મારું ગુજરાત સ્થાનિક સ્વરાજ્ય ચૂંટણીમાં ખર્ચના હિસાબમાં ગડબડ? ગુજરાતના 168 ચૂંટાયેલા ઉમેદવારોએ ખર્ચનું પત્રક જમા ન કર્યાની ફરિયાદ.
ગુજરાતમાં યોજાયેલી સ્થાનિક સ્વરાજ્યની ચૂંટણીઓ બાદ ચૂંટણી ખર્ચના હિસાબને લઈને મહત્વનો મુદ્દો સામે આવ્યો છે. માહિતી અનુસાર, ચૂંટાયેલા 168 ઉમેદવારોએ ચૂંટણી ખર્ચનું પત્રક જમા કરાવ્યું નથી, જેના કારણે ચૂંટણી પ્રક્રિયાની પારદર્શિતા અંગે સવાલો ઊભા થયા છે.
ફરિયાદ મુજબ, સંબંધિત ઉમેદવારોએ ચૂંટણી પંચ સમક્ષ માત્ર એફિડેવિટ (સોગંદનામું) જ રજૂ કર્યું છે, પરંતુ કાયદા મુજબ ફરજિયાત ગણાતો ચૂંટણી ખર્ચનો વિગતવાર હિસાબ સબમિટ કર્યો નથી. બીજી તરફ, માત્ર 17 ઉમેદવારોએ જ ખર્ચનું સંપૂર્ણ પત્રક જમા કરાવ્યું હોવાનું સામે આવ્યું છે.
ચૂંટણી નિયમો અનુસાર દરેક ઉમેદવારે પ્રચાર દરમિયાન થયેલા ખર્ચની વિગત નિર્ધારિત સમયમર્યાદામાં ચૂંટણી અધિકારી સમક્ષ રજૂ કરવી ફરજિયાત હોય છે. તેમાં જાહેર સભાઓ, પ્રચાર સામગ્રી, વાહન વ્યવસ્થા, જાહેરાતો અને અન્ય ચૂંટણી ખર્ચનો સંપૂર્ણ હિસાબ દર્શાવવાનો રહે છે.
આ મામલે ફરિયાદ થતા ચૂંટણી તંત્ર દ્વારા તપાસ હાથ ધરવામાં આવે તેવી શક્યતા છે. જો નિયમોનું ઉલ્લંઘન થયાનું સામે આવશે તો સંબંધિત ઉમેદવારો સામે કાયદેસરની કાર્યવાહી પણ થઈ શકે છે.
ચૂંટણી નિષ્ણાતોના જણાવ્યા મુજબ, ચૂંટણી ખર્ચનો હિસાબ જાહેર કરવાનો મુખ્ય હેતુ ચૂંટણી પ્રક્રિયામાં પારદર્શિતા જાળવવાનો અને ખર્ચની મર્યાદાનું પાલન થયું છે કે નહીં તેની ખાતરી કરવાનો છે. તેથી ખર્ચનું પત્રક ન જમા કરાવવાનો મુદ્દો ગંભીર માનવામાં આવે છે.
હવે સમગ્ર મામલે ચૂંટણી પંચ અને સંબંધિત સત્તાવાળાઓ શું કાર્યવાહી કરે છે તેના પર રાજકીય વર્તુળોની નજર મંડાઈ છે.
