મારું શહેર કલેક્ટર પી.બી. પંડ્યાની અધ્યક્ષતામાં જિલ્લા સંકલન અને ફરિયાદ સમિતિની બેઠક યોજાઈ.
જામનગર જિલ્લા કલેક્ટર કચેરી ખાતે જિલ્લા કલેક્ટરશ્રી પી.બી. પંડ્યાની અધ્યક્ષતામાં જિલ્લા સંકલન અને ફરિયાદ સમિતિની મહત્વપૂર્ણ બેઠક યોજાઈ હતી. બેઠકમાં જામનગર જિલ્લાના વિવિધ વિકાસલક્ષી પ્રશ્નો, જનહિતની રજૂઆતો તેમજ ધારાસભ્યો દ્વારા રજૂ કરવામાં આવેલા પ્રશ્નો અંગે વિગતવાર ચર્ચા અને સમીક્ષા કરવામાં આવી હતી. કલેક્ટરશ્રીએ અધિકારીઓને પ્રજાની રજૂઆતોને માત્ર કાગળ પરની કાર્યવાહી સુધી મર્યાદિત ન રાખી, પરંતુ સ્થળ પરની વાસ્તવિક પરિસ્થિતિને ધ્યાને લઈને પરિણામલક્ષી અને હકારાત્મક દિશામાં કાર્યવાહી કરવા સૂચના આપી હતી. ખાસ કરીને લાંબા સમયથી પડતર રહેલા પ્રશ્નોનો શક્ય તેટલો વહેલો નિકાલ થાય અને જનપ્રતિનિધિઓ દ્વારા રજૂ કરાયેલા પ્રશ્નોને પ્રાથમિકતા આપવામાં આવે તે માટે ભારપૂર્વક માર્ગદર્શન આપવામાં આવ્યું હતું.
બેઠક દરમિયાન ધારાસભ્યશ્રીઓ રાઘવજીભાઈ પટેલ, મેઘજીભાઈ ચાવડા અને હેમતભાઈ ખવા દ્વારા અગાઉ રજૂ કરવામાં આવેલા પ્રશ્નો અને વિવિધ પડતર રજૂઆતોની વિભાગવાર સમીક્ષા કરવામાં આવી હતી. સંબંધિત વિભાગોના અધિકારીઓ પાસેથી દરેક પ્રશ્નની વર્તમાન સ્થિતિ, અત્યાર સુધી કરવામાં આવેલી કાર્યવાહી તેમજ બાકી રહેલા કામ અંગે જરૂરી વિગતો મેળવવામાં આવી હતી. કલેક્ટરશ્રીએ અધિકારીઓને પ્રશ્નોના ઝડપી નિરાકરણ માટે જરૂરી પગલાં લેવા અને જ્યાં કામગીરીમાં વિલંબ થયો હોય ત્યાં તેના કારણો જાણી યોગ્ય કાર્યવાહી કરવા સૂચનાઓ આપી હતી. પ્રજાના પ્રશ્નોનું નિરાકરણ સમયબદ્ધ રીતે થાય અને સરકારી તંત્ર પ્રત્યે લોકોનો વિશ્વાસ વધુ મજબૂત બને તે દિશામાં કામગીરી કરવા જણાવાયું હતું.
બેઠકમાં પાણીના સંપ, પાણીના ટાંકા, ચેકડેમ અને સિંચાઈ સંબંધિત કામોને મંજૂરી, જમીન સંપાદન, જમીન પરત અને વળતર, જમીન માપણી તેમજ સર્વે રેકર્ડમાં સુધારા જેવા મહત્વના મુદ્દાઓ પર ચર્ચા થઈ હતી. ગોચર જમીનની માપણી, અનુસૂચિત જાતિના લાભાર્થીઓ માટે જમીન ફાળવણી, પાક વીમાની ચૂકવણી, વીજપોલ અને વીજલાઈનના પ્રશ્નો તેમજ નવા રસ્તાના કામમાં આવતી અડચણો દૂર કરવા અંગે પણ અધિકારીઓ પાસેથી વિગતો મેળવવામાં આવી હતી. આ ઉપરાંત આધારકાર્ડની કામગીરી, ગામતળ પરથી દબાણ દૂર કરવા, ગામની જમીન ફાળવણીમાં ફેરફાર, એસ.ટી. બસના રૂટ ફાળવવા અને બીએસએનએલ નેટવર્કને લગતા પ્રશ્નો અંગે પણ જરૂરી ચર્ચા કરવામાં આવી હતી. ઘાસ વિતરણ વ્યવસ્થા સહિત ગ્રામ્ય વિસ્તારના વિવિધ પ્રશ્નોને પણ બેઠકમાં મહત્વ આપવામાં આવ્યું હતું.
આ ઉપરાંત પીજીવીસીએલ, વન વિભાગ, શિક્ષણ વિભાગ, આરોગ્ય વિભાગ, આઈસીડીએસ, પીવાના શુદ્ધ પાણીની વ્યવસ્થા, રસ્તા, વીજળી, સિંચાઈ, જાહેર સુવિધાઓ અને નાગરિક સેવાઓ સાથે જોડાયેલા વિવિધ પ્રશ્નોની પણ સમીક્ષા કરવામાં આવી હતી. જે પ્રશ્નોના નિરાકરણ માટે એકથી વધુ વિભાગો વચ્ચે સંકલનની જરૂરિયાત હોય, તેવા કિસ્સામાં સંબંધિત વિભાગોએ પરસ્પર સંકલન કરીને કાર્યવાહી કરવી અને કામગીરીની પ્રગતિની સમયાંતરે સમીક્ષા કરવી તે માટે કલેક્ટરશ્રીએ સ્પષ્ટ માર્ગદર્શન આપ્યું હતું. વિકાસલક્ષી કામોમાં કોઈ બિનજરૂરી વિલંબ ન થાય અને પ્રજાને સરકારી યોજનાઓ તથા સેવાઓનો સમયસર લાભ મળી રહે તે માટે અધિકારીઓને જવાબદારીપૂર્વક કામગીરી કરવા જણાવાયું હતું.
કલેક્ટરશ્રી પી.બી. પંડ્યાએ ભારપૂર્વક જણાવ્યું હતું કે જનપ્રતિનિધિઓ તથા પ્રજાજનો દ્વારા રજૂ કરવામાં આવતા પ્રશ્નો માત્ર કાગળ પરની કાર્યવાહી પૂરતા મર્યાદિત ન રહેવા જોઈએ. પ્રશ્નની વાસ્તવિક સ્થિતિને સમજવા માટે જરૂરી હોય ત્યાં સ્થળ મુલાકાત કરીને હકીકતલક્ષી માહિતી મેળવવી અને ત્યારબાદ પરિણામલક્ષી ઉકેલ તરફ આગળ વધવું જરૂરી છે. પ્રજાલક્ષી રજૂઆતો અંગે અધિકારીઓ હકારાત્મક અને સંવેદનશીલ અભિગમ અપનાવે તથા પડતર પ્રશ્નોનો શક્ય તેટલો ઝડપી નિકાલ કરે તે માટે તેમણે સૂચનાઓ આપી હતી. બેઠકમાં જિલ્લા પંચાયતના પ્રમુખ શ્રીમતી રંજનબેન જીવાણી, જિલ્લા વિકાસ અધિકારી સુશ્રી નિશા, નિવાસી અધિક કલેક્ટરશ્રી વિમલ ચૌધરી સહિત વિવિધ વિભાગોના અધિકારીઓ અને સંકલન સમિતિના સભ્યો ઉપસ્થિત રહ્યા હતા.
