મારું શહેર 112ના આંકડાથી અમદાવાદની ‘સેફ સિટી’ની છબી પર સવાલ, 1 લાખથી વધુ હિંસક ઝઘડાના કોલ.

અમદાવાદને દેશના સુરક્ષિત અને વિકસતા શહેરોમાં ગણવામાં આવે છે, પરંતુ 112 ઈમરજન્સી હેલ્પલાઈનના આંકડા શહેરમાં વધતી હિંસક ઘટનાઓની ચિંતાજનક તસવીર રજૂ કરે છે. ઓગસ્ટ 2025ના અંતથી જુલાઈ 2026 સુધીના 334 દિવસના પોલીસ લોગ મુજબ કુલ 2,10,593 ઈમરજન્સી કોલ નોંધાયા હતા. તેમાંથી 1,00,081 કોલ જાહેર ઝઘડા, હુમલા, દારૂના નશામાં થતા બખેડા તેમજ મહિલા-બાળકો પરના શારીરિક હુમલા સાથે સંબંધિત હોવાનું જણાવાયું છે. એટલે કે સરેરાશ દર 4.8 મિનિટે એક હિંસક ઘટના અંગે પોલીસને કોલ મળ્યો હતો.

આ આંકડાઓમાં જાહેરમાં વિવાદ અને ઝઘડાના 36,238 કોલ, હુમલાના 36,161 કોલ, દારૂના નશામાં થયેલા ઝઘડાના 17,050 કોલ અને મહિલા તથા બાળકો પર શારીરિક હુમલાના 10,632 કોલનો સમાવેશ થાય છે. આ ઉપરાંત જીવનને જોખમ હોવાની ફરિયાદોના 5,583 કોલ, ગાળાગાળી અથવા મૌખિક હેરાનગતિના 4,769 કોલ અને ઘરેલુ હિંસાના 3,749 કોલ પણ નોંધાયા હોવાનું સામે આવ્યું છે. મહિલા અને બાળકોની સુરક્ષા સંબંધિત 5,842 કોલ નોંધાતા શહેરમાં જાહેર સ્થળોની સાથે ઘરેલુ સ્તરે પણ વિવાદ અને હિંસાની સમસ્યા ગંભીર હોવાના સંકેત મળે છે.

ખાસ કરીને દારૂના નશામાં થતા ઝઘડાના 17 હજારથી વધુ કોલ દારૂબંધીના અમલ અંગે પણ પ્રશ્નો ઉભા કરે છે. જાહેરમાં ઝઘડા અને હુમલાના કુલ 89,449 કોલમાંથી નોંધપાત્ર સંખ્યા નશાની સ્થિતિ સાથે જોડાયેલી હોવાનું જણાવાયું છે. વસ્ત્રાલમાં ટોળા દ્વારા હુમલો અને વડજ સર્કલ નજીક અફવાના પગલે ટોળા દ્વારા મહિલાઓ સાથે થયેલી મારામારી જેવી ઘટનાઓ પણ જાહેર સ્થળોએ ટોળાશાહીની વધતી માનસિકતા અંગે ચિંતા ઊભી કરે છે. આવી ઘટનાઓમાં અફવા, વ્યક્તિગત વિવાદ કે નશાની સ્થિતિ ઝડપથી હિંસક સ્વરૂપ ધારણ કરતી જોવા મળે છે.

આંકડાઓને જોતા અમદાવાદમાં પોલીસ માટે માત્ર સંગઠિત ગુનાખોરી જ નહીં, પરંતુ રોજિંદા જીવનમાં થતા ઝઘડા અને હિંસા પણ મોટો પડકાર બની રહ્યા છે. જોકે, 112 પર મળેલો કોલ હંમેશા નોંધાયેલો ગુનો અથવા ઘટના સાબિત થતો નથી; ઘણા કોલ મદદ, જાણકારી અથવા પરિસ્થિતિ અંગેની ફરિયાદ પણ હોઈ શકે છે. તેમ છતાં એક લાખથી વધુ હિંસા-સંબંધિત કોલનો આ આંકડો પોલીસ પેટ્રોલિંગ, ઝડપી પ્રતિસાદ, દારૂના ગેરકાયદે નેટવર્ક સામે કાર્યવાહી અને જાહેર સ્થળોએ સુરક્ષા વ્યવસ્થા વધુ મજબૂત કરવાની જરૂરિયાત તરફ ચોક્કસ ઈશારો કરે છે.