હવામાન ગુજરાતમાં આગામી 72 કલાક ભારે વરસાદનો ખતરો! સૌરાષ્ટ્ર-દક્ષિણ ગુજરાતમાં 'રેડ એલર્ટ', અંબાલાલ પટેલે પણ આપી ગંભીર ચેતવણી
ગુજરાતમાં ચોમાસાએ હવે રૌદ્ર સ્વરૂપ ધારણ કર્યું છે. છેલ્લા બે દિવસથી રાજ્યના અનેક જિલ્લાઓમાં ધોધમાર વરસાદ વરસી રહ્યો છે અને આગામી 72 કલાક સુધી ભારે વરસાદની સ્થિતિ યથાવત રહેવાની શક્યતા વ્યક્ત કરવામાં આવી છે. એક તરફ હવામાન વિભાગે દક્ષિણ ગુજરાત અને દક્ષિણ સૌરાષ્ટ્રના અનેક જિલ્લાઓ માટે રેડ એલર્ટ જાહેર કર્યું છે, તો બીજી તરફ હવામાન નિષ્ણાત અંબાલાલ પટેલે પણ આગામી ત્રણ દિવસ અત્યંત સાવચેત રહેવાની સલાહ આપી છે.
હવામાન વિભાગના જણાવ્યા અનુસાર, રાજ્ય પર એકસાથે શિયર ઝોન, ઓફશોર ટ્રફ અને વેસ્ટર્ન ડિસ્ટર્બન્સ સક્રિય હોવાથી આગામી બે દિવસ દરમિયાન અનેક વિસ્તારોમાં ભારેથી અતિભારે વરસાદ વરસી શકે છે. ખાસ કરીને દક્ષિણ ગુજરાત અને દક્ષિણ સૌરાષ્ટ્રમાં વરસાદનું જોર વધુ રહેવાની શક્યતા છે. જ્યારે અમદાવાદ સહિત મધ્ય ગુજરાતના કેટલાક વિસ્તારોમાં ગાજવીજ સાથે વરસાદની આગાહી કરવામાં આવી છે.
આ જિલ્લાઓમાં 'રેડ એલર્ટ'
હવામાન વિભાગે સુરત, નવસારી, વલસાડ, ડાંગ, દમણ અને દાદરા-નગર હવેલી તેમજ સૌરાષ્ટ્રના ભાવનગર અને અમરેલી જિલ્લામાં અતિભારે વરસાદને લઈને રેડ એલર્ટ જાહેર કર્યું છે. ઉપરાંત ગીર સોમનાથ, દીવ, નર્મદા, ભરૂચ અને છોટાઉદેપુર જિલ્લામાં ઓરેન્જ એલર્ટ આપવામાં આવ્યું છે, જ્યારે રાજ્યના અન્ય જિલ્લાઓમાં યેલો એલર્ટ સાથે સામાન્યથી મધ્યમ વરસાદની શક્યતા વ્યક્ત કરવામાં આવી છે.
ભારે વરસાદ અને દરિયામાં ખરાબ હવામાનને ધ્યાનમાં રાખીને માછીમારોને આગામી પાંચ દિવસ સુધી દરિયો ન ખેડવાની સૂચના આપવામાં આવી છે. દરિયાકાંઠે એલસીએસ (Local Cautionary Signal) પણ ફરકાવવામાં આવ્યો છે.
અંબાલાલ પટેલની આગાહી વધુ ચિંતાજનક
હવામાન નિષ્ણાત અંબાલાલ પટેલે જણાવ્યું છે કે આગામી 72 કલાક દરમિયાન રાજ્યના અનેક વિસ્તારોમાં વરસાદનું જોર યથાવત રહેશે. તેમના જણાવ્યા અનુસાર ભાવનગર, અમરેલી સહિત સૌરાષ્ટ્રના વિસ્તારોમાં અતિભારે વરસાદ પડી શકે છે. ઉપરાંત વડોદરા, મહીસાગર, પંચમહાલ, સાબરકાંઠા અને અરવલ્લી જિલ્લાના કેટલાક વિસ્તારોમાં પણ સારો વરસાદ થવાની સંભાવના છે.
તેમણે ખાસ કરીને આહવા, ડાંગ અને વલસાડ જિલ્લામાં પૂર જેવી સ્થિતિ સર્જાઈ શકે છે તેવી શક્યતા વ્યક્ત કરી છે. જ્યારે ઉત્તર ગુજરાત અને કચ્છના કેટલાક વિસ્તારોમાં વરસાદનું પ્રમાણ ધીમે ધીમે ઘટી શકે છે.
જુલાઈના બીજા સપ્તાહમાં પણ વરસાદ યથાવત
અંબાલાલ પટેલના જણાવ્યા મુજબ 14 જુલાઈ આસપાસ વધુ એક નવી વરસાદી સિસ્ટમ સક્રિય થઈ શકે છે, જેના કારણે 16થી 20 જુલાઈ દરમિયાન ફરી રાજ્યમાં વ્યાપક વરસાદ વરસી શકે છે. ઉપરાંત ઓગસ્ટની શરૂઆતમાં પણ અણધાર્યા વરસાદની સંભાવના તેમણે વ્યક્ત કરી છે.
હવામાન વિભાગ અને હવામાન નિષ્ણાતોની આગાહીને ધ્યાનમાં રાખીને નીચાણવાળા વિસ્તારોમાં રહેતા લોકોને સાવચેત રહેવા, બિનજરૂરી મુસાફરી ટાળવા તેમજ સ્થાનિક તંત્ર દ્વારા જારી કરવામાં આવતી સૂચનાઓનું પાલન કરવાની અપીલ કરવામાં આવી છે. આગામી ત્રણ દિવસ રાજ્ય માટે ભારે વરસાદની દૃષ્ટિએ અત્યંત મહત્વપૂર્ણ માનવામાં આવી રહ્યા છે.
