ટૉપ ન્યૂઝ જામનગરમાં બહેનો માટે રક્ષાબંધનની ખાસ ભેટ, ઈ-બસમાં મળશે નિઃશુલ્ક મુસાફરી
રક્ષાબંધનના પાવન પર્વ નિમિત્તે જામનગરની બહેનો માટે ખાસ ભેટની જાહેરાત કરવામાં આવી છે. જામનગર મહાનગરપાલિકા તથા જનમાર્ગ ફાઉન્ડેશન દ્વારા રક્ષાબંધનના શુભ અવસરે શહેરની મહિલાઓને ખાસ પરિવહન સુવિધા આપવાનો નિર્ણય કરવામાં આવ્યો છે.
આ જાહેરાત મુજબ રક્ષાબંધનના દિવસે જામનગરની બહેનો શહેરની ઈ-બસમાં કોઈપણ ભાડું ચૂકવ્યા વિના નિઃશુલ્ક મુસાફરી કરી શકશે. તહેવારના દિવસે બહેનો પોતાના ભાઈઓને રાખડી બાંધવા સરળતાથી અવરજવર કરી શકે તે હેતુથી આ પહેલ કરવામાં આવી છે.
રક્ષાબંધનના પાવન પર્વે બહેનોને મળેલી આ ખાસ ભેટને લઈને મહિલાઓમાં પણ ખુશીનો માહોલ જોવા મળી રહ્યો છે. શહેરમાં ઈ-બસ સેવા દ્વારા સુવિધાજનક અને પર્યાવરણમૈત્રી પરિવહન સાથે હવે રક્ષાબંધનના દિવસે નિઃશુલ્ક મુસાફરીનો લાભ મળતા બહેનો માટે તહેવાર વધુ આનંદદાયક બનશે.
જામનગર મહાનગરપાલિકા અને જનમાર્ગ ફાઉન્ડેશનની આ પહેલને શહેરની મહિલાઓ માટે રક્ષાબંધનની અનોખી ભેટ તરીકે જોવામાં આવી રહી છે.
