મારું શહેર માધવપુર ઘેડમાં જાહેર શૌચાલયનો અભાવ, 25 હજારથી વધુ લોકો અને 15 ગામના રહેવાસીઓ-યાત્રાળુઓ પરેશાન.

મેઈન જાપા સહિતના વિસ્તારોમાં જાહેર શૌચાલયની પૂરતી સુવિધા નહીં; તાત્કાલિક નવી સુવિધા ઊભી કરવાની સ્થાનિકોની માંગ

માધવપુર ઘેડ: પોરબંદર જિલ્લાના પ્રસિદ્ધ ધાર્મિક અને પ્રવાસન સ્થળ માધવપુર ઘેડમાં જાહેર શૌચાલયની પૂરતી સુવિધાના અભાવે સ્થાનિકો ઉપરાંત યાત્રાળુઓ અને પ્રવાસીઓને ભારે હાલાકી ભોગવવી પડી રહી હોવાની રજૂઆત સામે આવી છે. માધવપુર ઘેડમાં 25 હજારથી વધુ લોકોની વસ્તી તેમજ આસપાસના 15 જેટલા ગામોના રહેવાસીઓની અવરજવર હોવા છતાં મેઈન જાપા સહિતના મહત્વના વિસ્તારોમાં પૂરતી જાહેર શૌચાલય વ્યવસ્થા ઉપલબ્ધ ન હોવાનો સ્થાનિકોનો આક્ષેપ છે.

માધવપુર ઘેડનું ધાર્મિક અને ઐતિહાસિક મહત્વ વિશેષ છે. ભગવાન શ્રીકૃષ્ણ અને રુક્મિણીજીના વિવાહ સાથે જોડાયેલા સ્થળો તેમજ બેઠકજી સહિતના ધાર્મિક અને ઐતિહાસિક સ્થળોએ મોટી સંખ્યામાં શ્રદ્ધાળુઓ અને પ્રવાસીઓ મુલાકાતે આવે છે. આવા મહત્વના પ્રવાસન અને ધાર્મિક ધામમાં મૂળભૂત સુવિધા તરીકે જાહેર શૌચાલયની પૂરતી વ્યવસ્થા હોવી જરૂરી છે.

મહિલાઓ, બાળકો અને વૃદ્ધોને વધુ મુશ્કેલી

જાહેર શૌચાલયની સુવિધા પૂરતી ન હોવાને કારણે ખાસ કરીને મહિલાઓ, બાળકો, વૃદ્ધો અને દિવ્યાંગ યાત્રાળુઓને વધુ મુશ્કેલીનો સામનો કરવો પડતો હોવાની સ્થાનિકોની રજૂઆત છે. લાંબા સમય સુધી અહીં આવતા લોકો માટે શૌચાલયની સુવિધા ઉપલબ્ધ ન રહે તો જાહેર સ્વચ્છતા અને પર્યાવરણ સામે પણ સમસ્યા ઊભી થઈ શકે છે.

સ્થાનિકોનું કહેવું છે કે માધવપુર ઘેડને પ્રવાસન ધામ તરીકે વધુ વિકસાવવામાં આવી રહ્યું છે ત્યારે અહીં આવતા પ્રવાસીઓ માટે માત્ર ધાર્મિક અને ઐતિહાસિક સ્થળોનું વિકાસ પૂરતું નથી, પરંતુ શૌચાલય, પીવાનું પાણી, સ્વચ્છતા અને અન્ય પાયાની નાગરિક સુવિધાઓ પણ ઉપલબ્ધ કરાવવી જરૂરી છે.

મેઈન જાપા ખાતે તાત્કાલિક શૌચાલય બનાવવાની માંગ

માધવપુર ઘેડની જાહેર જનતા અને યાત્રાળુઓ દ્વારા મેઈન જાપા તેમજ આસપાસના યોગ્ય સ્થળોએ તાત્કાલિક જાહેર શૌચાલયની સુવિધા ઉભી કરવાની માંગ કરવામાં આવી છે. સાથે જ ધાર્મિક તથા પ્રવાસન સ્થળોની નજીક જરૂરિયાત મુજબ વધુ શૌચાલય બનાવવામાં આવે અને તેની નિયમિત સફાઈ તથા જાળવણી થાય તેવી પણ માંગ છે.

સ્થાનિકો દ્વારા સંબંધિત તંત્રને સ્થળનું તાત્કાલિક નિરીક્ષણ કરી આ લાંબા સમયથી રહેલી સમસ્યાનો કાયમી ઉકેલ લાવવા વિનંતી કરવામાં આવી છે.

જાહેર જનતાનો સ્પષ્ટ સંદેશ છે કે માધવપુર ઘેડ જેવા ધાર્મિક અને પ્રવાસન ધામમાં આવતા દરેક યાત્રાળુ અને પ્રવાસીને મૂળભૂત સુવિધાઓ મળવી જોઈએ. જાહેર શૌચાલયની યોગ્ય વ્યવસ્થા કરી આ સમસ્યાનો વહેલી તકે ઉકેલ લાવવામાં આવે તેવી સ્થાનિકોની માંગ છે.  

રિપોર્ટર :  સુભાષ માવદીયા