આંતરરાષ્ટ્રીય ગિનીની રાજધાની કોનાક્રીમાં મોટી દુર્ઘટના
ભારે વરસાદ બાદ લેન્ડફિલ પર ભૂસ્ખલન, કચરાનો વિશાળ ઢગલો ધસી પડતાં 30 લોકોના મોત
કોનાક્રી: પશ્ચિમ આફ્રિકાના દેશ ગિનીની રાજધાની કોનાક્રીમાં ભારે વરસાદ વચ્ચે મોટી દુર્ઘટના સર્જાઈ છે. શહેરના સૌથી મોટા ‘દાર એસ સલામ’ લેન્ડફિલ પર કચરાનો વિશાળ ઢગલો તૂટી પડતાં ભયાનક ભૂસ્ખલન થયું હતું.
ભારે વરસાદના કારણે લેન્ડફિલ પર એકઠો થયેલો કચરો અને માટી ધસી પડતાં આસપાસના વિસ્તારમાં અફરાતફરી મચી ગઈ હતી. આ દુર્ઘટનામાં 30 લોકોના મોત થયાના અહેવાલ છે.
કચરાના ઢગલા નીચે દટાયા લોકો
લેન્ડફિલ પર ભૂસ્ખલન થતાં મોટી માત્રામાં કચરો નીચે તરફ ધસી આવ્યો હતો, જેના કારણે અનેક લોકો તેની નીચે દટાઈ ગયા હતા. ઘટનાની જાણ થતાં બચાવ અને રાહત કામગીરી હાથ ધરવામાં આવી હતી.
ભારે વરસાદને કારણે બચાવ કામગીરીમાં પણ મુશ્કેલીઓ ઊભી થઈ હોવાનું જાણવા મળે છે. મૃતકોનો આંકડો વધુ વધવાની શક્યતા અંગે પણ ચિંતા વ્યક્ત કરવામાં આવી રહી છે.
આ દુર્ઘટનાએ કોનાક્રીમાં કચરાના વ્યવસ્થાપન અને લેન્ડફિલની સુરક્ષા વ્યવસ્થા અંગે ગંભીર સવાલો ઊભા કર્યા છે. ઘટનાને પગલે સ્થાનિક તંત્ર દ્વારા રાહત અને બચાવ કામગીરી તેજ કરવામાં આવી છે.
