ટૉપ ન્યૂઝ રૂ.27 લાખનું વીજ બિલ જોઈ ગ્રાહકના હોશ ઉડી ગયા!
બે રૂમના મકાનમાં રહેતા ગ્રાહકને 753 રૂપિયાના બિલના બદલે મળ્યું રૂ.27,02,898નું બિલ
બિહારના નવાદા જિલ્લામાં વીજ કંપનીની ગંભીર બેદરકારીનો ચોંકાવનારો કિસ્સો સામે આવ્યો છે. બે રૂમના સામાન્ય મકાનમાં રહેતા કુંદન કુમાર નામના ગ્રાહકને ઓનલાઈન વીજ બિલમાં અચાનક રૂ.27 લાખ 2 હજાર 898ની રકમ દર્શાવવામાં આવતા પરિવાર ચોંકી ઉઠ્યો હતો.
પીડિત ગ્રાહકના જણાવ્યા મુજબ, તેમના ઘરમાં વીજળીના ઉપયોગ માટે માત્ર બે બલ્બ અને એક ટેબલ ફેન છે. ઘરમાં AC સહિત કોઈ મોટું વીજ ઉપકરણ પણ નથી. અગાઉ તેમને રૂ.753નું વીજ બિલ મળ્યું હતું, જેને લઈને તેમણે વીજ વિભાગમાં ફરિયાદ કરી હતી.
પરંતુ રૂ.753નું બિલ સુધારવાને બદલે ઓનલાઈન સિસ્ટમમાં અચાનક લાખો રૂપિયાનું બિલ દર્શાવવામાં આવતા ગ્રાહક ફરી વીજ કાર્યાલય પહોંચ્યા હતા અને સમગ્ર મામલે રજૂઆત કરી હતી.
મામલો સામે આવ્યા બાદ વીજ વિભાગે તપાસ હાથ ધરી છે અને તપાસ પૂર્ણ થયા બાદ બિલમાં સુધારો કરી આપવાની ખાતરી ગ્રાહકને આપવામાં આવી છે.
આ ઘટનાએ વીજ બિલિંગ વ્યવસ્થાની ચોકસાઈ સામે પણ સવાલો ઊભા કર્યા છે. ખાસ કરીને સામાન્ય પરિવારના મકાનમાં આટલી મોટી રકમનું બિલ કેવી રીતે જનરેટ થયું તે અંગે હવે વીજ વિભાગની તપાસ બાદ જ હકીકત સ્પષ્ટ થશે.
