ટૉપ ન્યૂઝ ડુંગળીના વધતા ભાવ વચ્ચે કેન્દ્રનો મોટો નિર્ણય, આજથી દોડશે ‘કાંદા એક્સપ્રેસ’

દેશભરના સામાન્ય પરિવારોના રસોડાના બજેટ પર ડુંગળીના વધતા ભાવની અસર જોવા મળી રહી છે. દેશમાં ડુંગળીની સરેરાશ છૂટક કિંમત વધીને લગભગ ₹42 પ્રતિ કિલો સુધી પહોંચી ગઈ છે. ગયા વર્ષના સમાન સમયગાળાની સરખામણીએ આ ભાવમાં આશરે 45 ટકાનો વધારો, જ્યારે માત્ર એક મહિનામાં લગભગ 19 ટકાનો ઉછાળો નોંધાયો છે.

ડુંગળીના વધતા ભાવને કાબૂમાં લેવા અને બજારમાં તેનો પુરવઠો ઝડપથી વધારવા માટે કેન્દ્ર સરકારે મહત્વપૂર્ણ પગલું ભર્યું છે. 24 ઓગસ્ટથી નાસિકથી દેશના મોટા ઉપભોક્તા કેન્દ્રો સુધી ડુંગળી પહોંચાડવા માટે સ્પેશિયલ ટ્રેન સેવા શરૂ કરવામાં આવી છે. આ વિશેષ ટ્રેનને ‘કાંદા એક્સપ્રેસ’ નામ આપવામાં આવ્યું છે.

નાસિકથી દિલ્હી, ચેન્નઈ, કોચિ અને ગુવાહાટી સુધી પહોંચશે ડુંગળી

‘કાંદા એક્સપ્રેસ’નો મુખ્ય હેતુ ડુંગળીના મોટા ઉત્પાદક વિસ્તારોમાંથી વધુ જથ્થો એવા શહેરો અને બજારો સુધી ઝડપથી પહોંચાડવાનો છે, જ્યાં તેની માંગ અને ભાવ બંને ઊંચા છે.

નાસિકથી ઉપડતી આ વિશેષ ટ્રેનો દ્વારા દિલ્હી, ચેન્નઈ, કોચિ અને ગુવાહાટી જેવા મોટા ઉપભોક્તા કેન્દ્રો સુધી ડુંગળી પહોંચાડવામાં આવશે. રેલવે મારફતે મોટા જથ્થામાં પરિવહન થવાથી સપ્લાય ચેઇન ઝડપી બનવાની અને પરિવહન ખર્ચમાં પણ ઘટાડો થવાની આશા છે.

બફર સ્ટોકમાંથી પણ ડુંગળી બજારમાં ઉતારાશે

સરકારની ભાવ નિયંત્રણની વ્યૂહરચના માત્ર ‘કાંદા એક્સપ્રેસ’ પૂરતી મર્યાદિત નથી. કેન્દ્ર સરકાર પોતાના સરકારી બફર સ્ટોકમાંથી ડુંગળીનો જથ્થો પણ ખુલ્લા બજારમાં છોડવાની તૈયારીમાં છે.

આ રીતે એક તરફ નાસિક જેવા ઉત્પાદન કેન્દ્રોમાંથી મોટા શહેરોમાં સીધો પુરવઠો વધારવામાં આવશે, તો બીજી તરફ બફર સ્ટોકની ડુંગળી બજારમાં ઉપલબ્ધ કરાવીને વધતા ભાવ પર નિયંત્રણ લાવવાનો પ્રયાસ કરવામાં આવશે.

જો આ પગલાંથી બજારમાં ડુંગળીનો પુરવઠો વધે છે, તો આગામી દિવસોમાં ભાવમાં રાહત મળવાની આશા છે. જોકે, તેની અસર છૂટક બજારમાં કેટલી ઝડપથી જોવા મળે છે તેના પર સામાન્ય ગ્રાહકોની નજર રહેશે.