ઈન્ડિયા ઉત્તરાખંડમાં ઘર બનાવવા રિષભ પંતની ઈચ્છા, CM ધામીને કરી ખાસ અપીલ

ભારતીય ક્રિકેટ ટીમના સ્ટાર વિકેટકીપર-બેટર રિષભ પંત ફરી એકવાર ચર્ચામાં આવ્યા છે. આ વખતે ક્રિકેટના મેદાન પરના પ્રદર્શનને કારણે નહીં, પરંતુ ઉત્તરાખંડમાં પોતાનું ઘર બનાવવાની ઈચ્છાને લઈને તેમણે સોશિયલ મીડિયા પર કરેલી જાહેર અપીલ ચર્ચાનું કેન્દ્ર બની છે. પંતે ઉત્તરાખંડના મુખ્યમંત્રી પુષ્કર સિંહ ધામીને ટેગ કરીને પોતાની સમસ્યાનો ઉકેલ લાવવા વિનંતી કરી છે.

રિષભ પંતે મોડી રાત્રે X પર એક લાંબી પોસ્ટ શેર કરીને જણાવ્યું કે તેઓ છેલ્લા ત્રણ વર્ષથી ઉત્તરાખંડમાં પોતાના માટે યોગ્ય જમીન શોધી રહ્યા છે. તેમનું કહેવું છે કે તેઓ પોતાના મૂળ રાજ્ય સાથે ઊંડો સ્થાનિક સંબંધ ધરાવે છે અને ઉત્તરાખંડમાં પરત આવીને પોતાના લોકો વચ્ચે રહેવા માગે છે. જોકે, જમીન ખરીદવાની પ્રક્રિયા તેમના માટે સતત મુશ્કેલ બની રહી હોવાનું તેમણે જણાવ્યું છે.

પંતે પોતાની લાગણી વ્યક્ત કરતાં કહ્યું કે ઉત્તરાખંડ તેમનું વતન છે અને તેઓ પોતાના રાજ્યને ખૂબ પ્રેમ કરે છે. તેઓ એવી મોટી અને યોગ્ય જગ્યા ઈચ્છે છે જ્યાં પોતાનું ઘર બનાવી શકે. પરંતુ જમીન મેળવવાની પ્રક્રિયામાં સ્પષ્ટતાના અભાવને કારણે છેલ્લા ત્રણ વર્ષથી તેઓ રાહ જોઈ રહ્યા હોવાનું પંતે જણાવ્યું છે.

ક્રિકેટરે પોતાની પોસ્ટમાં ઉત્તરાખંડના વિકાસમાં યોગદાન આપવાની ઈચ્છા પણ વ્યક્ત કરી છે. તેમણે કહ્યું કે તેઓ પોતાના મૂળ સાથે ફરીથી જોડાવા અને પોતાના ‘પહાડી લોકો’ વચ્ચે રહેવા માગે છે. આ સાથે તેમણે ભૂતકાળમાં ઉત્તરાખંડને પ્રમોટ કરતી વખતે જમીન અંગે થયેલી વાતચીત અને આપવામાં આવેલા આશ્વાસનોનો પણ ઉલ્લેખ કર્યો છે.

પંતે મુખ્યમંત્રી સમક્ષ એક સ્પષ્ટ પ્રસ્તાવ પણ મૂક્યો છે. જો રાજ્ય સરકાર તેમને નિયમ મુજબ જમીન ઉપલબ્ધ કરાવવાની મંજૂરી આપે, તો તેઓ નક્કી કરાયેલા સરકારી દરે જમીન ખરીદવા તૈયાર હોવાનું તેમણે જણાવ્યું છે. એટલે કે પંતે કોઈ વિશેષ રાહત કે અલગ દરની માંગ કરવાને બદલે સરકારી નિયમ મુજબની પ્રક્રિયા આગળ વધારવાની તૈયારી દર્શાવી છે.

પંત માટે ઉત્તરાખંડમાં પોતાનું ઘર બનાવવું માત્ર મિલકત ખરીદવાનો મુદ્દો નથી, પરંતુ પોતાના મૂળ સાથે જોડાવાની ઈચ્છા પણ છે. તેમના પરિવારની મૂળ ધરતી ઉત્તરાખંડ સાથે જોડાયેલી છે અને પંત અગાઉ પણ અનેક પ્રસંગોએ રાજ્ય પ્રત્યેનો પોતાનો પ્રેમ વ્યક્ત કરી ચૂક્યા છે. હવે તેમણે આ મુદ્દો જાહેરમાં ઉઠાવતાં રાજ્ય સરકાર તરફથી શું પ્રતિસાદ મળે છે તેના પર સૌની નજર રહેશે.

રિષભ પંતની પોસ્ટ સોશિયલ મીડિયા પર વાયરલ થતાં ચાહકો પણ વિવિધ પ્રકારની પ્રતિક્રિયાઓ આપી રહ્યા છે. કેટલાક ચાહકોએ તેમના વતન પરત ફરવાના નિર્ણયને આવકાર્યો છે, જ્યારે કેટલાકે મજાકિયા અંદાજમાં પણ ટિપ્પણીઓ કરી છે. હવે મુખ્યમંત્રી પુષ્કર સિંહ ધામીની સરકાર આ મામલે શું પગલું ભરે છે અને પંતને ઉત્તરાખંડમાં પોતાનું ઘર બનાવવામાં મદદ મળે છે કે નહીં, તે આગામી સમયમાં સ્પષ્ટ થશે.