ઈન્ડિયા બાંગ્લાદેશના રાષ્ટ્રપતિ મોહમ્મદ શહાબુદ્દીનનું રાજીનામું, રાજકીય ઉથલપાથલ વચ્ચે લીધો નિર્ણય

બાંગ્લાદેશમાં રાજકીય ઘટનાક્રમ વચ્ચે રાષ્ટ્રપતિ મોહમ્મદ શહાબુદ્દીને પોતાના પદ પરથી રાજીનામું આપી દીધું છે. તેમણે સત્તાવાર રીતે સ્વાસ્થ્ય સંબંધિત કારણો દર્શાવ્યા છે, જોકે સ્થાનિક મીડિયા અને રાજકીય વિશ્લેષકોના મતે તેમના પર વધતા રાજકીય દબાણની પણ મહત્વપૂર્ણ ભૂમિકા રહી હોવાનું માનવામાં આવી રહ્યું છે.

તાજેતરના દિવસોમાં એવી ચર્ચા ચાલી રહી હતી કે લંડન પ્રવાસ દરમિયાન રાષ્ટ્રપતિ શહાબુદ્દીનની ભારતમાં નિર્વાસિત પૂર્વ વડાપ્રધાન શેખ હસીના સાથે કથિત ટેલિફોનિક વાતચીત થઈ હતી. જોકે શહાબુદ્દીને આ દાવાને નિરાધાર ગણાવીને નકારી કાઢ્યો હતો. તેમ છતાં આ મુદ્દાને લઈને રાજકીય વિવાદ વધુ તેજ બન્યો અને તેમના રાજીનામાને લઈને અટકળો વધવા લાગી હતી.

ઓગસ્ટ 2024માં વિદ્યાર્થી આંદોલન બાદ શેખ હસીનાએ દેશ છોડ્યો હતો. તે પછીના રાજકીય પરિવર્તન વચ્ચે પણ શહાબુદ્દીન રાષ્ટ્રપતિ તરીકે પોતાના પદ પર યથાવત રહ્યા હતા. તેઓ શેખ હસીનાના નજીકના સહયોગી તરીકે ઓળખાતા હોવાથી તેમની ભૂમિકા સતત રાજકીય ચર્ચામાં રહી હતી.

તાજેતરમાં શેખ હસીનાના બાંગ્લાદેશ પરત ફરવાની સંભાવનાઓ અને તેના પગલે ઉભા થયેલા રાજકીય દબાણ વચ્ચે શહાબુદ્દીનના રાજીનામાની ચર્ચા તેજ બની હતી. રાજીનામું આપતાં તેમણે ગંભીર સ્વાસ્થ્ય સમસ્યાનો ઉલ્લેખ કર્યો છે અને જણાવ્યું કે તબીબી કારણોસર તેઓ પદ પર રહેવું શક્ય નથી.

બાંગ્લાદેશના બંધારણ મુજબ નવા રાષ્ટ્રપતિની પસંદગી ન થાય ત્યાં સુધી સંસદના સ્પીકર હાફિઝ ઉદ્દીન અહમદ રાષ્ટ્રપતિની જવાબદારીઓ સંભાળશે. નવા રાષ્ટ્રપતિની પસંદગી માટે બંધારણીય પ્રક્રિયા શરૂ કરવામાં આવશે.

શહાબુદ્દીનના રાજીનામા બાદ બાંગ્લાદેશના રાજકીય સમીકરણોમાં વધુ ફેરફાર થવાની શક્યતા વ્યક્ત કરવામાં આવી રહી છે. નિષ્ણાતોનું માનવું છે કે આ નિર્ણય દેશની વર્તમાન રાજકીય સ્થિતિ અને આગામી રાજકીય પ્રક્રિયાઓ પર મહત્વપૂર્ણ અસર કરી શકે છે, ખાસ કરીને એવા સમયે જ્યારે બાંગ્લાદેશમાં રાજકીય ધ્રુવીકરણ અને સત્તા પરિવર્તન અંગે ચર્ચા તેજ બની છે.