એજ્યુકેશન ગુજરાત યુનિવર્સિટીની સંલગ્ન કોલેજોમાં 50%થી વધુ બેઠકો ખાલી, 15 જુલાઈ સુધી પાંચ પ્રવેશ રાઉન્ડ; શૈક્ષણિક સત્ર મોડું શરૂ થશે
જીકાસ (GCAS) આધારિત કોમન પ્રવેશ પ્રક્રિયામાં રાજ્ય સરકારે યુનિવર્સિટીઓ અને કોલેજોને સ્વતંત્ર રીતે પ્રવેશ રાઉન્ડ યોજવાની સત્તા આપ્યા બાદ ગુજરાત યુનિવર્સિટીએ મહત્વપૂર્ણ નિર્ણય લીધો છે. યુનિવર્સિટી દ્વારા સંલગ્ન આર્ટ્સ, કોમર્સ અને સાયન્સ કોલેજોને યુજી અભ્યાસક્રમોમાં પ્રવેશ માટે 15 જુલાઈ સુધી કુલ પાંચ પ્રવેશ રાઉન્ડ પૂર્ણ કરવા અંગે માર્ગદર્શિકા જાહેર કરવામાં આવી છે.
ગુજરાત યુનિવર્સિટી સંલગ્ન કોલેજોમાં મોટી સંખ્યામાં બેઠકો ખાલી રહેતા પ્રવેશ પ્રક્રિયા લંબાઈ છે. તેના કારણે નવા શૈક્ષણિક વર્ષની શરૂઆત પણ લગભગ 15 દિવસ મોડી થશે. યુનિવર્સિટીએ તમામ સંલગ્ન કોલેજોને 15 જુલાઈથી નવા શૈક્ષણિક સત્રનો પ્રારંભ કરવા સૂચના આપી છે.
અગાઉ જીકાસ દ્વારા યોજાયેલા ચાર કોમન પ્રવેશ રાઉન્ડમાં યુનિવર્સિટી સંલગ્ન કોલેજો અને યુનિવર્સિટી ભવનોમાં ઉપલબ્ધ 64 હજારથી વધુ યુજી અને ઇન્ટિગ્રેટેડ કોર્સની બેઠકોમાંથી માત્ર આશરે 27 હજાર બેઠકો પર જ પ્રવેશ પૂર્ણ થયો હતો. એટલે કે 50 ટકાથી વધુ બેઠકો હજુ પણ ખાલી છે.
ખાલી બેઠકો ભરવા માટે હવે કોલેજોને પોતાના સ્તરે પ્રવેશ પ્રક્રિયા આગળ વધારવાની મંજૂરી આપવામાં આવી છે. યુનિવર્સિટી દ્વારા જાહેર કરાયેલી માર્ગદર્શિકા મુજબ 15 જુલાઈ સુધીમાં પાંચ તબક્કામાં પ્રવેશ પ્રક્રિયા પૂર્ણ કરવાની રહેશે, જેથી વધુમાં વધુ વિદ્યાર્થીઓને પ્રવેશનો લાભ મળી શકે.
શૈક્ષણિક નિષ્ણાતોના મતે, પ્રવેશ પ્રક્રિયામાં થયેલા વિલંબની સીધી અસર નવા શૈક્ષણિક સત્ર પર પડશે. જોકે, યુનિવર્સિટીનું માનવું છે કે વધારાના પ્રવેશ રાઉન્ડ દ્વારા વધુ વિદ્યાર્થીઓને પ્રવેશ આપીને ખાલી બેઠકો ભરવાનો પ્રયાસ કરવામાં આવશે, જેથી કોલેજોમાં પ્રવેશનું પ્રમાણ વધે અને શૈક્ષણિક કામગીરી નિયમિત રીતે શરૂ થઈ શકે.
