે. રિલાયન્સનો ફોકસ ઓછા ભાવે વધુ ગ્રાહકો સુધી પહોંચવાનો હોવાનું માનવામાં આવે છે.

હવે જોવાનું એ રહેશે કે ₹10ની આઈસ્ક્રીમથી અંબાણી અમૂલ, વાડીલાલ અને અન્ય દિગ્ગજ બ્રાન્ડ્સને કેટલી ટક્કર આપી શકે છે.